A Brief History of Time

in Wikipedia, die vrye ensiklopedie
A Brief History of Time
SkrywerStephen Hawking
LandVlag van Verenigde Koninkryk Verenigde Koninkryk
TaalEngels
OnderwerpKosmologie
GenreNie-fiksie
UitgewerBantam Dell Publishing Group
Uitgegee1988
MediumDruk (gebind & sagteband)
Bladsye256
ISBN978-0-553-10953-5

A Brief History of Time (Afrikaans: "'n Kort geskiedenis van tyd") is 'n boek deur Stephen Hawking waarin hy sy idees oor die ontstaan en ontwikkeling van die heelal en tyd uiteensit.[1] In die klassieke topverkoper verduidelik hy die kompleksiteite van moderne denke oor kosmologie in goeie luim en in leketaal. Die boek is die eerste keer in 1988 uitgegee en ondertussen in meer as 35 tale vertaal.[2]

Van die onderwerpe wat in die boek aangeraak word, is die geskiedenis van fisika, swaartekrag, hoe lig in die heelal beweeg, ruimtetyd, elementêre deeltjies (klein, fundamentele deeltjies waaruit die heelal opgebou is), swartkolke, die oerknal (die teorie dat die heelal van een punt begin het) en tydreise (die idee dat reise na die verlede en die toekoms onderneem kan word).

Alhoewel die boek komplekse teorieë behandel, bevat dit in sy geheel slegs een natuurkundige vergelyking, E = mc². Die outeur en sy uitgewer is van die oortuiging dat "elke formule in 'n boek die aantal lesers halveer".

Daar is twee ander weergawes van die boek: The Illustrated A Brief History of Time en A Briefer History of Time. Die eersgenoemde het illustrasies wat die konsepte toelig. Dit is ook bygewerk omdat meer inligting ondertussen beskikbaar geraak het. Die laasgenoemde is 'n korter weergawe van die werk, en is ook met nuwe inligting aangevul.

Die boek was vir meer as vier jaar as 'n topverkoper deur die Londense Sunday Times gelys.[3] Meer as 10 miljoen kopieë is oor 'n tydperk van 20 jaar verkoop.[4]

Verwysings[wysig | wysig bron]

  1. HAT Taal-en-feitegids, Pearson, Desember 2013, ISBN 978-1-77578-243-8
  2. "Hawking's briefer history of time" (in Engels). news.bbc.co.uk. 15 Oktober 2001. Geargiveer vanaf die oorspronklike op 14 April 2020. Besoek op 6 Augustus 2008.
  3. "Stephen Hawking's Universe". PBS Online. Geargiveer vanaf die oorspronklike (HTML) op 20 April 2016. Besoek op 11 Junie 2008.
  4. Paris, Natalie (26 April 2007). "Hawking to experience zero gravity". The Daily Telegraph (in Engels). London. Geargiveer vanaf die oorspronklike op 9 Oktober 2019.