Abbie Park Ferguson
Abbie Park Ferguson (Whateley, Massachusetts, 4 April 1837 - Wellington, 23 Maart 1919) was 'n baanbreker op die gebied van onderwys vir dogters en vroue in Suid-Afrika, en veral op die Bolandse dorp Wellington.
Sy was die dogter van 'n Skotse predikant in die Kongregasionalistiese Kerk in Whateley in die deelstaat Massachusetts. Haar ma het uit 'n puriteinse huis gekom. Sy behaal haar onderwysgraad in 1865 aan die Mount Holyoke-seminarie in die VSA. Hoewel sy onderwys in New Haven gaan gee het, wou sy eintlik sendingwerk gaan doen, veral onder die minderbevoorregtes. Ná twee jaar gaan studeer sy verder in Europa waar sy haar M.A. behaal.
Ferguson keer terug na New Haven en begin 'n projek vir straatkinders saam met die Metodistekerk. Tydens 'n besoek aan haar alma mater kom 'n brief aan van dokter Andrew Murray waarin hy vra vir onderwyseresse om 'n inrigting geskoei op Mount Holyoke te begin.
Aan die einde van 1873 kom sy in Suid-Afrika aan en was van die opening op 19 Januarie 1874 verbonde aan die Hugenote-seminarie op Wellington. Sy was 37 jaar aan dié instelling verbonde, waarvan die laaste 11 jaar as rektor en dit uitgebou tot 'n opleidingsinstansie wat die rol van die vrou in die kerk en in die samelewing ingrypend verander het.
[wysig] Bronne
- Gaum, Frits (hoofred.), Christelike Kernensiklopedie, Lux Verbi.BM, Wellington, 2008.
