Abraham Josias Sluysken

Abraham Josias Sluysken
De facto goewerneur van die Nederlandse Kaapkolonie
Ampstermyn 1792 – 14 September 1795
Voorafgegaan deur	Nederburgh en Frijkenius
Opgevolg deur	George Macartney
Persoonlike besonderhede
Gebore	3 Desember 1736
Sterf	18 Januarie 1799

Abraham Josias Sluysken (3 Desember 1736, Deventer - 18 Januarie 1799, Den Haag) was, in die afwesigheid van 'n goewerneur, die laaste hoof van die Kaap onder die eerste bewind van die Verenigde Oos-Indiese Kompanjie (VOC).

Hy tree in 1765 in diens van die VOC en word uiteindelik goewerneur van die Nederlandse handelshawe Soerat aan die weskus van Indië (die versamelnaam van die Nederlandse besittinge was destyds Nederlands Voor-Indië). In 1793 keer hy na Nederland terug en vertoef onderweg daarheen 'n ruk lank aan die Kaap waar hy kennis maak met die kommissarisse-generaal Nederburgh en Frijkenius, vir wie die State-generaal daarheen gestuur het om streng ondersoek na die toestande in te stel wat onder die onbevoegde en verswakte VOC algaande versleg het. Die twee-kommissarisse-generaal stel Nederburgh as waarnemende kommissaris aan om waar te neem tot 'n nuwe goewerneur die leiding kon kom neem, sodat hulle hul ondersoek na VOC-wanbestuur in die Ooste kon gaan voortsit.

Met die oog op verdediging in geval van 'n moontlike aanval deur die Franse laat Sluysken in 1794 'n paar klein fortjies op Simonstad bou. Die volgende jaar kom die burgers van Graaff-Reinet en Swellendam in opstand teen die Kaapse regering en verklaar hulle onafhanklikheid. Terselfdertyd val 'n Britse mag die Kaap aan. Sluysken wend floue pogings aan om die Nederlandse besitting te verdedig, sodat hy dit op 14 September 1795 aan die Engelse moes oorhandig. Hy vertrek op 12 November terug na Nederland.

In 1797 publiseer hy sy Verhaal gehouden bij den Commissaris van de Caap de Goede Hoop. Hierin beskryf hy die gebeurtenisse aan die Kaap van 10 Junie tot 16 September 1795.

Sien ook

• Lys van kommandeurs en goewerneurs van die Kaapkolonie

Bron

• Albertyn, dr. C.F. (red.), 1972. Afrikaanse Kinderensiklopedie. Kaapstad: Nasionale Boekhandel Beperk.

Voorafgegaan deur Kommissarisse-generaals Nederburgh en Frijkenius

Goewerneur van die Kaap de Goede Hoop 1792 – 14 September 1795

Opgevolg deur Britse Goewerneur: George Macartney