Abstraksie (rekenaarwetenskap)

in Wikipedia, die vrye ensiklopedie
Spring na: navigasie, soek

Abstraksie in rekenaarwetenskap is die proses waarop die oortollige kenmerke en gedagtes oor 'n spesifieke onderwerp gestroop word sodat slegs die noodsaaklike eienskappe wat direk van toepassing is op die probleem onder oorweging op daardie tydstip oorbly.

Om die begrip 'n bietjie meer toe te lig met 'n alledaagse voorbeeld kan 'n mens dink aan 'n geval waar een persoon vir 'n ander vra om vir hom 'n poskaart te stuur as hy by sy bestemming aankom. Dit is nie nodig vir die twee persone om aan 'n spesifieke soort poskaart te dink nie. Altwee partye verstaan goed wat 'n poskaart is in breë terme as 'n versameling voorwerpe wat gewoonlik 'n prentjie/foto aan die een kant het en 'n plek vir 'n adres en 'n nota op die keersy. Die besonderhede is nie belangrik nie. 'n Abstraksie kan dus gesien word as 'n begrip of idee wat nie met 'n spesifieke geval verband hou nie.

Abstraksie maak dit moontlik om komplekse probleme makliker op te los. Gewoonlik word daar van verskeie lae of vlakke van abstraksie gebruik gemaak. Eerstens word die probleem eers in breë trekke beskou en sodoende kan 'n duideliker beeld gevorm word van hoe die probleem aangepak behoort te word. Indien 'n mens dadelik deur die fynere besonderhede van implementering oorweldig sou word, sou dit veel moeiliker wees om die probleem op te los.

Sien ook[wysig]

Verwysings[wysig]

Computer Science: From Abstraction to Invention, Jennifer Burg and Stan Thomas, Wake Forest University.