Adam Mickiewicz Instituut
Die Adam Mickiewicz Instituut (Pools: Instytut Adama Mickiewicza) is 'n kulturele organisasie wat deur die Poolse Departement van Kultuur en Nasionale Erfenis befonds word en die bevordering van die Poolse taal en kultuur in die buiteland ten doel het. Sy hoofkantoor is in Warskou gesetel. Die instituut beskik sedert 2001 oor 'n meertalige webtuiste ("www.culture.pl").
Die Departement van Kultuur en Nasionale Erfenis befonds tans twintig Poolse kultuurinstitute in twintig stede buite Pole, waaronder Berlyn, Bratislava, Boedapest, Boekarest, Düsseldorf, Kijif, Leipzig, Londen, Minsk, Moskou, New York, Parys, Praag, Rome, Sint Petersburg, Sofia, Stockholm, Tel Aviv, Vilnius en Wene.
Die instituut se naam vereer die Poolse "digtervors" Adam Mickiewicz (1798–1855), die beduidendste verteenwoordiger van die literêre Romantiek in Pole.
Eksterne skakels[wysig | wysig bron]
- Die webtuiste van die Adam Mickiewicz Instituut (in Pools en Engels)
- Culture.pl Geargiveer 22 Oktober 2007 op Wayback Machine (en)
