Affek

in Wikipedia, die vrye ensiklopedie
Spring na: navigasie, soek

Affek is die wetenskaplike woord wat gebruik word in sielkunde en psigiatrie om 'n persoon se uitwendig-waarneembare gemoed te beskryf. Die woord is begin gebruik aangesien navorsers en mense in die bedryf besef het dat die pasiënt (of enige persoon) die vermoë het om 'n gemoedstoetand te weerspieël wat nie werklik deur die persoon gevoel word nie (soos in die geval van 'n persoon wat probeer om uit 'n inrigting ontslaan te word). Die gebruik van die woord leen tot streng akkurate beskrywing: om te rapporteer dat die pasiënt 'n verhoogde affek toon, impliseer dus nie dat die waarnemer bedoel dat die persoon dit regtig voel nie. As 'n grammatikale konvensie kan 'n individu nie sy of haar eie emosie as "'n vrolike affek" rapporteer nie, slegs as "'n vrolike gemoed" (mits die emosie ter sprake natuurlik "vrolik" is). 'n Waarnemer van dieselfde persoon kan die uitwaartse tekens van die emosie as 'n "vrolike bui" (algemene volksmondgebruik) of as 'n "verhoogde affek" (wetenskaplike gebruik) beskryf.

Alle mense verberg by tye wat hulle as innerlike emosie beleef, sonder dat dié gedrag deur die samelewing afgekeur word. 'n Voorbeeld hiervan is die gebruik van die eerste prinses in die Mej. Suid-Afrika-kompetisie om uiterlike aanduidings van gelukkigheid te toon wanneer die eerste plek aangekondig word, maar innerlik waarskynlik baie teleurgesteld te voel. Enige ander uiterlike emosionele gedrag, soos woede of hartseer, sal waarskynlik deur die meeste waarnemers as swak maniere of swak sportmanskap beskryf word. Daar is ook 'n spektrum van affek in verskillende kulture -- wat as patologiese affek in een kultuur beskou mag word, kan as slegs "ernstig" in 'n ander gereken word. Dieselfde spektrum van affek mag ook intrakultureel ervaar word.

Hierdie artikel is in sy geheel of gedeeltelik vanuit die Engelse Wikipedia vertaal.