Aiguille du Midi

in Wikipedia, die vrye ensiklopedie
Spring na: navigasie, soek

Aiguille du Midi
Aiguille-du-midi-winter.JPG
Aiguille du Midi
Ligging: Chamonix-Mont-Blanc (Rhône-Alpes, Frankryk)
Hoogte: 3 842 meter
Reeks: Mont Blanc-massief (Wes-Alpe)
Koördinate: 45°52′44″N 6°53′16″O
Tipe: Berg
Datum van eerste bestyging: 5 Augustus 1856
Eerste bestyger(s): J.A. Devouassoud, A. en J. Simond

Die Aiguille du Midi is 'n rotsige voorpos van Europa se hoogste berg Mont Blanc. Die berg in die Franse gedeelte van die Mont Blanc-massief het 'n hoogte van 3 842 meter en toring sowat 2 800 meter oor die skioord Chamonix-Mont-Blanc.

Aiguille du Midi (regs) en Dôme de Goûter (heel links)

Die kabelkar (Frans: Télépherique de l'Aiguille du Midi), wat besoekers in twee seksies - met 'n tussenstop by die stasie aan die Plan de l'Aiguille teen 'n hoogte van 2 310 meter - na die bergspits neem, is in 1955 geopen en was destyds met sy eindstasie teen 'n hoogte van 3 777 meter die hoogste ter wêreld. Ná die opening van die kabelkar van die Klein Matterhorn in Zermatt (Switserland) is dit egter nog steeds die tweede hoogste. Die bergstasie met sy uitsigpunt, restourant en kafee is een van die gewildste besienswaardighede in Chamonix. Op die bergspits is ook radio- en televisie-uitsaaigeriewe ingerig.

Die kabelkar na die Aiguille du Midi maak deel uit van 'n reeks kabelkarre in die Mont Blanc-massief. Twee ander belangrike kabelkarre neem toeriste oor die gletser Glacier de Géant en vanuit Entrèves naby Courmayeur (Aostavallei) - met 'n tussenstop by die Refugio (berghotel) Torino (3 375 meter) na die Italiaanse Pointe Helbronner teen 'n hoogte van 3 462 meter. Die sweefspoor oor die gletser is weens die sterk winde in die gebied slegs onreëlmatig in bedryf.

Die bergstasie op die Aiguille du Midi is die uitgangspunt van 'n roete na die Mont Blanc, wat oor die berghut Refuge des Cosmiques en die Mont Maudit-bergspits lei, en van die beroemde skiroete Vallée Blanche, wat oor die gletsers Glacier de Géant en Mer de Glace tot by Montenvers en Chamonix lei. Dit is met 'n lengte van sowat 20 kilometer en 'n hoogteverskil van 2 800 meter die langste in die Alpe.

Die panorama[wysig]

Die bergspits van die Aiguille du Midi

Danksy die ligging teenoor die Mont Blanc en bo-oor die Vallée Blanche bied die Aiguille du Midi 'n pragtige uitsig oor die belangrikste berge met 'n hoogte van meer as 4 000 meter in Frankryk, Switserland en Italië, waaronder die Cervin, die Mont Rose, die Aiguilles de Chamonix, die Grandes Jorasses (4 208 meter), L'Aiguille Verte en die Drus, die Dôme du Goûter en natuurlik die Mont Blanc (4 810 meter).

In die weste bied die bergspits 'n asemberowende uitsig oor Chamonix en 'n aantal berggebiede, waaronder die bergmassief van die Aiguilles Rouges, die Aravis, die Chablais, die Genevois, die Jura en die Chartreuse.

Eksterne skakels[wysig]

Commons-logo.svg
Wikimedia Commons het meer media verwant aan:
Aiguille du Midi (kategorie)