Albanie (kiesafdeling)

Dr. Leander Starr Jameson, eerste Volksraadslid vir Albanie.

Albanie was van 1910 tot 1994 'n kiesafdeling in die Suid-Afrikaanse Volksraad. Dit het gesentreer om die landdrosdistrik Albanie, waarvan Grahamstad die grootste sentrum is.

1910-1948

In 1910 het dr. Leander Starr Jameson die kiesafdeling onbestrede vir die Unionisteparty gewen. In 1915 stel die Suid-Afrikaanse Party vir W.M. Espin teen die Unionisteparty se Frederick van der Riet, wat wen met 'n skrale 85 stemme. In die 1920 verkiesing stel die S.A.P. egter nie weer 'n kandidaat nie en Van der Riet word onbestrede vir die Unioniste verkies. Ná die Unioniste en die Sappe saamsmelt, word Van der Riet in 1921 onbestrede vir die S.A.P. verkies. In 1924 wen Robert Struben Albanie vir die S.A.P. met 'n meerderheid van 519 teen die onafhanklike F.G. Reynolds. In 1929 word hy, net soos Van der Riet, met sy tweede verkiesing onbestrede verkies. In 1933 se koalisieverkiesing staan weer geen kandidaat teen hom nie, maar in 1938 en 1943 is die onbestrede V.P.-kandidaat T.B. Bowker, 'n kleinseun van die 1820-setlaar John Mitford Bowker. In 1948 kry hy teenstand van die onafhanklike J.V. Buchner, maar wen gemaklik met 'n meerderheid van 3 482.

1953-1961

In 1953 stel die Nasionale Party die eerste keer 'n kandidaat in Albanie toe H.A. de Ridder 2 391 stemme op hom verenig en Bowker met 'n meerderheid van 4 203 wen. In 1958 gaan hy weereens onbestrede Volksraad toe. In die volkstemming van 1960 oor republiekwording stem 2 448 kiesers in Albanie daarvoor en 8 184 daarteen. Die uitslag ontmoedig die Nasionale Party om weer 'n kandidaat te stel in die 1961-verkiesing en Bowker wen met 'n meerderheid van 4 894 teen die Progressiewe Party se B.S. Muir, wat 1 175 stemme gekry het.

1966-1974

Blykbaar het Bowker op 21 Julie 1964 gesterf, want in 1966 wen Colin Bennett die setel vir die V.P. met 'n meerderheid van 2 422 teen die N.P. se A.J. Westaway. In 'n tussenverkiesing op 22 Oktober 1969, nadat Bennett blykbaar oorlede is op 25 Mei 1969, word dié uitslag feitlik herhaal toe William Deacon vir die V.P. wen met 'n meerderheid van 2 510 oor die N.P. se G.J. van der Vyver. In die verkiesing van 1970 kom Deacon teen 'n N.P.- sowel as 'n P.P.-kandidaat te staan. Hy skuif sy meerderheid op na 2 691, met R. de V. Olckers wat 3 259 stemme vir die N.P. kry en M. van W. Smith se 1 002 vir die Progressiewes.

In 1974 stel die N.P. weereens nie 'n kandidaat nie, sodat Deacon met 'n meerderheid van 3 870 wen teen die P.P. se M. van W. Smith, wat 'n tweede keer probeer het.

Partye en kandidate gewen

• 1910 - Dr. Leander Starr Jameson van die Unionisteparty
• 1915 - Frederick John Werndly van der Riet van die Unionisteparty
• 1920 - Frederick John Werndly van der Riet van die Unionisteparty (onbestrede)
• 1921 - Frederick John Werndly van der Riet van die Suid-Afrikaanse Party (onbestrede)
• 1924 - Robert Henry Struben van die Suid-Afrikaanse Party
• 1929 - Robert Henry Struben van die Suid-Afrikaanse Party (onbestrede)
• 1933 - Robert Henry Struben van die Suid-Afrikaanse Party (onbestrede)
• 1938 - Thomas Bouchier Bowker van die Verenigde Party (onbestrede)
• 1943 - Thomas Bouchier Bowker van die Verenigde Party (onbestrede)
• 1948 - Thomas Bouchier Bowker van die Verenigde Party
• 1953 - Thomas Bouchier Bowker van die Verenigde Party
• 1958 - Thomas Bouchier Bowker van die Verenigde Party (onbestrede)
• 1961 - Thomas Bouchier Bowker van die Verenigde Party
• 1966 - Colin Bennett van die Verenigde Party
• 1970 - William Henry D'Ewes Deacon van die Verenigde Party
• 1974 - William Henry D'Ewes Deacon van die Verenigde Party
• 1977 -
• 1981 - Errol Moorcroft van die Progressiewe Federale Party
• 1987 -
• 1989 -

Bronne

• Schoeman, B.M. 1977. Parlementêre verkiesings in Suid-Afrika 1910-1976. Pretoria: Aktuele Publikasies.