Alfred Beit

in Wikipedia, die vrye ensiklopedie
Spring na: navigasie, soek
Alfred Beit
’n Beeld van die betrokke persoonlikheid.
Portretskildery deur Giovanni Boldini

Gebore 15 Februarie 1853
Hamburg, Duitse Bond
Oorlede 16 Julie 1906
Tewin Water-huis, Tewin, Verenigde Koninkryk
Nasionaliteit Verenigde Koninkryk
Beroep Goud- en diamantemagnaat

Alfred Beit (* 15 Februarie 1853 in Hamburg; † 16 Julie 1906 op die Tewin Water-landgoed in Tewin, 'n dorp naby Welwyn in die Engelse graafskap Hertfordshire) was 'n Brits-Suid-Afrikaanse goud- en diamantemagnaat (Randlord) van Duitse afkoms.

Beit is in 'n welgestelde Hamburgse koopmansfamilie van Joodse afkoms gebore, wat die Christengeloof aangeneem het, en het in 1875 na Suid-Afrika geëmigreer. In Kimberley het hy sy eie besigheid gestig en hier in 1879 die belangstelling van Cecil John Rhodes gewek. Die twee sakemanne, wat later deur 'n noue "finansiële vriendskap" verbind is, het in 1888 die beroemde mynboumaatskappy De Beers Consolidated Mines Ltd gestig. In politieke opsig het Beit Rhodes se imperialistiese aspirasies gedeel. Beit was een van die welvarendste mans van sy tyd wat naas sy mynboubelange ook voordeel uit infrastruktuurprojekte in Sentraal- en Suider-Afrika getrek het.

Nog in 1888 het Beit hom in Londen gevestig. Hy het groot dele van sy fortuin aan 'n verskeidenheid weldadigheidsorganisasies en opvoedkundige instellings in Hamburg, Londen en Suid-Afrika geskenk. 'n Ruim bedrag het hy in sy eie kunsversameling belê wat hy vanaf 1888 opgebou het. Beit het in 1898 Britse burgerskap aanvaar. As 'n Brit van Joodse afkoms en gebore Duitser het Beit, 'n uiters beskeie man, 'n lae profiel in die gegoede burgerlike kringe in Londen gehandhaaf. Toe die politieke spanninge tussen die Britse en die Duitse Ryk in die jare voor die Eerste Wêreldoorlog hand oor hand toegeneem het, het Beit 'n vergeefse poging onderneem om as bemiddelaar tussen Londen en Berlyn op te tree.

In sy geboortestad het Beit, net soos sy familie, byna in vergetelheid geraak. Eers in 1967 is 'n straat in die Hamburgse stadsdeel Harvestehude na hom vernoem. In Suider-Afrika herinner onder andere die Alfred Beitbrug, wat die grens tussen Suid-Afrika en Zimbabwe vorm, aan die entrepreneur.