Allen Leech

in Wikipedia, die vrye ensiklopedie
Spring na: navigasie, soek
Allen Leech
Allen Leech in 2011
Geboorte 18 Mei 1981
Killiney, graafskap Dublin
Vlag van Republiek van Ierland Republiek van Ierland
Nasionaliteit Iers
Beroep(e) Akteur
Noemenswaardige
rolprent(e)
Cowboys & Angels
Man About Dog

Allen Leech (* 18 Mei 1981), in sy vroeë loopbaan bekend as Alan Leech, is 'n Ierse verhoog-, rolprent- en televisie-akteur.

Leech is 'n boorling van Killiney, graafskap Dublin en het sy debuut in 1998 met 'n klein rol in A Streetcar Named Desire gemaak. In Cowboys & Angels het hy sy eerste groot rol as Vincent Cusack vertolk en het in 2004 as Mo Chara in Man About Dog 'n Irish Film & Television Awards-nominasie ingepalm.

As Marcus Agrippa in HBO se historiese drama Rome het Allen Leech internasionale bekendheid verwerf, maar hy staan tans veral bekend vir sy rol as chauffeur Tom Branson in ITV se kostuumdrama Downton Abbey.

Vroeë lewe en opvoeding[wysig]

Allen Leech is uit die huwelik van David Leech, 'n hoof uitvoerende beampte van 'n rekenaarstelsel-maatskappy, en Kay Leech, 'n huisvrou, gebore. Hy is die derde van vier kinders en het 'n ouer broer, Greg, 'n ouer suster, Ali, en 'n jonger broer, Simon. Sy ouers het baie aandag aan hul gesinslewe gewy. As kind was Allen oorgewig en dikwels deur sy skoolmaats afgeknou. Hy was gevolglik eerder na binne gekeer en sku vir ander mense.

In die ouderdom van elf is sy belangstelling vir toneelkuns gewek toe hy die rol van die "lafhartige leeu" in 'n skoolproduksie van Die Towenaar van Oz gekry het. Vervolgens het dramakuns naas die gesinslewe sentraal gestaan in sy tienerjare. In 1998 het hy 'n klein rol in die Gate Theatre se opvoering van A Streetcar Named Desire vertolk, en alhoewel 'n argitekteloopbaan vir sy ouers 'n beter beroepskeuse sou gewees het, het Allen gekies om 'n loopbaan as professionele akteur te volg. Sy ouers het ingestem, onder die voorwaarde dat hy 'n akademiese graad moes verwerf waarop hy sou kon steun.

Allen het 'n B.A. en 'n meestersgraad in Drama- en Toneelstudies aan die Trinity-kollege te Dublin verwerf. Hy het sy eerste groot rolle in Cowboys & Angels en Man About Dog vertolk toe hy nog met sy studies besig was. Oudisies en akteurskuns het min tyd gelaat vir sy akademiese werk.