Andries Pretorius-monumente

'n Standbeeld van Andries Pretorius voor die Stadsaal van Pretoria

Beeld van Pretorius by die Voortrekkermonument

In Suid-Afrika is daar verskeie gedenktekens wat Andries Pretorius in herinnering roep.

Graaff-Reinet

Die Andries Pretorius-monument by Graaff-Reinet ter ere van Pretorius, Gerrit Maritz en die ander Voortrekkers uit daardie omgewing is op 27 November 1943 onthul. Die monument is deur Coert Steynberg uit graniet gebeeldhou, is ongeveer 5 m hoog en het aanvanklik langs die hoofpad na Middelburg gestaan. Om dit teen vandalisme te beskerm is dit in 2012 na net binne die grense van die Kamdeboo Nasionale Park verskuif. Op die basis van die monument staan:

“eenmaal sal daar wel 'n wiel oor ons wêreld rol, wat vir u en vir my onkeerbaar is”

Pretoria

Op 21 Oktober 1955 het Pretorius se agterkleinseun, kol. I.J. Meyer, 'n ruiterstandbeeld voor die stadsaal van Pretoria van sy oupagrootjie onthul. Hierdie beeld in brons is gemaak deur Coert Steynberg.

Voortrekkermonument

Een van die hoekfigure van die Voortrekkermonument stel Pretorius voor.

Hartbeespoortdam

Pretorius se destydse woning op Grootplaats word vandag deur die water van die Hartbeespoortdam bedek as die dam vol is. 'n Bronsplaat op 'n klip gedenkteken is daar naby op 12 Desember 1962 onthul.

Lees ook

• Leverton, B.J.T.: Die woonhuis van Andries Pretorius. In: Lantern. Tydskrif vir Kennis en Kultuuur. Jaargang 18, nr. 1, September 1968