Anna Bender
Anna Bender | |
|---|---|
| Gebore | 6 Desember 1919 Piet Retief, Suid-Afrika |
| Sterf | 13 Desember 2004 |
| Beroep(e) | Pianis, outeur |
| Instrumente | Klavier |
Anna Bender (6 Desember 1919 - 13 Desember 2004) was 'n Suid-Afrikaanse pianis en outeur.[1] Sy is op Piet Retief gebore. Haar moeder was haar eerste leermeester, maar later het sy oorsee in Londen onderrig ontvang van I.J. Haarhoff, Isador Epstein en Louis Kentner.
In 1950 is sy as amptelike begeleidster by die destydse SAUK aangestel, en in die 20 jaar wat sy dié pos beklee het, het sy talle bekende internasionale kunstenaars begelei, onder andere Marcel Wittrisch.[1] As solis het sy byvoorbeeld onder vooraanstaande gasdirigente soos Strawinski opgetree.
In 1975 is sy aangestel in die personeel van die Pretoriase Technikon nadat sy 'n tyd lank redaktrise van die musiektydskrif Opus was. Uit haar pen het 'n twintigtal radiopraatjies oor musiek verskyn. Sy het ook 'n boek, Vir die musiekleier, gepubliseer, en jare lank die lewe van die komponis Mornay du Plessis nagevors.
Sy was ook ʼn kampvegter vir die Afrikaanse lied en lewer 'n groot bydrae tot die optekening en bewaring van die Afrikaanse liedereskat.
Bronnelys[wysig | wysig bron]
- Wêreldspektrum, Vol. 3, 10-11, ISBN 0 908409 44 3
Verwysings[wysig | wysig bron]
- ↑ 1,0 1,1 (en) The World of South African Music: A Reader bladsy 122. deur Christine Lucia, uitgewer Cambridge Scholars Press, 1ste uitgawe (2005) ISBN 1-904303-36-6
