Anton Mauve

Anton Mauve
Anton Mauve
	; Selfportret
Geboortenaam	Anthonij Rudolf Mauve
Gebore	18 September 1838; Zaandam, Nederland
Sterf	5 Februarie 1888 (op 49); Arnhem, Nederland
Nasionaliteit	Nederland
Veld	Skildery
Beweging	Realisme

Anthonij (Anton) Mauve (Zaandam, 18 September 1838 – Arnhem, 5 Februarie 1888) was 'n beroemde Nederlandse kunsskilder. Mauve is wêreldwyd bekend vir sy skilderye en hy was ook die leermeester van Vincent van Gogh.

Lewe en werk[wysig | wysig bron]

Mauve is in 1838 in Zaandam gebore as seun van 'n doopsgesinde predikant en Elisabeth Margaretha Hirschig. 'n Jaar na sy geboorte in Zaandam het die gesin na Haarlem verhuis. Daar het hy groot geword en gewens om kunsskilder te word. Sy vader het toestemming verleen dat hy as kunstenaar opgelei kon word, mits hy ook die kwalifikasie van tekenonderwyser sou behaal. Die rede hiervoor was dat dit maatskaplike sekerheid sou gegee het.

Gedurende 1854 tot 1857 het hy as leerling geskilder in die ateljee van Pieter van Os. Daarna het hy ook studeer by Wouterus Verschuur. In sy verdere ontwikkeling het hy ook saamgewerk met Paul Gabriël, Marinus Heijl en J.J. Doffegnies. In dié periode skilder hy in die trant van die Haagse Skool. Mauve was medestigter van die Hollandsche Teekenmaatschappij en lid van Kunst Zij Ons Doel in Haarlem.

Anton Mauve is getroud met Jet Carbentus, 'n niggie van Vincent van Gogh. Van Gogh het einde 1881 op 28-jarige leeftyd vir ongeveer drie weke by sy aangetroude neef in diens van die Haagse ateljee gewerk. Via hom het hy in aanraking gekom met die werk van onder andere Jaap en Matthijs Maris, J.H. Weissenbruch, H.W. Mesdag, George Breitner en Jozef Israëls. Mauve het skilderlesse aan Vincent gegee. Sy invloed op Vincent was groter as wat algemeen aanvaar word. Temas soos spitters, aartappeleters en houtverkopers het hy van Mauve oorgeneem. Deur sy verhouding met Sien Hoornik kom Vincent in konflik met Mauve. Toe Anton Mauve in 1888 skielik sterf in Arnhem, het Vincent in Arles sy Souvenir de Mauve (rose en bloeiende perskebome) aan hom opgedra.

Mauve het sy mees produktiewe jare deurgebring in Laren, waar hy een van die stigters was van die Larense Skool. Hy het baie van sy skilderye in die omgewing van Laren, in die Gooi, geskilder. Menige toeriste en kunskenners het die Gooi ook 'Die land van Mauve' genoem. Die streek was selfs in Amerika onder hierdie naam bekend. Heelwat bekende skilders het in Laren gewoon en kuns geskep, onder andere William Singer, Piet Mondriaan en David Schulmann.

In 1887 het Mauve 'n goue medalje gewen op die Paryse skou met sy doek Die terugkeer van die kudde.