Antwerpen

Vir ander gebruike van die term Antwerpen, sien asb. Antwerpen (dubbelsinnig)

Antwerpen
Kaart	Vlag
	Wapen
Land	België
Region	Vlaandere
Koördinate	51°13′N 04°24′O
Gestig op	2de eeu
Oppervlakte:
- Totaal	204,51 vk km
Hoogte bo seevlak	14 m
Bevolking:
- Totaal (2010)	483 505
- Bevolkingsdigtheid	2 364/vk km
Tydsone	UTC +1
- Somertyd	UTC +2
Burgemeester	Bart De Wever
Amptelike webwerf	www.antwerpen.be

Antwerpen (Frans: Anvers, Engels: Antwerp) is 'n Belgiese stad en munisipaliteit aan die Schelde. Antwerpen is die hoofstad van die gelyknamige Vlaamse provinsie. Die munisipale gebied bevat sowat 484 000 inwoners (2010), die grootste munisipaliteit in België. Sy oppervlakte beslaan 205 km², die land se naasgrootste munisipaliteit.

Antwerpen is 'n sentrum van die diamanthandel.

Die stad is groot en deels op die regteroewer van die Schelde geleë, en sy uitgestrekte hawe vorm 'n belangrike handelsentrum in België. Die belangrikste winkelstrate is die Meir en die Huidevetterstraat. Die stad is bekend om sy Onze-Lieve-Vrouw-katedraal en het 'n gewilde toeristebestemming geword. In die Antwerpse dieretuin kan die besoeker na pikkewyne, ape, sjimpansees, groot roofdiere, boksoorte en olifante kyk.

Benaming

Die naam Antwerpen kan teruggevoer word tot die Germaanse 'anda werpum', wat na die uitgespoelde grond langs 'n draai in 'n rivier verwys. Dit sou dan die naam van die oorspronklike nedersetting op die oewers van die Schelde gewees het.

'n Gewilde plaaslike verhaal, wat van die 15de eeu dateer, verklaar die stad se benaming anders. Hiervolgens was daar eens 'n reus, Druon Antigon, wat in die Schelde gewoon het en tolgeld van verbygaande skepe geëis het. As straf vir diegene wat geweier het om te betaal, het die reus hulle hande afgekap. 'n Romeinse soldaat, Silvius Brabo, het met die reus geveg en daarin geslaag om hom te dood. Daarna het hy die reus se hand afgekap en in die Schelde gegooi. Die bevryde stad het dus Handwerpen geheet, wat later tot Antwerpen gelei het.

Geskiedenis

Teen 1400 was Antwerpen 'n redelike klein nedersetting met minder as 10 000 inwoners. Oor die volgende paar eeue ondervind dit geweldige groei en neem die bevolking toe tot 50 000 in 1500 en 100 000 in 1560. Tydens die Spaanse keiser Karel V se bewind het Antwerpen die belangrikste handelstad noord van die Alpe geword. Saam met die toenemende welvaart het die kultuurlewe ook 'n bloeitydperk beleef.

In die opstand teen Spanje is Antwerpen grotendeels verwoes. Eers is die stad in 1576 in die Spaanse Furie deur muitende Spaanse huursoldate geplunder, toe omtrent 7 000 burgers omkom. Hierna het die stad hom by die Bevrediging van Gent aangesluit en het hy 'n hoofrol in die anti-Spaanse opstand gespeel. In 1585 word Antwerpen ná 'n jaar lange beleg deur Spaanse troepe verower. Die Noordelike Nederlande reageer hierop deur die Scheldemonding met skepe te versper en sodoende die oorsese handel in die Antwerpse hawe tot stilstand te bring. Omtrent die helfte van die bevolking verhuis na die Noordelike Nederlandse provinsies. Na raming het die aantal inwoners van 80nbsp;000 tot 42nbsp;000 afgeneem. Hierdie emigrante uit die Spaans beheerde stad het 'n belangrike bydra gelewer tot die bloeiende handel, kunste en wetenskap gedurende die Noorde se Goue Eeu.

In die volgende twee eeue het Antwerpen nie meer dieselfde bloeivlak as voorheen geken nie. Hy bly egter die ekonomiese en kulturele middelpunt van die Spaanse Nederlande, en later ook die Oostenrykse Nederlande. Tydens hierdie tydperk het die stad talle beroemde skilders opgelewer, onder wie Rubens, Jordaens en Teniers.

Besienswaardighede

• die katedraal wat skilderye van Peter Paul Rubens vertoon.
• die standbeeld van Rubens
• die standbeeld van keiser Pieter die Grote van Rusland
• stadhuis aan die Groot Mark
• Plantin-Moretus Museum
• Museum Mayer-Van Den Bergh
• Carolus Boromeuskerk
• Rockoxhuis ('n museum)
• Maagdenhuismuseum
• Koninklijk Museum voor Schone Kunsten Antwerpen
• Diamantmuseum

Distrikte

Die stad Antwerpen het nege distrikte. Hulle is:

• Antwerpen (distrik)
• Berchem
• Berendrecht-Zandvliet-Lillo
• Borgerhout
• Deurne
• Ekeren
• Hoboken
• Merksem
• Wilrijk

Geboortes

• Henry Van de Velde, argitek
• Marita de Sterck (1955), skrywer
• Willem Elsschot (Alfons De Ridder) (1882-1960), skrywer
• Wouter Van Bellingen (1972), politikus