Argentynse nasionale rugbyspan

in Wikipedia, die vrye ensiklopedie
Spring na: navigasie, soek
Argentinië
Argentynse Rugbyunie.svg
Unie Argentynse Rugbyunie
Bynaam(e) Los Pumas
Embleem Jaguar
Afrigter(s) Vlag van Argentinië Daniel Hourcade
Kaptein(s) Juan Martín Fernández Lobbe
Spankleure


Alt. kleure

Statistiek
Meeste toetse 87 Lisandro Arbizu
Meeste toetspunte 628 Felipe Contepomi
Meeste drieë 30 José María Núñez Piossek
Eerste internasionale wedstryd
Vlag van Argentinië Argentinië 3 - 28 Britse Leeus Vlag van Verenigde Koninkryk
(12 Junie 1910)
Grootste oorwinning
Vlag van Paraguay Paraguay 0 - 152 Argentinië Vlag van Argentinië
(1 Mei 2002)
Grootste nederlaag
Vlag van Nieu-Seeland Nieu-Seeland 93 - 8 Argentinië Vlag van Argentinië
(21 Junie 1997)
Wêreldbeker
Verskynings 7 (Eerste in 1987)
Beste uitslag Derde, 2007

Die Argentynse nasionale rugbyspan, met die bynaam los Pumas, is tans die top rugbyspan in Amerika. Die span wat in hemelblou en wit truie speel word bestuur deur die Argentynse Rugbyunie (UAR, van Spaans Unión Argentina de Rugby). Argentinië speel sedert 2012 jaarliks teen die Australiese rugbyspan, die Wallabies, die All Blacks van Nieu-Seeland en die Springbokke van Suid-Afrika in die Rugbykampioenskap (voorheen die Drienasiesreeks).

Argentinië se eerste internasionale rugbywedstryd was in 1910 teen 'n besoekende Britse Eilande-span. Die land word vandag as een van die wêreld se voorste rugbynasies beskou en het sover in elke Rugby Wêreldbeker wat sedert 1987 gehou is deelgeneem. Die Poemas se huidige kaptein is Juan Martín Fernández Lobbe en die huidige hoofafrigter is Daniel Hourcade.

Alhoewel rugby in Argentinië nie die gewildheid van sokker kan ewenaar nie, het die indrukwekkende resultate deur Los Pumas sedert die 1999 Rugby Wêreldbeker tot eksponensiële groei gelei in 'n tydperk waarin Argentinië onder moeilike ekonomiese omstandighede gebuk gegaan het. Argentinië het sedert sy verskyning op die internasionale toneel al vir verskeie verrassingsoorwinnings gesorg en is veral 'n gedugte teenstander wanneer die span tuis in Buenos Aires speel.

Geskiedenis[wysig]

Beginjare[wysig]

Die eerste rugbywedstryd in Argentinië is in 1873 gespeel nadat die spel na Argentinië ingevoer is deur Britse immigrante. In 1899 het vier klubs in Argentinië se hoofstad Buenos Aires bymekaargekom om die Río de la Plata-Rugbyvoetbalunie te vorm.

In 1910 het 'n span wat deur Oxford Universiteit bestuur is — wat as 'n Engelse nasionale span beskou is, alhoewel dit drie Skotse spelers ingesluit het — Argentinië besoek: die Argentyne het die span die "Gekombineerde Britte", ook bekend as 'n "Groot Brittanje XV", genoem. Argentinië se internasionale debuut was teen die span waarteen dit op 12 Julie met 3-28 in Buenos Aires verloor het.

In 1927 het die Britse Eilande na Argentinië gereis in 'n toer waarin die Leeus al nege wedstryde gewen het; die toer was egter finansieel suksesvol vir Argentynse rugby. Die nege wedstryde het vier toetse ingesluit wat Argentinië met altesaam meer as 30 punte verloor het. Al die wedstryde het in Buenos Aires plaasgevind.

Vyf jaar het verloop voor nog 'n internasionale span Argentinië sou besoek, naamlik Suid-Afrika se Junior Springbokke in 1932 wat 'n twee wedstryd reeks gespeel het. Argentinië het beide verloor.

In 1936 het die Britse Eilande Argentinië weer besoek en al tien hulle wedstryde gewen en slegs nege punte op die hele toer afgestaan. Slegs een toets is op die toer gespeel wat Argentinië 0-23 verloor het. Die volgende maand het die Argentynse span die land verlaat om hulle eerste toetse in 'n ander land te speel - teen Chili in Valparaiso. Argentinië het die eerste toetse 29-0 gewen. Die tweede toets is met 'n soortgelyke telling gewen. Twee jaar later het Argentinië as gasheer vir Chili opgetree wat gelei het tot 'n 30 punte oorwinning vir Argentinië.

Naoorlogse tydperk[wysig]

In die laat 1940's het 'n gekombineerde Oxford & Cambridge span Argentinië besoek. Die Argentynse span het beide wedstryde teen die Engelse span verloor. In 1949 het die belangrikste rugbynasie tot op daardie stadium die land besoek, Frankryk. Hoewel Argentinië weer beide toetse verloor het, was die tellings in albei gevalle baie naby aan mekaar.

Om die 1951 Pan-Amerikaanse Spele te herdenk, het Argentinië die eerste Suid-Amerikaanse toernooi in Buenos Aires met Chili, Uruguay en Brasilië as deelnemers gereël. Argentinië het die eerste toernooi oorheers en slegs Chili het 'n uitdaging verteenwoordig. Die Argentyne het egter wel 13-3 met Chili afgereken en Uruguay 62-0 en Brasilië 72-0 pak slae gegee om hulle leierskap in Suid-Amerikaanse rugby te onderstreep.

In 1952 het Argentinië 'n reeks teen 'n nie-toets Ierland XV in Buenos Aires gespeel. Argentinië het die eerste wedstryd met ses punte verloor maar in die tweede wedstryd daarin geslaag om 'n 3-3 gelykopuitslag te bewerkstellig. Dit was die eerste keer dat Argentinië 'n nederlaag teen 'n beduidende Europse span kon verhoed en dit is soos 'n oorwinning gevier.

Weens die Ierse toer kon die UAR nie bekostig om die jaar daarna gasheer vir 'n besoekende Oxford & Cambridge span te wees nie. In 1954 het Frankryk die land weer besoek. Soos in 1949 was Frankryk te sterk vir die Argentyne en het hulle 22-8 en 30-3 teen die Hane verloor.

In 1956 is Argentinië weer deur 'n Oxford & Cambridge span besoek waarteen hulle 25-6 en 11-3 verloor het. Dit is gevolg deur 'n 4-0 oorwinning oor Peru en 'n 50-3 oorwinning oor Uruguay voordat Argentinië vir die eerste keer teen Chili verloor het.

By die tweede Suid-Amerikaanse toernooi in 1958 het Argentinië 50-3 met Uruguay en 44-0 met Peru afgereken. Ten spyte van drinkery voor die wedstryd teen die gasheernasie, Chili het Argentinië met die louere weg gestap in 'n 14-0 oorwinning in Santiago.

In 1959 het die Junior Springbokke na Buenos Aires teruggekeer in 'n reeks waarin hulle beide wedstryde teen die nasionale span gewen het; 6-14 en 6-20.

Sestigs, sewentigs en tagtigs[wysig]

In 1960 het Frankryk Buenos Aires besoek vir 'n drie-wedstryd reeks teen Argentinië. Die gashere kon steeds nie daarin slaag om hulle eerste oorwinning oor die Franse te behaal nie met Frankryk wat al drie wedstryde gewen het; 37-3, 12-3 en 29-6.

Die jaar daarna het Argentinië weer hulle oorheersing in die kontinent tentoongestel deur die Suid-Amerikaanse toernooi wat in Montevideo gehou is te wen met oor winnings teen Brasilië (60-0), Uruguay (36-3) en Chili (11-3).

In 1964 is 'n nuwe weergawe van die Suid-Amerikaanse toernooi in San Pablo gehou wat weereens deur Argentinië gewen is met oorwinnings teen Uruguay (25-6), Brasilië (30-5) en Chili (30-8).

In die laat 1960's het die vier Britse Tuisunies begin om toere na Argentinië te onderneem. Nadat Wallis in beide toetse in Buenos Aires in 1967 gesukkel het, was dit duidelik dat dit moeilik sou wees om 'n toetsreeks in Argentinië te wen. Skotland het die land se volgende slagoffers geword toe die Poemas die eerste toets in 1968 gewen het. Die Skotte het egter daarin geslaag om die tweede toets twee weke later te wen.

Die eerste besoek wat die Argentynse nasionale span aan die anderkant van die Atlantiese Oseaan onderneem het was na Rhodesië en Suid-Afrika in 1965. Die span het daar die bynaam "Pumas" verkry toe 'n plaaslike joernalis, Rhodesië se Wackley Farmer, die jaguarembleem op die span se trui vir 'n poema misgis het in 'n artikel na 'n nederlaag teen 'n span van Salisbury. Na nederlae teen Salisbury en Noord-Transvaal het die span sy eerste oorwinning teen Wes-Transvaal behaal en ook daarin geslaag om Suidwes-Afrika Distrikte en die Suidelike Universiteite te klop. Die belangrikste resultaat was egter die span se eerste oorwinning (11-6) oor die Junior Springbokke. Die span is deur 'n reuseskare in Buenos Aires tuis verwelkom na 'n toer waarin hulle altesaam 11 oorwinnings behaal het, een gelykopuitslag behaal het en vier keer verloor het in die twee maande in Afrika.

'n Wedstryd is daarna gereël teen die Franse kampioene Section Paloise. Die wedstryd word egter onthou vir die oproer en wangedrag van beide spanne eerder as die Argentynse oorwinning. Hierna het Oxford & Cambridge opgedaag, 'n span wat die Poemas tot op daardie stadium nooit kon verslaan nie. Die eerste wedstryd het gelykop geëindig met 'n 19-19 telling en die tweede is deur die studente 9-3 gewen. 1965 het geëindig met 'n 23-11 oorwinning oor Chili.

In 1966, het die Gazelles in Argentinië aangekom. Die Gazelles was 'n soort Junior Springbokke B-span. Die Suid-Afrikaanse besoekers het weggestap met twee 9-3 en 20-15 oorwinnings.

In September 1967 het Argentinië opgetree as gashere vir die Suid-Amerikaanse Kampioenskap in Buenos Aires waarin hulle oorwinnings teen Uruguay (38-6) en Chili (18-0) behaal het.

Wallis het in 1968 in Buenos Aires aangekom en vir die eerste keer het die Poemas 'n reeksoorwinning teen 'n ander nasie behaal deur die eerste wedstryd 9-5 te wen en 9-9 gelykop te speel in die tweede wedstryd.

Die groot dekade van Argentynse rugby het tot 'n einde gekom met die aankoms van Skotland in 1969. In die eerste wedstryd het Argentinië 'n groot oorwinning van 20-3 behaal, maar in die tweede het die besoekers 6-3 gewen.

In die vroeë 1980s is die Suid-Amerikaanse Jaguars gevorm. Die span is oorheers deur Argentynse spelers wat agt wedstryde teen die Springbokke gespeel het insluitend 'n oorwinning in Bloemfontein in 1982.

Laat twintigste eeu[wysig]

Vanaf die laat sewentigs tot die vroeë negentigs het Argentinië nooit twee wedstryde van 'n reeks wat in Buenos Aires gehou is verloor nie in 'n tydeperk wat wedstryde teen Frankryk, Engeland, Australië en 'n 21-21 gelykopuitslag teen die All Blacks ingesluit het. Die Gelykop uitslag teen die All Blacks word as waarskynlik die belangrikste resultaat ooit deur die Poemas gesien en is behaal deur briljante spel deur Hugo Porta wat al Argentinië se punte behaal het.

Teen die eerste Rugby Wêreldbeker in 1987 in Australië en Nieu-Seeland gehou is was Argentinië vol selfvertroue dat hulle ten minste die kwarteindstryd sou haal. 'n Onverwagte nederlaag teen Wes-Samoa het die span egter daarvan verhoed om na die uitklopstadium deur te dring.

In die jare wat daarop gevolg het, het baie van Argentinië se beste spelers afgetree. Baie spelers het ook oorsee professionele rugby gaan speel - in Argentinië is rugby steeds grootliks 'n amateursport en op daardie stadium het die UAR se regulasies spelers wat enigsins professioneel gespeel het, verhoed om vir hulle land te speel. Hierdie faktore het Argentinië met 'n span sonder veel ondervinding gelaat wat gelei het tot teleurstellende vertonings in die Rugbywêreldbeker 1991 en 1995. In laasgenoemde het Argentinië egter 'n kragtige voorspelerpak gehad wat deur die internasionale media geprys is. Argentinië se vaskopstut Patricio Noriega, en haker Federico Mendez het na die toernooi onderskeidelik in Australië en Suid-Afrika gaan speel. Noriega het selfs daarin geslaag om vir die Wallabies te speel.

In 1999 het 'n span met meer ondervinding en 'n effens onderskatte Argentinië daarin geslaag om tot die kwarteindronde van die Rugbywêreldbeker 1999 deur te dring na 'n briljante oorwinning van 28-24 teen Ierland. Die span is deur Frankryk uitgeskakel in 'n 28-47 nederlaag.

Die nuwe millennium[wysig]

Die Poemas tydens hulle November 2006 oorwinning oor Engeland op Twickenham

In April 2000 is Marcelo Loffreda aangestel as afrigter van Argentinië.

Argentinië kon nie na die 2003 Wêreldbeker-kwarteindstryd deurdring nie weens 'n 15-16 nederlaag teen Ierland in 'n naelbytwedstryd. In die toernooi moes Argentinië vier wedstryde in twee weke speel terwyl Ierland dieselde getal wedstryde oor vier weke kon speel. Daar is in sommige kringe gevoel dat Ierland, as 'n belangrike rugbynasie nie 'n soortgelyke skedule sou aanvaar nie en dat dit 'n rol gespeel het in die uitslag.

Sedertdien het die span goed gespeel met oorwinnings oor Wallis in Junie 2004 in Argentinië. Die Poemas het die heersende Sesnasieskampioen Frankryk 24-14 verslaan in November 2004 in Marseille, waar Frankryk nooit te vore verloor het nie. Later op dieselde toer het hulle 21-19 teen Ierland verloor na 'n skepskop deur Ierland in die doodsnikke van die wedstryd. Na hulle terugkeer na Argentinië het die Poemas egter 39-7 verloor teen die besoekende Springbokke, 'n span teen wie hulle nog nooit kon wen nie.

In een van Argentinië se beste vertonings die afgelope aantal jare het die Poemas op 23 Mei 2005 in Cardiff teen die Britse en Ierse Leeus gespeel voor die span op 'n toer na Nieu-Seeland vertrek het. Die Poemas was gedwonge om 'n span te kies wat bestaan het uit tweede en derde keuse spelers (stut Mauricio Reggiardo, wat later speler van die wedstryd was, moes weer vir die Poemas uitdraf nadat hy reeds uit rugby getree het) aangesien 25 spelers weens klubverpligtinge nie beskikbaar was nie. Goeie spel deur die Poemas en lustelose spel deur die Leeus het byna 'n historiese oorwinning aan die Suid-Amerikaners besorg. Slegs 'n strafskop deur Jonny Wilkinson in beseringstyd het die Leeus 'n 25-25 gelykopuitslag besorg.

Toe die Springbokke in November van dieselfde jaar na Argentinië terugekeer het, het hulle te staan gekom teen 'n baie sterker Poemaspan met meeste van die land se Europees-gebasseerde spelers teenwoordig. Die Poemas het teen halftyd 20-16 voorgeloop by die Vélez Sársfieldstadion. Hoewel hulle in die tweede helfte teruggesak het, is hulle nie verneder nie, met 'n uiteindelike telling van 34-23 ten gunste van Suid-Afrika. Die volgende week het die Poemas na Murrayfield gereis om teen Skotland te speel waar hulle in 'n taai wedstryd 23-19 geseëvier het. Dit was die vyfde agtereenvolgende oorwinning van Los Pumas oor Skotland sedert 1990. Hulle het die week daarna nog 'n Sesnasies-slagoffer geëis toe hulle Italië met 39-22 in Genoa geklop het.

In die middel-van-die-jaar toetse van 2006 het Argentinië 'n span van Wallis vir 'n toer van twee toetse verwelkom. Los Pumas het die reeks gewen, hulle eerste reeksoorwinning oor Wallis. Die Walliese se span het egter slegs twee van hulle eerstekeuse spelers ingesluit. Meeste van die Walliese spelers was A-span en onder-21 spelers aangesien meer as 20 Walliese spelers onbeskikbaar of beseer was. Die eerste toets op 11 Junie is net-net 27-25 deur die Argentyne gewen. Dit was histories belangrik aangesien dit die eerste Argentynse toets was wat in Patagonië gespeel is. Die besoekers is hartelik ontvang deur die gemeenskap in Puerto Madryn, een van die groter dorpe in 'n omgewing wat in die 1860's deur Walliese setlaars bevolk is en waar Wallies nog gereeld gepraat word. In die tweede toets op Vélez Sársfield op 17 Junie het die Poemas 45-13 voorgeloop voor die Walliesers twee drieë kon druk om die tellingverskil na 45-27 te laat krimp. Wallis se swak gedissipline en gebrek aan ondervinding was bydraende faktore in die span se reeksnederlaag.[1] Los Pumas het vervolgens teen een van die wêreld se voorste spanne, die All Blacks, op Vélez Sársfield gespeel in 'n wedstryd wat hulle 25-19 verloor het, maar waar die All Blacks hard moes werk om 'n kragtige aanslag op hul doellyn af te weer.

2007 Rugby Wêreldbeker[wysig]

Argentinië se Corleto op pad om 'n drie te druk in die openingswedstryd waar die span verras het met 'n oorwinning oor Frankryk

Op 9 Julie 2006 het Argentinië Uruguay 26-0 verslaan in 'n Rondte 3a wedstryd tydens die 2007 Rugby Wêreldbeker se Amerikaanse kwalifisering. Na hulle tweede oorwinning het Argentinië in dié stadium die eerste plek in die Amerika's ingeneem om in Poel D te speel saam met die gasheer Frankryk en hulle ou Wêreldbeker-teenstanders Ierland.

Los Pumas is deur die Belgiese Rugby Federasie genooi om hulle plaaslike wedstryde daar te speel ingeval hulle vir 'n jaarlikse plaaslike kompetisie aanvaar sou word.[1] Kort daarna het hulle ook uitnodigings van Spanje, Switserland, Frankryk en Portugal ontvang.[2]

In tussentyd het die Londonse Sunday Times in Februarie 2007 berig dat die IRB in onderhandelinge gewikkel was met SANZAR (die liggaam wat die Drienasiesreeks reël) om Los Pumas so vroeg as 2008 tot die Suidelike-Halfrond toernooi toe te laat. Weens logistieke oorwegings, spesifiek die lang afstand tussen Argentinië en Europa asook die groot aantal rugbywedstryde in die Noordelike Halfrond, was die Ses-Nasies nie geneë was om Argentinië ook toe te laat nie. Die IRB was oënskynlik oortuig dat die Drie-Nasies die regte plek vir 'n Suidelike Halfrond span was en is ook deur Suid-Afrika ondersteun in die mening. Australië sou glo ook nie gekant wees teen die aanpassing nie. Die grootste struikelblok was egter die UAR self met 'n aantal lede het wat erg geheg is aan amateurisme."[3]

Los Pumas het hulle finale voorbereiding vir die 2007 Rugby Wêreldbeker afgeskop met 'n reeks van twee toetse teen 'n besoekende Ierse span, wat saam met hulle en Frankryk in Poel D sou speel. In die eerste toets op 26 Mei 2007 op Santa Fe het hulle 'n 22-20 oorwinning beklink met 'n skepskop deur Felipe Contepomi in die laaste minuut van die wedstryd. Beide spanne het baie eksperimentele rugby gespeel met Ierse sterre soos Brian O'Driscoll, Ronan O'Gara, Paul O'Connell en Gordon D'Arcy wat uit die toerspan gelaat is en die Poemas by wie baie sterre ontbreek het wat dié naweek in die finale rondte van die Top 14 seesoen in Frankryk moes speel.[4][5] Die tweede toets teen Ierland was 'n 16-0 Poemas oorwinning te Vélez Sársfield op 2 Junie.[6] Op 9 Junie het Los Pumas hulle middel-van-die-jaartoetse begin met 'n 24-6 oorwinning oor Italië in Mendoza. Hulle het hul opwarmingstoetse afgesluit met 'n 70-14 oorwinning oor buurland Chili by Club Atlético San Isidro in Buenos Aires op 4 Augustus; en 'n 27-20 nederlaag teen Wallis in die Millennium Stadion op 18 Augustus.

By die Wêreldbeker was Los Pumas geloot om in die sogenaamde "doodspoel" te speel wat twee ander sterk spanne ingesluit het wat in die boonste ses op die IRB se Wêreldranglys verskyn het, Ierland en die gasheerland Frankryk. Verder was hulle eerste wedstryd die openingswedstryd teen die gasheer by die Stade de France, die derde keer na mekaar dat hulle in 'n Wêreldbeker-openingswedstryd speel. Teen alle verwagting in het hulle daarin geslaag om die wedstrydgunstelinge 17-12 te klop.

Rekord[wysig]

Argentinië se plek op die IRB Wêreldranglys van 10 Oktober 2003 tot 11 Junie 2012.

Argentinië het tot dusver 161 van hulle 270 toetswedstryde gewen, 'n wenrekord van 59.63%.[7][8] Toe die IRB se Wêreldranglys in Oktober 2003 ingevoer is, was Argentinië sewende op die lys. Hulle het in Junie 2004 na agtse plek teruggesak voor hulle in November weer na sewende plek gestyg het. Hulle het in Februarie 2005 weer teruggesak na agtste plek voor hulle laagste rang, negende, bereik het in Februarie 2006. Sedertdien het die span tot agtste plek in Julie 2006 gestyg en tot sesde plek in November 2006. Hulle het die plek sedertdien behou met die uitsondering van 'n enkele week waar hulle tot sewende plek gedaal het en 'n week waar hulle die vyfde plek bereik het.[9]

Die span se toetsrekord teen alle nasies:[7]

Teen Gespeel Wen Verloor gelykop  % Wen
Australië 17 4 12 1 23.53
Brasilië 11 11 0 0 100.00
Britse en Ierse Leeus 7 0 6 1 0.00
Kanada 8 6 2 0 75.00
Chili 27 27 0 0 100.00
Engeland 13 3 9 1 23.08
Fidji 4 3 1 0 75.00
Frankryk 39 8 30 1 20.51
Ierland 9 4 5 0 44.44
Italië 14 9 4 1 64.29
Japan 5 4 1 0 80.00
Namibië 1 1 0 0 100.00
Nieu-Seeland 13 0 12 1 0.00
Paraguay 16 16 0 0 100.00
Peru 1 1 0 0 100.00
Roemenië 7 7 0 0 100.00
Samoa 4 1 3 0 25.00
Skotland 6 5 1 0 83.33
Suid-Afrika 11 0 11 0 0.00
Spanje 4 4 0 0 100.00
VSA 9 9 0 0 100.00
Uruguay 30 30 0 0 100.00
Venezuela 1 1 0 0 100.00
Wallis 10 4 6 0 40.00
Wêreld XV 3 3 0 0 100.00
Totaal 270 161 103 6 59.63

Die Rugbykampioenskap (sedert 2012)[wysig]

Land Wedstryde Punte Bonus
punte
Tabel
punte
Kampioen-
skappe
gespeel gewen gelykop verloor     vir         teen         verskil    
Vlag van Nieu-Seeland Nieu-Seeland 18 16 1 1 543 272 +271 10 76 3
Vlag van Suid-Afrika Suid-Afrika 18 10 1 7 457 336 +121 8 50 0
Vlag van Australië Australië 18 6 1 10 349 467 −118 2 32 0
Vlag van Argentinië Argentinië 18 1 1 16 273 547 −274 7 13 0

Bygewerk op 5 Oktober 2014
Bron: espnscrum.com


Verwysings[wysig]

  1. Oferta para ser local en Bélgica
  2. A la UAR le llueven ofertas para la concentración de Los Pumas previa al Mundial
  3. Cain, Nick (2007-02-25). “Ambitious Argentina poised to secure TriNations place”. The Sunday Times. URL besoek op 2007-02-26.
  4. First Test Preview: Argentina v Ireland”. Irish Rugby Football Union: 2007-05-25. URL besoek op 2007-05-26.
  5. Argentina 22-20 Ireland”. BBC: 2007-05-26. URL besoek op 2007-05-26.
  6. Argentina 16-0 Ireland”. BBC: 2007-06-02. URL besoek op 2007-06-02.
  7. 7,0 7,1 Argentina > Head to Head Table”. rugbydata.com. URL besoek op 2007-08-29.
  8. Die rekord sluit wedstryde teen die Barbarians uit aangesien dit nie 'n verteenwoordigende span was nie.
  9. Die ranglys kan op die IRB webtuiste geraadpleeg word: www.irb.com

Eksterne skakels[wysig]

Commons-logo.svg
Wikimedia Commons het meer media verwant aan: