Aušra

in Wikipedia, die vrye ensiklopedie
Spring na: navigasie, soek
Die dubbeluitgawe nommer 10 en 11 wat in 1884 verskyn het

Aušra (vroeër ook Auszra, letterlik "Dagbreek") was die eerste Litause dagblad. Die eerste uitgawe het in 1883 in Ragnit (Litaus: Ragainė, tans Neman) in die streek Klein-Litaue in Oos-Pruise, Duitsland verskyn - in 'n tydperk toe die Tsaristiese owerheid in Rusland 'n verbod op die druk van Litause boeke en dagblaaie geplaas het. Hierdie periode tussen 1883 en 1904 word in Litaue die Aušros gadynė ("Tydperk van die Dagbreek") genoem.

Alhoewel slegs veertig uitgawes van Aušra verskyn het en sy oplaag beperk was tot 1 000 eksemplare, het die dagblad 'n belangrike bydrae tot Litaue se nasionale hergeboorte gelewer en uiteindelik tot Litaue se onafhanklikwording in 1918 gelei.

Die dagblad is later in Tilsit (tans Sowjetsk in die Kaliningrad-oblast) uitgegee. Die publikasie is in 1886 onder druk van finansiële moeilikhede gestaak.