Barbara Hogan

in Wikipedia, die vrye ensiklopedie
Spring na: navigasie, soek
Barbara Anne Hogan

Minister van Openbare ondernemings
Ampstermyn
10 Mei 2009 – 31 Oktober 2010
President Jacob Zuma
Opgevolg deur Malusi Gigaba

Minister van Gesondheid
Ampstermyn
25 September 2008 – 10 Mei 2009
President Kgalema Motlanthe
Voorafgegaan deur Manto Tshabalala-Msimang
Opgevolg deur Aaron Motsoaledi
Ampstermyn
25 September 2008 – 10 Mei 2009

Persoonlike besonderhede
Geboorte 28 Februarie 1952
Politieke party African National Congress
Eggenoot/eggenote Ahmed Kathrada

Barbara Hogan is 'n Suid-Afrikaanse politikus wat vanaf 25 September 2008 tot 10 Mei 2009 as minister van gesondheid in die kabinet van president Kgalema Motlanthe gedien het en vanaf 10 Mei 2009 tot 31 Oktober 2010 die minister van openbare ondernemings in die kabinet van president Jacob Zuma was.

Hogan het kort na die opstand in Soweto in Junie 1976 by die African National Congress aangesluit toe die organisasie reeds verbied en sy bedrywighede ondergronds beweeg het. Haar verantwoordelikheid was om die linksgesindes onder die wit bevolking te mobiliseer, aan openbare politieke veldtogte deel te neem en die ANC in Botswana van inligting te voorsien rakende vakbonde en gemeenskapsbedrywighede in Suid-Afrika. Hogan is in 1982 aangehou omdat sy die doelwitte van 'n verbode organisasie bevorder het en nadat sy ondervra, sleg behandel en 'n jaar lank in afgesonderde aanhouding aangehou is, is sy skuldig bevind aan hoogverraad en gevonnis tot 10 jaar gevangenisstraf.

Sy is in 1990 vrygelaat met die ontperking van verbode organisasies toe talle ander politieke gevangenes ook vrygelaat is, waarvan die bekendste Nelson Mandela was. Ná haar vrylating het Hogan 'n deurslaggewende rol gespeel in die omskepping van die ANC van vryheidsorganisasie tot politieke party in haar hoedanigheid as sekretaris van die streek wat tans as Gauteng bekend staan.

Hogan het minister van gesondheid geword op 25 September 2008 toe Kgalema Motlanthe Thabo Mbeki as staatspresident vervang het. Haar voorganger was Manto Tshabalala-Msimang.

Hogan is lid van die adviesraad van die Amandla Aids Fund (AAF), wat opgerig is deur die vereniging sonder winsoogmerk Artists for a New South Africa in 2003 met 'n skenking van $2,5 miljoen van Carlos en Deborah Santana. Dit was die hele opbrengs van die 2003 Summer Santana Shaman-toer in die VSA. AAF se adviesraad sluit talle vooraanstaande Suid-Afrikaanse vigskenners en -aktiviste in wat help met die kies van Suid-Afrikaanse organisasies en programme wat vir hulle befondsing in aanmerking sal kom. Die voorsitter is emeritus-aartsbiskop Desmond Tutu.

Bronne[wysig]