Bill Clinton

in Wikipedia, die vrye ensiklopedie
Bill Clinton
Bill Clinton
42ste President van die Verenigde State
Ampstermyn 20 Januarie 199320 Januarie 2001
Voorganger George H.W. Bush
Opvolger George W. Bush
Geboortedatum 19 Augustus 1946
Geboorteplek Hope, Arkansas
Sterftedatum
Sterfteplek
Eerste Dame Hillary Clinton
Politieke party Demokraat
Visepresident Al Gore
Handtekening

William Jefferson (Bill) Clinton (gebore William Jefferson Blythe III, 19 Augustus 1946)[1] het van 1993 tot 2001 as die 42ste President van die Verenigde State van Amerika gedien.[2] Hy was die derde jongste president, slegs Theodore Roosevelt en John F. Kennedy was jonger as hy toe hulle president geword het.

Harry Schwarz van Suid-Afrika besoek Bill Clinton in 1993

Clinton het aan die einde van die Koue Oorlog president geword. Omdat hy in die tydperk na die Tweede Wêreldoorlog gebore is, was hy die eerste Baby Boomer-president van Amerika.[3] Hy was vir die grootste deel van sy termyn gewild, hoofsaaklik omdat die Amerikaanse ekonomie toe sterk was. Sy reputasie het egter skade gely toe hy in 1998 ’n "onbehoorlike" verhouding met Monica Lewinsky, in 1995 ’n assistent in die Withuis, erken het.

Sy vrou, Hillary Rodham Clinton, was op 'n tyd die Amerikaanse Minister van Buitelandse Sake. Sy was ook op 'n tyd 'n senator van New York en 'n presidentskandidaat vir die Demokratiese Party in die Amerikaanse presidentsverkiesing van 2008.

Kinderjare[wysig | wysig bron]

Clinton se biologiese pa, William Jefferson Blythe Jr. (1918–1946), was 'n sakereisiger en het drie maande voor Bill se geboorte in 'n verkeersongeluk gesterf. Sy ma, Virginia Dell Cassidy (1923–1994), het verpleging in New Orleans studeer en haar seun agtergelaat by haar ouers Eldridge en Edith Cassidy, wat 'n algemene winkel in Hope bestuur het en 'n huis besit het (sedert 1997 'n museum).

In 1950 het Bill se ma teruggekeer van New Orleans en met Roger Clinton, 'n motorhandelaar van bedryf, getrou. Die gesin het in 1950 na Hot Springs verhuis. Op die ouderdom van 14 het Clinton, wat tot toe amptelik Bill Blythe genoem is, sy stiefpa se van aangeneem, hoewel sy ma onlangs van hom geskei is. In sy outobiografie van 2004 het Clinton geskryf dat sy stiefpa 'n dobbelaar en 'n alkoholis was en dat hy gereeld sy ma geslaan en sy halfbroer Roger Clinton kort-kort mishandel het. Clinton spreek sy dankbaarheid in dieselfde boek uit teenoor sy stiefpa en sy ryk broer wie geld bestee het aan sy studies by 'n goeie universiteit en ook gehelp het met sy eerste politieke veldtogte. Clinton het grootgeword as 'n lid van die Southern Baptist Convention en is 'n selferkende Baptis.

Opleiding[wysig | wysig bron]

Clinton het in 1968 'n driejarige universiteitsgraad aan die Georgetown Universiteit in internasionale aangeleenthede verwerf. Tydens sy laaste twee jaar op universiteit het hy deeltyds vir 'n Demokratiese verteenwoordiger en voorsitter van die kongreskomitee van Fayetteville, Arkansas, gewerk. Hy het toe aansoek gedoen vir 'n Rhodes-beurs, dit ontvang, en vir twee jaar by die Universiteit van Oxford in Engeland gaan studeer, waar hy verskeie kere van studierigting verander het. Vandaar het hy na Frankryk, die Federale Republiek van Duitsland en die Sowjetunie en 'n paar ander state gereis.

Ná sy terugkeer na die Verenigde State het hy betrokke geraak by 'n burgerregtebeweging wat hom beywer het vir 'n einde aan die Viëtnamoorlog. In 1973, na drie jaar se studie, het hy sy regsgraad aan die Ivy League Universiteit van Yale ontvang, waar hy ook sy toekomstige vrou, Hillary, ontmoet het. Hy was polities aktief tydens sy studies aan Yale en het met verkiesingsveldtogte gehelp ten gunste van verskeie demokratiese politici. Nadat hy sy Juris Doctor-graad verwerf het, het hy by die Universiteit van Arkansas aangesluit as 'n assistent-professor in regte. Na drie maande, het hy begin voorberei om te staan vir die verkiesing van die Arkansas Prokureur-generaal. Hiermee begin Clinton sy loopbaan in die politiek, waarin hy al sedert sy jongdae belang gestel het.

Militêre diens en Viëtnam-oorlog[wysig | wysig bron]

Later het politieke opponente hom dikwels daarvan beskuldig dat hy diensplig in Viëtnam vermy het deur in Engeland en Yale te gaan studeer. Clinton skryf op verskeie plekke in sy outobiografie dat hy gewetensbesware gehad het: Aan die een kant was hy 'n aktiewe teenstander van die Viëtnamoorlog, aan die ander kant wou hy, soos van sy medestudente, ook sy studies voltooi. Clinton het kortliks by die Reserweoffisieropleidingskorps aangesluit nadat hy van Engeland af teruggekeer het. Destyds het hierdie opleiding etlike jare geduur en die gegradueerdes moes eers met militêre diens begin nadat hulle hul offisiersopleiding voltooi het. Hy is later daarvan beskuldig dat hy probeer het om die aanvang van sy militêre diensplig te vertraag. Intussen het die behoefte aan troepe vir Viëtnam afgeneem, en verskeie Demokratiese politici was besig om hul te beywer vir 'n vertraging in Clinton se ontplooiing as soldaat in Viëtnam.

Verwysings[wysig | wysig bron]

  1. "Biography of William J. Clinton" (in Engels). The White House. Geargiveer vanaf die oorspronklike op 17 Januarie 2009. Besoek op 29 Oktober 2008.
  2. HAT Taal-en-feitegids, Pearson, Desember 2013, ISBN 978-1-77578-243-8
  3. Sandalow, Marc (14 Januarie 2001). "Clinton Era Marked by Scandal, Prosperity: 1st Baby Boomer in White House Changed Notions of Presidency" (in Engels). San Francisco Chronicle. Geargiveer vanaf die oorspronklike op 17 Mei 2012. Besoek op 29 Oktober 2008.

Eksterne skakels[wysig | wysig bron]