Blockland

in Wikipedia, die vrye ensiklopedie
Blockland
Stadsdeel
Die parogiekerk van Wasserhorst
Die parogiekerk van Wasserhorst
Ligging in Bremen
Ligging in Bremen
Koördinate: 53°8′35″N 8°48′22″O / 53.14306°N 8.80611°O / 53.14306; 8.80611Koördinate: 53°8′35″N 8°48′22″O / 53.14306°N 8.80611°O / 53.14306; 8.80611
LandVlag van Duitsland Duitsland
DeelstaatBremen
DistrikWest
Eerste verwysingtussen 1139 en 1299
Oppervlak
 • Totaal30,30 km2 (11,70 vk. myl)
Hoogte
1 m (3 ft)
Bevolking
 • Totaal415
 • Digtheid13,7/km2 (35/vk. myl)
TydsoneUTC+1:00 (MET)
 • SomertydUTC+2:00 (MEST)
Poskode
28357, 28719
Skakelkodes0421
Webwerfblockland.bremen.de

Blockland is 'n stadsdeel in die noorde van Bremen in Noord-Duitsland met 'n oppervlakte van 30,3 vierkante kilometer en 'n bevolking van 415 (soos op 31 Desember 2016). Dit maak deel uit van die administratiewe stadsdistrik Bremen-West.

Geografie en wyke[wysig | wysig bron]

Weiland in Blockland
'n Tradisionele plaashuis

Alhoewel Blockland amptelik as stadsdeel kwalifiseer, is dit eerder 'n dorp aan die noordelike stadsrand van Bremen met 95 geboue wat naas sy menslike bewoners ook 33 kleinskaalse en middelgroot melkboerderye met sowat 1 700 melkkoeie huisves.[1] Dit is een van verskeie landskapsgebiede binne die Bremense stadsgebied. Dit word in die noorde en weste begrens deur die benedelope van die Wümme- en Lesum-riviere, in die suidweste deur die sogenaamde Maschinenfleet, die federale snelweg A 27 en die Bremense Duin, en in die suidooste deur die Kuhgraben.

Blockland bestaan uit die voormalige dorpies en gehugte Bavendamm, Damme met Dammsiel, Hemme, Niederblockland, Oberblockland, Wasserhorst, Wemme en Wummensiede. Dit grens in die ooste aan die stadsdeel Horn-Lehe, in die suid-ooste aan Findorff, in die suide aan Walle en Gröpelingen, in die suide en weste aan Burglesum en die Nedersaksiese munisipaliteite Ritterhude in die noorde en Lilienthal in die noord-ooste.

Blockland het grotendeels 'n landelike karakter met uitgestrekte weivelde, drooggelegde moerasgebiede en boerderygebiede. Daar is ook 'n vullisterrein wat met 'n hoogte van 49 meter die hoogste (mensgemaakte) heuwel in die Bremense stadsgebied vorm.

Geskiedenis[wysig | wysig bron]

Die gebied is aanvanklik deur Germaanse jagters en vissers bewoon wat 'n vroeë nedersetting op die duin Wasserhorster Düne gestig het.

In die 10de eeu is die eerste paaie aan weerskante van die Kleine Wümme-rivier aangelê wat die omgewing met Blockland verbind het, maar eers vanaf 1113 het Nederlandse setlaars begin om dyke te bou. Gedurende die Nederlandse kolonisasie is talle slote gegrawe wat die gebied in lang, smal strokies land – sogenaamde blokke – verdeel het. Hiervan is die gebied se naam afgelei. In hierdie periode het ook die kerk in Wasserhorst ontstaan.

Die Wümme se rivierloop
'n Historiese waterversperring

Die eerste historiese verwysings na die vroeëre dorpe Hemme, Damme en Wemme kom in dokumente voor wat tussen 1139 en 1299 ontstaan het. Maar nog gedurende die Middeleeue is hierdie dorpies deur hul bewoners verlaat nadat die waterpeil as gevolg van die landbouontwikkeling sterk gestyg het. Slegs land digby die dyke was nou nog vir landboudoeleindes geskik.

In 1741 is Blockland by die Keurvorstedom Hannover ingesluit. Ná 1800 het die Wümme se rivierbed steeds verder gestyg sodat oorstromings 'n groot probleem geword het. Die plaaslike windaangedrewe waterpompe was nie meer in staat om die groot hoeveelhede water te handhaaf nie.

In 1803 is Blockland weer by Bremen ingesluit. In 1812 was die plaaslike bevolking 412. Met die opening van die eerste kroeg in Dammsiel het die bemannings van turfskepe op hulle vaart na Bremen en die omliggende gebiede hier tydens pouses aangelê.

In 1858 het die Bremiese Senaat 'n wet afgekondig wat die riolering van Blockland gereël het. Die rioleringsaanleg, wat in 1864 tussen Burg en Wasserhorst geopen is, het in sy tyd as die grootste en mees gesofistikeerde in Duitsland en Europa bekendheid verwerf. Gedurende die somermaande is daar geen oorstrominghs meer in Blockland aangeteken nie, terwyl die waterpeil op weivelde in die wintermaande nog slegs maksimaal 38 sentimeter beloop het.

Vanaf 1878 is 'n nuwe stelsel van munisipale dyke ingevoer waarvolgens dyke deur die gemeenskap onderhou moes word. In 1880/81 het die Wümmedyk tydens 'n stormvloed gebreek sodat die dyke langs die Weser- en Wümme-riviere nog eens versterk is.

In 1927 is 'n verbod op motors geplaas wat nog steeds van krag is. Met die insluiting by die stad Bremen in 1945 het Blockland se geskiedenis as selfstandige munisipaliteit geëindig. In 1966 het die bevolking van die stadsdeel Blockland op 654 te staan gekom.

In 1968 het die Arbeitskreis Blocklandforschung ("Werkkring Blockland-navorsing") met 'n grootskaalse botaniese ontleding in die gebied begin waartydens die Zwerglinse, die tot dusver kleinste bloeiende plant ter wêreld, ontdek is. In dieselfde jaar is die klein skool in Blockland gesluit. Een jaar later is die vullisstortingsterrein aan die grens tussen die Bremiese stadsdele Walle en Blockland geopen.

Die buitedykterrein langs die Wümme-rivier is in 1991 tot natuurbewaringsgebied verklaar. Blockland is in die 21ste eeu steeds 'n gewilde bestemming vir fietsryers, skaatsers en voetslaners.

Sakrale boukuns[wysig | wysig bron]

Die kerkdorp Wasserhorst is by die samevloeiing van die Hamme- en Wümmeriviere geleë. Die naam is afgelei van die klei heuwel met 'n hoogte van ses meter wat as beskerming teen oorstromings bied. Die klein kerk van die uitgestrekte parogie Blockland is meer as agthonderd jaar oud en kon vroeër deur sommige plaasbewoners slegs met bote of – in die winter – met ysskaatse bereik word. Die plaaslike Lutherse pastorin hou steeds twee keer per maand godsdiens.[2]

Verwysings[wysig | wysig bron]

  1. DreiStromLand. Ems • Weser • Elbe. Boekdeel 2. Hamburg: edition nordwest im Europa Verlag 2005, bl. 196
  2. DreiStromLand, boekdeel 2 (2005), bl. 196

Bronliteratuur

Eksterne skakels[wysig | wysig bron]