Boergondië

in Wikipedia, die vrye ensiklopedie
(Aangestuur vanaf Boergondiërs)
Spring na: navigasie, soek
Wapenskild van die tweede Hertogdom van Boergondië en later die Franse provinsie Boergondië

Boergondië (Frans: Bourgogne; Duits: Burgund) is 'n saggies golwende landskap in die hartland van die latere Frankiese Ryk wat sy naam aan die Boergondiërs te danke het, 'n Germaanse stam wat in die 5de eeu n.C. hul oorspronklike tuisland in Agter-Pommere aan die Oossee verlaat het om hulle in die vrugbare Saônevallei te vestig en hier hul eie koninkryk te stig. Die Boergondiese Koninkryk is in die 6de eeu deur die Franke verower.

Boergondië, wat oorspronklik deur Kelte en later deur 'n Gallo-Romeinse bevolking bewoon is, is later verdeel, waarby die westelike deel as Hertogdom van Boergondië (Frans: Duché de Bourgogne) en die oostelike deel as Graafskap van Boergondië (Frans: Comté de Bourgogne) voortbestaan het. Die Hertogdom van Boergondië is die bekendste van hierdie twee geweste. Die Hertogdom van Boergondië het in 1542 as die Generaliteit van Boergondië (Généralité de Bourgogne) 'n provinsie van Frankryk onder die Franse kroon geword, terwyl die Graafskap van Boergondië voortbestaan het as die provinsie Franche-Comté, letterlik vry graafskap.

Die historiese Boergondië strek tans oor twee staatsgebiede, dié van Frankryk en van Switserland. Die hedendaagse administratiewe gewes van Boergondië kom grootliks ooreen met die voormalige Hertogdom van Boergondië.

Vandag word in die streek nog talle oorblyfsels van die Romeinse beskawing asook talle kerke en katedrale in die Romaanse boustyl aangetref. Ná die verval van die Karolingiese Ryk het Boergondië in die 11de en 12de eeu 'n nuwe bloeitydperk beleef en gelykertyd met die monastiese hervormingsbeweging van Cluny en die stigting van die Cisterciënse-orde tot die sentrum van 'n geestelike vernuwing ontwikkel wat groot dele van Europa sou raak.

In die 15de eeu het Boergondië, waarby intussen ook 'n aantal aangrensende gebiede ingesluit is, onder hertog Filips die Goeie uit die huis van Valois, tot een van die welvarendste en magtigste state in Europa ontwikkel.