Borrie

in Wikipedia, die vrye ensiklopedie
Spring na: navigasie, soek
Borrie
Curcuma longa
Wetenskaplike klassifikasie
Koninkryk: Plantae
Divisie: Magnoliophyta
Klas: Liliopsida
Subklas: Zingiberidae
Orde: Zingiberales
Familie: Zingiberaceae
Genus: Curcuma
Spesie: C. longa
Binomiale naam
Curcuma longa
Linnaeus

Borrie is die gemaalde wortel van die Curcuma longa, wat aan die gemmerplant verwant is. Dit word in Nederland geelwortel of koenjit genoem, waar dit gebruik word vir Indonesiese geregte. Dit is 'n vaste bestanddeel van kerrie, waaraan dit die geel kleur verleen. Die spesery se smaak is mildelik bitter.

Herkoms van die woord[wysig]

Die Etimologiewoordeboek van Afrikaans (2003) sê dat die woord ontleen is aan die Maleise woord boreh, wat 'n borrie-gebaseerde geel smeersel vir die liggaam is. Die eerste optekening in vroeë Afrikaans was in 1685, o.a. in die vorme borry borry, boraij en borborry.

Herkoms van die spesery[wysig]

Die merendeel van die borrie-oes kom van Indië af.

Toepassings[wysig]

Borrie het 'n baie duidelike geur en moet daarom slegs gebruik word indien dit regtig in 'n bepaalde gereg hoort. Borrie is onmisbaar by die smaak en kleur van kerriegeregte en dit kleur die rys geel, soos dit gebruiklik is by bobotie.

Dit kan ook gebruik word as 'n kleurstof vir ink.

Papier wat in 'n oplossing met borrie deurweek en vervolgens gedroog is, word soms as 'n reagens gebruik om die aanwesigheid van 'n basis (alkali) aan te toon. Dit kry 'n bruinrooi kleur by die aanwesigheid van alkaliese stowwe. Die keerpunt is bereik by 'n pH van omtrent 8-9.


Gebruik in wondbehandeling en patentkwessie[wysig]

Borriepoeier

Borriepoeier word in Indië tradisioneel aangewend vir die behandeling van wondjies en skrape. In 1995 was daar egter 'n patent toegeken aan die Universiteit van Mississippi vir 'n wondbehandelingsmiddel gebaseer op borrie. Hierdie patent was die jaar daarna aangeveg deur die Indiese Council of Scientific & Industrial Research en ingetrek. Die rede hiervoor was egter nie die eeue-oue gebruik nie, maar die feit dat dié gebruik reeds vroeër beskryf was in 'n wetenskaplike tydskrif (Michael Hardt en Antonio Negri, Multitude, Hamish Hamilton; London, 2005).

Borrie teen Alzheimer se siekte[wysig]

Borrie word in Asië ook aangewend as geneesmiddel vir allerlei siektes, soos trombose en breinsiektes waaronder Alzheimer se siekte en Parkinson se siekte. Navorsing aan die Rhodes Universiteit in Grahamstad het die heilsame werking van die wortel bevestig en verklaar. Sheril Daniel het navorsing gedoen na kukurmien, een van die drie ontstekingsremmende stowwe wat baie in borrie voorkom. Hy het by rotte gekonstateer dat kukurmien die harsings beskerm teen beskadiging deur sianied, lood en kadmium. Die stof bind hom aan hierdie giftige verbindings voordat hulle skade kan toebring aan die brein. Daniel dink dat die veelvuldige gebruik van borrie in Indiese geregte die oorsaak daarvan is dat Alzheimer se siekte in Indië nouliks voorkom.

Eksterne skakels[wysig]