Boulevard der Stars
vanuit Wikipedia, die vrye ensiklopedie.
Die Boulevard der Stars is 'n steeds groeiende monument ter ere van bekende Duitse persoonlikhede uit die rolprent- en televisiebedryf. Die monument is naby die Berlynse plein Potsdamer Platz geleë en strek van Potsdamer Straße met sy ses rylane tot by Ben-Gurion-Straße. Voor enkele geboue is dit aan weerskante verbreed.
Die monument is volgens die voorbeeld van die Hollywood Walk of Fame in Los Angeles ontwerp en vereer bekende persoonlikhede met 'n ster. Die hoeksteen is op 5 Februarie 2010 ter geleentheid van die Berlinale 2010-filmfees gelê. Die eerste ster ter ere van Marlene Dietrich is op 12 Februarie aan die publiek vertoon. Toe die Boulevard op 10 September 2010 amptelik ingewy is, is 'n bykomende 39 sterre toegeken.[1]
