Burgersdorp
| Burgersdorp Burghersdorp |
|
 |
|
  Burgersdorp
|
|
 Burgersdorp
|
|
| Koördinate: | |
| Land |  Suid-Afrika |
|---|---|
| Provinsie | Oos-Kaap |
| Distriksmunisipaliteit | Joe Gqabi |
| Plaaslike Munisipaliteit | Gariep |
| Stigting | 1846 |
| Regering | |
| - Tipe | Plaaslike Munisipaliteit |
| Oppervlak | |
| - Stad | 27,17 km² (10,5 vk m) |
| Bevolking (2010) | |
| - Stad | 13 585 |
| Tydsone | SAST (UTC+2) |
Burgersdorp (vroeër gespel Burghersdorp) is 'n dorp in die Oos-Kaapse Middellande van groot geskiedkundige belang en vandag een van die mees vooruitstrewende dorpe in die Noordoos-Kaap en een van die min plattelandse dorpe wat in stand gehou word.[1]
Inhoud |
Ontstaan [wysig]
Die dorp is aan die Stormbergspruit geleë, 359 km noordwes van Oos-Londen. Dit is oorspronklik op die plaas Klipfontein, wat op 27 Desember 1847 deur ene Gert Buytendach gekoop is, aangelê. Dit is so genoem ter ere van burgers wat diens gedoen het tydens die Sewende Grensoorlog van 1846 tot 1847, of moontlik omdat die burgers dit op hulself geneem het om die dorpie tot stand te bring en nie op die kerk of staat gewag het nie.
In 1869 is 'n Teologiese Seminarium hier tot stand gebring deur die Gereformeerde Kerke van Suid-Afrika met prof. Dirk Postma as die eerste rektor. Hy was ook die eerste leraar van die Gereformeerde kerk Burgersdorp, wat op 21 Januarie 1860 in die pakhuis van 'n winkel gestig is omdat daar groot teenkanting was teen die skeuring in die Kaapse Kerk. Dié teologiese skool het in 1905 na Potchefstroom verskuif , om in 1951 (as die PUK) die Potchefstroomse Universiteit vir Christelike Hoër Onderwys (PU vir CHO) te word. Weens die dorp se belangrikheid in die vroeë stryd om die erkenning van die Nederlandse taal, is hier 'n Taalmonument in 1893 opgerig. Tydens die Tweede Vryheidsoorlog was daar heelwat gevegte in die omgewing. Hier is 'n goed bewaarde blokhuis, wat bekend staan as die Brandwag, wat in die oorlog deur die Britte gebou is. Nog 'n gedenkwaardigheid is die ou tronk. Die teologiese skool is gerestoureer en tot gedenkwaardigheid verklaar.
Hede [wysig]
Vandag is Burgersdorp die administratiewe en handelsentrum van 'n distrik waar met wol en vee geboer word.
Dit is ook een van die grootste spoorwegaansluitings tussen Oos-Londen en Bloemfontein.
Burgersdorp het 'n goed-funksionerende provinsiale hospitaal[2].
Ontspanning [wysig]
Burgersdorp is wyd bekend vir sy uitstekende sportgeriewe met onder meer Shortenpark waar tennis, rolbal, jukskei, atletiek, krieket en swem beoefen kan word. Daar is ook 'n pretpark. Die Danie Craven-stadion met een van die beste rugbyvelde in die land bied sitplek aan 6 000 toeskouers. Die nege-putjie-gholfbaan het van die beste grassetperke in dié deel van die land.
Bekende boorlinge [wysig]
- Eben Venter, Afrikaanse skrywer
- Karin Hougaard, Afrikaanse sangeres
- Dawie de Villiers, Suid-Afrikaanse kabinetsminister, ambassadeur en Springbok-rugbykaptein
- sen. Jan de Klerk, kabinetsminister
- Johan Goosen, Vrystaatse rugbyspeler[3]
- Johannes Erasmus, prokureur en Afrikaanse skrywer
- William Fehr, kuns- en oudhede-versamelaar en sakeman
- ds. Willem Postma, predikant in die Gereformeerde Kerke in Suid-Afrika en skrywer onder die skuilnaam Dr. O'Kulis
- Rikie Postma, skrywer van Afrikaanse kinderboeke
- Hilda Postma, skrywer van Afrikaanse kindergedigte
- Hendre Fourie, rugbyspeler vir Engeland[4]
Foto's [wysig]
-
Die Brandwagblokhuis.
-
NG Kerk in Burgersdorp.
-
Die replika (links) en oorspronklike (regs) Nederlandse Taalmonument.
-
Die Gereformeerde kerkgebou op Burgersdorp.
-
Die Gereformeerde kerk op die voorgrond en die kerkgebou van die NG gemeente Burgersdorp troon uit bo die omringende geboue in Burgersdorp se middedorp.
-
Burgersdorp se stadsaal soos hy in 2012 daar uitgesien het. Dit is omstreeks 1962 voltooi.
Sien ook [wysig]
Bronne [wysig]
- Raper, P.E., Dictionary of South African Place Names, Lowry Publishers, Johannesburg, 1987.
- Rosenthal, Eric, Encyclopaedia of Southern Africa, Juta and Company Limited, Kaapstad en Johannesburg, 1978.
- Kelly, Maureen, Amptelike Suid-Afrikaanse Munisipale Jaarboek, HELM Publikasies, Johannesburg, 1986.
- Du Toit, prof. dr. S. du Toit. Handleiding vir die studie van die kerkgeskiedenis. Potchefstroom: Pro Rege-Pers Beperk, 1955.
Eksterne skakels [wysig]
- Dorp se webblad
- Laerskool Burgersdorp se webtuiste
- Foto's van die gebou van die eertydse Teologiese Skool
- My tante, my paspoort deur Eben Venter Volksblad, 10 September 2010
- Klein dood in die Dopperkerk deur Eben Venter Volksblad, 9 September 2009
- Burgersdorp is 'n pêrel in bitter tye deur Annelie Botes Volksblad, 26 Maart 2012
Verwysings [wysig]
- ↑ Burgersdorp is 'n pêrel in bitter tye deur Annelie Botes Volksblad, 26 Maart 2012
- ↑ Burgersdorp Hospitaal op Oos-Kaapse Dept. Gesondheid se webblad
- ↑ Al die aandag is hel, vertel Goose blosend Volksblad, 29 September 2012
- ↑ Former England flanker Fourie is being deported after suffering career-ending injury, Daily Mail
