Bybelmonument

in Wikipedia, die vrye ensiklopedie
Jacobus Uys se ontvangs van die Bybel word ook op die tweede paneel van die marmerfries in die Voortrekkermonument uitgebeeld. Die Bybel wat die hele trek in die wakis meegemaak het, kan vandag nog by die Voortrekkermonument besigtig word. Die model vir die figuur regs was Oumatjie Stoffberg.

Die Bybelmonument in Grahamstad herdenk die goeie verhoudinge wat daar geheers het tussen die Britse setlaars en die grensboere.

In April 1837 het 'n geselskap Voortrekkers onder Jacobus Uys op 'n uitspanning by Grahamstad oorgestaan op pad om die Kaapkolonie te verlaat. 'n Groep van 100 Engelssprekende inwoners onder leiding van William Rowland Thompson en Thomas Philipps het die trekkers daar besoek en 'n Nederlandse Bybel as afskeidsgeskenk aan hulle oorhandig.[1]

Die monument staan op die plek van die destydse uitspanning en bestaan uit twee klipmure in die vorm van 'n regopstaande geopende Bybel. En die geopende teks wys in die trekrigting. Leonard William Thornton-White was die argitek. Ivan Mitford-Barberton was verantwoordelik vir die beeldhouwerk op die twee bronsplate. Op een plaat is die drie Setlaarleiers uitgebeeld en op die ander staan Uys, sy vrou en hul seun Piet.

Hierdie monument is op 17 Desember 1962 onthul deur staatspresident C.R. Swart. Dr. D. Dugmore van die Metodiste kerk en dr. A.J. van der Merwe van die N.G. kerk het ook by die geleentheid opgetree. Die monument lê in Strowanweg, aan die noordwestekant van die stad.

Bibliografie[wysig | wysig bron]

Verwysing[wysig | wysig bron]

 

Koördinate: 33°17′54″S 26°29′52″O / 33.29833°S 26.49778°O / -33.29833; 26.49778

  1. Rankin, Elizabeth; Schneider, Rolf Michael (2020). From Memory to Marble: The historical frieze of the Voortrekker Monument, Part II: The Scenes (PDF). Berlyn/Boston: Walter de Gruyter GmbH. pp. 25–43. ISBN 978-3-11-061524-1. Besoek op 5 Julie 2023.