Cannes

in Wikipedia, die vrye ensiklopedie
Ville de Cannes

Cano / Canas
Stad
Uitsig oor Le Suquet, die historiese middestad van Cannes
Uitsig oor Le Suquet, die historiese middestad van Cannes
Wapen van Ville de Cannes
Wapen
Ville de Cannes is in Frankryk
Ville de Cannes
Ville de Cannes
Koördinate: 43°33′05″N 7°00′46″O / 43.55139°N 7.01278°O / 43.55139; 7.01278Koördinate: 43°33′05″N 7°00′46″O / 43.55139°N 7.01278°O / 43.55139; 7.01278
LandVlag van Frankryk Frankryk
Gewes Provence-Alpes-Côte d'Azur
Département Alpes-Maritimes
ArrondissementGrasse
KantonCannes-Centre, Cannes-Est, Mandelieu-Cannes-Ouest
Stigting2de eeu v.C.
Regering
 • BurgemeesterDavid Lisnard
Oppervlak
 • Totaal19,62 km2 (7,58 vk. myl)
Hoogte
0–260 m (0–850 ft)
Bevolking
 • Totaal73 325
 • Digtheid3 740/km2 (9 700/vk. myl)
Poskode
06400, 06150
Skakelkodes06029
Webwerfcannes.com
Jagte in die Baie de Cannes, met 'n ultramoderne seiljag aan die regterkant

Cannes (Oksitaans-Provençaals Cano of Canas; Franse uitspraak: [kan], in die plaaslike dialek: [ˈkanə]) is 'n stad en munisipaliteit (commune) aan die Middellandse See in die suide van Frankryk. Die stad het sowat 73 000 inwoners wat in Frans Cannois genoem word en ressorteer onder die département Alpes-Maritimes (Suid-Frankryk). Dit lê aan die Côte d'Azur, die gewildste kusstreek van die land met talle vakansieoorde. Cannes staan veral bekend vir sy Internasionale Rolprentfees wat jaarliks in Mei plaasvind.[1]

Ander belangrike jaarlikse skoue en feeste sluit die Cannes Lions International Festival of Creativity, 'n vergadering van die internasionale advertensiebedryf; die musiekhandelskou MIDEM in Junie; die internasionale bootskou Yachting Festival Cannes (voorheen bekend as Festival International de la Plaisance) wat sedert 1977 jaarliks in September gehou word; die motorskou Salon d’Automobile en die fees van vuurwerkkuns Festival d’Art Pyrotechnique, wat 200 000 besoekers lok, in.

Geskiedenis[wysig | wysig bron]

Die Franse woord "Cannes" beteken "riete" in Afrikaans. In die gebied, wat deur moeras en riet oorheers word, het die Romeine 'n vesting op die huidige Mont Chevalier opgerig wat hulle Castellum Marsellinum genoem het.

Uitsig oor Cannes, soos gesien vanuit La Castre

Omtrent 410 het die heilige Honoratus, die seun van 'n Romeinse amptenaar uit die stad Trier, 'n klooster gestig op St. Honorat, een van die Leriniese Eilande langs die kus van Cannes. Die abdy, wat as Lérins bekend staan, het in die vroeë Middeleeue tot 'n beroemde sentrum van die Latynse kultuur en 'n belangrike instelling vir die onderwys van 'n aantal bekende sendelinge ontwikkel. In 660 het die klooster die Benediktynse ordereëls aanvaar. Die kloostereiland is in 732 deur Arabiere verower, en vervolgens het die monnike die eiland verlaat. Die abdy is in die 10de eeu herstel.

In die 11de eeu het 'n klein visserdorpie met 'n madonnakapel in die plaaslike duine bestaan.

Vanaf die Middeleeue tot in die vroeë dertigerjare van die 19de eeu was Cannes niks meer as 'n klein visserdorp nie. Die voormalige Britse minister van Finansies en Ekonomiese Sake, Lord Henry Peter Brougham (1778–1868), was die eerste bekende persoonlikheid wat hom in 1834 in die dorp gevestig het. Kort voor lank het ook Franse en buitelandse adellikes aangetrokke gevoel tot die natuurskoon van die omgewing en hier hulle vakansiehuise opgerig. In 1868 het die Croisette, die bekende kuslaan van Cannes, ontstaan, en twee jaar later was daar reeds 215 villa's en 34 hotelle. Vanaf 1912 het luukse hotelle langs die laan hul deure vir welgestelde toeriste.

Die stad is vandag nog steeds 'n gewilde kuierplek vir bekende en welvarende persoonlikhede. Die Internasionale Rolprentfees word sedert 1946 gehou.

Besienswaardighede[wysig | wysig bron]

  • Die Hotel Carlton, 'n spierwit gebou langs die boulevard de la Croisette, word kort voor die Eerste Wêreldoorlog opgerig en dien aanvanklik as 'n hospitaal. In 1922 vind hier 'n vredeskonferensie plaas. Maar dit staan veral bekend as die plek waar in 1954 Alfred Hitchcock se rolprent "To Catch A Thief" ontstaan, en hier ontmoet die Amerikaanse rolprentster Grace Kelly vir die eerste keer haar toekomstige eggenoot vors Rainier III van Monaco.
  • St. Honorat se huidige abdy ontstaan in die 19de eeu; sedert 1869 is dit 'n klooster van die Cisterciënser-orde. Die abdy en eiland bekoor met sy olyfbome, wingerde en laventelbosse.
  • Die eiland Ste. Marguerite staan bekend vir sy bosse met eucalyptus, seeden en denneboom. Die wandelpaaie op die eiland behandel verskeie ekologies-botaniese onderwerpe. Die ou vesting, wat in die 17de eeu deur die Franse boumeester Vauban versterk is, dien sedert 1737 'n staatsgevangenis.
  • Die Musée de la Castre, 'n volkskundemuseum, bied as toegif 'n pragtige uitsig oor die hawe, die blou see en die eilande langs die kus.

Verwysings[wysig | wysig bron]

  1. HAT Taal-en-feitegids, Pearson, Desember 2013, ISBN 978-1-77578-243-8

Eksterne skakels[wysig | wysig bron]

Bootskoue