Chaîne des Rôtisseurs

in Wikipedia, die vrye ensiklopedie
Spring na: navigasie, soek

Die Chaîne des Rôtisseurs (Afrikaans: Gilde van Spitbraaiers) is 'n internasionale broederskap (Frans: confrèrie) van eersterangse sjefs en fynproewers met 'n eeue-lank tradisie. Die organisasie bevorder die verfynde Franse kookkuns en lewensstyl.

Vandag is daar nasionale bailliages (takke) in 123 lande met 80 000 lede, wat persoonlikhede uit die politieke, ekonomiese en kulturele lewe insluit. Die lede van die nasionale fakulteite vergader twee keer per jaar vir hulle sogenaamde nasionale en internasionale Grand Chapitre, 'n feesete met soms ag gange in vier- of vyfster-restourante wat sowat vier ure duur. Hierby tree die verskillende nasionale bailliages (streektakke) as gasheer op. Daarnaas vind sowat tien keer per jaar kleiner etes plaas, die sogenaamde Dîners Amicals.

Die organisasie en vergaderings staan in die diens van die internasionale vriendskap, en die Grand Chapitres en Dîners Amicals is ook steeds 'n geleentheid waarby die feesgangers kennis met die plaaslike kookkuns en kulturele lewe wil maak. Tydens die Grands Chapitres word nuwe lede verwelkom.


Geskiedenis[wysig]

In Frankryk word die verfynde kookkuns reeds in die Middeleeue as een van die pilare van die beskawing beskou. Koning Lodewyk IX die Heilige verleen aan die beste kokke van die land in 1248 die reg om hulle in 'n eie broederskap saam te sluit. Die Chaîne des Rôtisseurs is oorspronklik die Franse gilde van die spitbraaiers. 'n Kok, wat die kuns beheers om die beste vleis aan die spit oor die ope vuur à point (perfek) te braai, word in die tyd besonder hoog geag.

Die aantal lede is in die Middeleeue streng beperk, en nuwe lede is eers na jare se "diens" toegelaat. Aan die hoof van 'n streektak staan die sogenaamde bailli, en slegs lede wat besonder goed presteer, is binne die hierargie van die broederskap bevorder.

Parys is destyds die setel van die Grand Bailli en die Grand Chancelier, wat aan die koningshof die rang van ambasseurs beklee. Die vaste reëls en 'n passie vir volmaaktheid verseker dat die broederskap eeue lank bestaan. Eers tydens die Franse Rewolusie van 1789 is die vereniging ontbind.

Na die Tweede Wêreldoorlog met al sy ontberings besluit vyf bekende persoonlikhede - die fynproewers Maurice Edmond Sailland (beter bekend onder sy kunstenaarsnaam "Curnonsky"), Dr. Auguste Bécart en Jean Valby saam met twee sjefs, Louis Giraudon en Marcel Dorin drie sjefs en twee joernaliste - in 1949 tydens 'n ontmoeting in Parys om die verfynde Franse lewensstyl te laat herleef. Hulle knoop by die ou tradisie van die rôtisseurs aan en herstig een jaar later die Chaîne des Rôtisseurs, as 'n forum wat die verfynde Franse lewensstyl en kookkuns as diens aan die mens waardeer. Die akte van oprigting van die Confrérie de la Chaîne des Rôtisseurs 1248-1950 is op 29 Augustus 1950 gepubliseer.

Die broederskap ("confrérie") beskou homself as 'n vereniging van professionele sjefs en kennisryke fynproewers, wat tydens hulle Dîner Amical, die tradisionele gemeenskaplike dinee, naas die kookkuns ook die ambiente van 'n restourant waardeer. Die lidmaatskap in die confrérie staan ook oop vir vroue, wat as Dame de la Chaîne gelyke regte geniet.

Ná sy uitbreiding in Frankryk het Jean Valby die Chaîne des Rôtisseurs tot 'n internasionale vereniging uitgebou. Daar is tans sowat 30 000 aktiewe lede in 123 lande. Suid-Afrikaanse bailliages is sedert 1981 gevestig in Johannesburg, Pretoria, Kwazulu-Natal, Outeniekwa en die Wes-Kaap.

Titels en toekennings[wysig]

Sjefs wat uitmuntende dienste vir hulle gaste gelewer het, word met die titels Chef Rôtisseur en Maître Rôtisseur of Chef de Table en Maître de Table vereer.

Eksterne skakels[wysig]