Chivhu

in Wikipedia, die vrye ensiklopedie
Spring na: navigasie, soek
Chivhu
(vroeër Enkeldoorn)
Ligging van Chivhu op 'n kaart (Zimbabwe)
Chivhu
Chivhu
Koördinate: 19°00′0″S 30°09′0″O Koördinate: 19°00′0″S 30°09′0″O
Land Vlag van Zimbabwe Zimbabwe
Provinsie Masjonaland-Oos
Stigting 1850
Bevolking (2007)
 - Stad 10 000
Tydsone SAT (UTC+2)

Chivhu (voorheen Enkeldoorn) is 'n dorpie in die middel van Zimbabwe in die provinsie Masjonaland-Oos met 'n geskatte bevolking in 2007 van net meer as 10 000.

Die dorpie het ontstaan toe Hendrik Bekker 'n plaas afgemeet het aan die pad tussen Fort Victoria (nou Masvingo) en Salisbury (nou Harare). Hy het dit Enkeldoorn genoem na aanleiding van die soort akasia wat hier gegroei het. Bekker het later sy plaas net so agtergelaat, maar Enkeldoorn het in 'n dorpie ontwikkel, wat die middelpunt was van 'n vooruitstrewende boerderygemeenskap wat hoofsaaklik uit Afrikaners bestaan het. Die meeste het hulle reeds in die tyd van Cecil John Rhodes hier kom vestig. Hulle het altyd spottenderwys na hulle gebied as die Republiek van Enkeldoorn verwys met die plaaslike kroeg as die hoofstad. 'n Aandenkingsvisum is destyds aan besoekers uitgereik en 'n spesiale Enkeldoorn-das aan hulle verkoop waarop 'n afbeelding van 'n enkeldoornboom gedruk was.

NG gemeente[wysig]

Eerw. A.J. Liebenberg in 1917 afgeneem.

In 1895 het ds. Strasheim opdrag by die Kaapse Kerk gekry om gemeentes te stig waar Afrikaner-trekkers hulle gaan vestig het. Op 8 November 1895 het hy met wa en ses osse hier aangekom en op 9 November 1895 is 'n gemeentevergadering gehou met lede van die Nederduitse Gereformeerde Kerk en die Nederduitsch Hervormde Kerk. Aangesien die lidmate van albei genootskappe te min was vir 'n eie gemeente, het almal toestemming tot die stigting van 'n NG gemeente verleen.

In 1896 kom die Matabele in opstand en word laer getrek op Enkeldoorn. Met die vrede herstel, kom eerw. A.J. Liebenberg op 6 Januarie 1897 hier aan nadat hy deur Cecil John Rhodes gestuur is om 'n dorp te stig, mits die plek hoog en droog was. Die eerste kerkie is in die laer van gras en pale gebou, en het ook as skooltjie gedien. Die tweede kerkie se hoeksteen is op 21 Desember 1897 gelê en het £1 000 gekos. Dit is later vergroot en het as kerksaal gedien ná die derde kerkgebou opgerig is. Die derde gebou se hoeksteen is in 1930 gelê en het £7 000 gekos. Deur die jare is onder meer gemeentes soos Harare, Masvingo, Gweru en Marondera van Enkeldoorn afgestig.

Dieselfde lot as al die ander Zimbabwiese gemeentes het Chivhu ook getref toe die lidmaattal sedert onafhanklikheidwording in 1980 gedurigdeur gedaal het, van 261 in 1978 tot 26 in 2003 en 20 in 2006, maar 38 in 2008.

Bronne[wysig]

  • Olivier, ds. P.L., Ons gemeentelike feesalbum. Kaapstad en Pretoria: N.G. Kerk-uitgewers, 1952.
  • Mayhew, Vic (red.), Reader’s Digest Illustrated Guide to Southern Africa, The Reader’s Digest Association South Africa (Pty.) Limited, Kaapstad, 1980.