Christiana

Christiana
Christiana
Koördinate: 27°54′″S 25°09′″O
Land	Suid-Afrika
Provinsie	Noordwes
Distriksmunisipaliteit	Dr. Ruth Segomotsi Mompati
Plaaslike Munisipaliteit	Lekwa-Teemane
Bevolking (2010)
- Stad	15 241
Tydsone	SAST (UTC+2)

Die SAR Klass 6E1 Series 3 staan op Christiana se stasie.

Christiana is 'n dorp in die suidweste van Noordwes op die oewer van die Vaalrivier.

Geskiedenis

Die dorp het sy bestaan te danke aan diamante. Weens baie dispute oor grondbesit in die onderste lope van die Vaalrivier, het die regering in 1870 besluit om 'n dorp te stig op die plaas Zoutpansdrif en die eerste woonerwe is verkoop. Dit is vernoem na die dogter van die Voortrekkerleier Andries Pretorius, wat die rivier hier oorgesteek het. Twee jaar later is diamante ook in die spoelgruis van die Vaalrivier by Christiana ontdek wat tot nog 'n diamantstormloop gelei het. Die stormloop het ook gou tot 'n einde gekom.

Distrik

Die distrik is 1 900km² groot. Die produksie van beesvleis, mielies, sorghum, grondbone en katoen is die belangrikste ekonomiese bedrywighede. Dit is vandag 'n belangrike boerderysentrum en veral weens die nabyheid van die Vaalharts-besproeiingskema.

Die N12 nasionale pad gaan deur Christiana.

Trivia

Die Rob Ferreira-natuurreservaat en vakansieoord is ongeveer 6km noordoos van die dorp. Die mineraal fonteine se water is louwarm (36.7°C). Chrsitiana is ook die eerste dorp waar die Britse magte die Transvaalse grens oorgesteek het tydens die Tweede Vryheidsoorlog.

Sien ook

• Lys van dorpe in Suid-Afrika

Bronne

• Rosenthal, Eric, Encyclopaedia of Southern Africa, Juta and Company Limited, Kaapstad en Johannesburg, 1978.
• Op Pad in Suid-Afrika. BPJ Erasmus. 1995 ISBN 1-86842-026-4