Christoffel van Beiere

in Wikipedia, die vrye ensiklopedie
Christoffel van Beiere
Koning van Denemarke, Noorweë en Swede

Periode Denemarke
9 April 14405 Januarie 1448
Noorweë
1442–5 Januarie 1448
Swede
1441–5 Januarie 1448
Voorganger Erik van Pommere
Opvolger Denemarke
Christiaan I
Noorweë
Karel I
Swede
Karel VIII
Huis Palts-Neumarkt
Vrou Dorothea van Brandenburg
Vader Hertog Johan van Palts-Neumarkt
Moeder Katharina Vratislava
Gebore 26 Februarie 1418
Oorlede 5/6 Januarie 1448

Christoffel van Beiere (26 Februarie 1416 – 5 of 6 Januarie 1448) was koning van Denemarke, Noorweë en Swede.

Vroeë lewe[wysig | wysig bron]

Christoffel was die seun van hertog Johan van Palts-Neumarkt en Katharina Vratislava, suster van Erik van Pommere. Hertog Johan was die seun van koning Ruprecht van Duitsland. In 1445 is Christoffel in Kopenhagen getroud met Dorothea van Brandenburg.

Koning Erik van Pommere is in 1439 afgesit as koning van Denemarke en Swede. As sy nefie is Christoffel, wat taamlik onbekend was met Skandinawiese toestande, gekies as sy oom se opvolger, eers as regent van 1439 af, en op 9 April 1440 is hy gekies as koning van Denemarke. Hy was veronderstel om ’n blote marionet te wees, maar het tog daarin geslaag om ’n mate van persoonlike beheer te handhaaf.

In die algemeen kan sy bewind gesien word as die begin van ’n lang tydperk van balans tussen koninklike mag en die adel wat tot in 1660 geduur het. Hy is in 1441 as koning van Sweden gekies en in 1442 as koning van Noorweë.

Bewind[wysig | wysig bron]

Die seël van Christoffel van Beiere.

Aan die begin van sy bewind het Christoffel ’n rebellie deur boere onderdruk waarin duisende rebelle dood is. Hulle het ook hul vrye status verloor en het die lyfeienes geword van die plase waar hulle gewerk het.

Nadat sy koninklike woning in Roskilde afgebrand het, het hy na Kopenhagen getrek en dit die nuwe hoofstad van Denemarke gemaak. Die Swede het nie van hom gehou nie omdat hy te Duits na hulle sin was, en hy het oud-koning Albrecht toegelaat om skepe te plunder vanaf sy kasteel in Gotland sonder om enige poging aan te wend om dit stop te sit. Hulle het hom ook kwalik geneem vir ’n reeks swak oeste. Mense was so honger dat hulle gemaalde boombas gemeng het met die bietjie meel wat hulle gehad het. Christoffel is in Swede met minagting die Baskoning genoem.

Die Kalmarunie-verdrag is so verander dat die adel die meeste van die mag gehad het om beleid vas te stel en die koning het baie van sy mag verloor. Die gevolge van sy beleid van balans was dus nog nie bereik toe hy skielik as die laaste afstammeling van Waldemar IV van Denemarke dood is nie.

Hy is in 1448 skielik in Helsingborg oorlede. Op 28 Oktober 1449 het Dorothea weer getrou, met Christiaan I van Denemarke. In 1654 het die Wittelsbach-familie die mag in Swede teruggekry.

Verwysings[wysig | wysig bron]

Hierdie artikel is merendeels vertaal vanaf die Engelse Wikipedia-artikel en:Christopher of Bavaria

Bronne[wysig | wysig bron]

  • Dansk Biografisk Leksikon, vol. 7, Kopenhagen 1980.
  • Politikens Danmarkshistorie, vol. 4 deur Erik Kjersgaard, Kopenhagen 1962.
  • Politikens bog om Danske Monarker deur Benito Scocozza, Kopenhagen 1998