Cluny

in Wikipedia, die vrye ensiklopedie
Spring na: navigasie, soek
Cluny
Uitsig oor Cluny
Uitsig oor Cluny
Wapen van Cluny
Wapen
Ligging van Cluny op 'n kaart (Frankryk)
Cluny
Cluny
Koördinate: 46°26′07″N 4°39′36″O
Land Vlag van Frankryk Frankryk
Gewes Flag of Bourgogne.svg Boergondië
Département Blason département fr Saône-et-Loire.svg Saône-et-Loire
Arrondissement Mâcon
Kanton Cluny
Stigting 910
Regering
 - Burgemeester Jean-Luc Delpeuch
Oppervlak
 - Stad 23,71 km²  (9,2 vk m)
Hoogte 226–574 m (741–1 883 vt)
Bevolking (2009)
 - Stad 4 624
 - Digtheid 195/km² (505/myl2)
Poskode 71250
Skakelkode(s) 71137
Webwerf: cluny.fr

Cluny is 'n stad in die Franse département Saône-et-Loire, 30 kilometer suid-oos van Mâcon, met sowat 4 600 inwoners (2009). Cluny staan veral bekend vir sy middeleeuse abdy, wat in 910 deur Willem I van Akwitanië gestig is. Die klooster is tydens die Franse Rewolusie verwoes.

Sowat tien kilometer noord van Cluny lê die dorp Taizé met sy bekende ekumeniese gemeenskap.

Besienswaardighede[wysig]

Die Tour Fabry, 'n wagtoring by die noordelike muur van die klooster

Naas sy abdy en die kloostermuseum beskik Cluny oor 'n aantal nasionale en historiese instellings en monumente. Haras National de Bourgogne is 'n bekende Franse stoetery.

Die middeleeuse argitektuur van Cluny is grotendeels bewaar, terwyl die Clunisois, die omgewing van die stad, oor talle kastele, grotte, kerke in die Romaanse boustyl, museums en wynroetes beskik.

Kloosterlewe[wysig]

Die abdy van Cluny staan onder die beheer van die pous; sy stigting is 'n reaksie op die groot invloed wat plaaslike owerhede soos biskoppe en wêreldlike heersers op die kerk en kloosters van daardie tyd uitoefen. Cluny se gemeenskap van monnike is deur die ab Berno (910-927) volgens die Benediktynse reëls georganiseer. In plaas van fisiese arbeid beklemtoon die kloosterlewe in Cluny die liturgiese aanbidding en meditasie.

Cluny

Die instelling het 'n sterk aristokratiese grondslag, en sy besondere karakter is die voorbeeld wat deur baie ander kloosters opgevolg word.

Die leerstelling dat die monnike deur hulle gebede nie net hul eie verlossing kan bereik nie, maar ook die van die leke, verseker dat die klooster wyd geag word as een van die mees gesaghebbende kerklike instellings van sy tyd en talle skenkings ontvang. Die groot inkomste word onder meer gebruik omdie reusagtige abdykerk van Cluny op te rig, wat as die voorbeeld van die Romaanse boustyl in Europa dien.

Eers in die 12de eeu verswak die abdy se posisie, en dit word steeds meer afhanklik van die feodale wêreldlike owerhede van die omgewing. Die Franse koning tree as die beskermheer van die klooster op, wat steeds as een van die belangrikste kerklike instellings geag word. 'n Groot paleis in die gotiese boustyl in Parys dien as setel van die ab tydens sy besoeke aan die hoofstad.

In die 11de eeu is daar sowat duisend kloosters volgens die reëls van Cluny in Wes- en Suid-Europa en die Heilige Land. Die orde van Cluny speel onder meer 'n belangrike rol by die Christelike reconquista in Spanje.