Crown Liquor Saloon

in Wikipedia, die vrye ensiklopedie
Spring na: navigasie, soek
Die fasade van die Crown Liquor Saloon

Die Crown Liquor Saloon is 'n kroeg in Belfast, Noord-Ierland. Die drinkplek in Great Victoria Street, wat in 1826 saam met die eerste spoorverbinding tussen Belfast en Lisburn geopen en in 1885 van sy meubilering van die hoogste standaard voorsien is, is 'n uitstekende voorbeeld van 'n Victoriaanse gin palace ("jenewer-paleis") en tans een van Noord-Ierland se bekendste kroeë.

Geskiedenis[wysig]

Herstelwerk in die Crown. Die foto is in Augustus 2007 geneem

Die kroeg is oorspronklik deur Felix O'Hanlon as The Railway Tavern geopen en later deur Michael Flanagan gekoop. Sy seun het dit hernoem en in 1885 gerenoveer.

Die Crown het sy fyn afgewerkte teëls, gekleurde glas en houtversierings aan Italiaanse ambagsmanne te danke wat deur Flanagan oorreed is om in hul vrye tyd in die kroeg te werk. Die ambagsmanne het destyds na Ierland gekom om by die bou van nuwe kerke in Belfast betrokke te raak. Die hoë gehalte van hul werk het aan die Crown sy reputasie as een van die mooiste Victoriaanse gin palaces van sy tyd gegee.

In 1978 is die National Trust deur belangstellendes soos die bekende Britse digter en televisiepersoonlikheid Sir John Betjeman oorreed om die historiese kroeg aan te koop en te restoureer. Ná drie jaar se herstelwerk, wat teen 'n koste van £400 000 uitgevoer is, is die drinkplek in sy oorspronklike Victoriaanse glorie heropen. Verdere herstelwerk teen 'n koste van £500 000, wat deur die National Trust gedra is, is in 2007 voltooi. Hierdie restourasiewerk word in 'n dokumentêr behandel wat deur BBC Northern Ireland vroeg in 2008 onder die titel Jewel in the Crown gebeeldsend is.

As een van Belfast se bekendste bakens is die kroeg as coulisse vir 'n verskeidenheid rolprent- en televisie-produksies gebruik, waaronder Carol Reed se Odd Man Out (1947) en David Caffrey se Divorcing Jack (1998). Die Environment and Heritage Service het aan die Crown die status van 'n graad A-gelyste gebou toegeken.

Meubilering en versierings[wysig]

Die Crown se interieur met die Victoriaanse houthokke

Die kroeg se buitefasade is met veelkleurige teëls versier, insluitende 'n mosaïek van 'n kroon op die vloerteëls by die ingang. Die interieur van die Crown is eweneens met teëls en ingewikkelde mosaïeke verfraai. Vir die kroegtafel, wat in 'n kenmerkende "altaar-styl" uitgevoer is en oor 'n verwarmde voetbank beskik, is rooi graniet as afwerkingsmateriaal gebruik. Dit word deur gaslampe verlig wat aan houtbeklede mure aangebring is. Die mure is met houtsnykuns versier.

Die Crown beskik oor tien houthokke of snugs waarin gaste gesellig kan saamkuier. Hulle is oorspronklik in die strenge Victoriaanse tydperk gebou om die kroeg se meer terughoudende gaste te akkommodeer en beskik nog oor die oorspronklike metaalplate waaraan vuurhoutjies aangesteek kan word en 'n antieke stelsel van klokkies waarmee die personeel gelui kan word. Om privaatheid te beskerm is die kroeg oorspronklik van geëtste en gekleurde glasvensters voorsien wat met geskilderde doppe, elwe, pynappels, fleur-de-lis en harlekyne versier is.

Eksterne skakels[wysig]