Crusaders (Superrugbyspan)

in Wikipedia, die vrye ensiklopedie
Spring na: navigasie, soek
Crusaders
Canterbury crusaders.jpg
Bynaam(e) ’Saders
Stigting 1996
Ligging Christchurch, Nieu-Seeland
Streek Canterbury, Tasman, Weskus, Marlborough
Stadion AMI-stadion
Kapasiteit 41 500[1]
Afrigter(s) Vlag van Nieu-Seeland Todd Blackadder[2]
Kaptein(s) Kieran Read
Liga(s) Superrugby
2013 Halfeindronde (4de na rondomtalie)
Tuiskleure


Weg kleure

Statistiek
Eerste wedstryd
Waikato Chiefs 27 – 26 Canterbury Crusaders
(3 Maart 1996)
Grootste oorwinning
Crusaders 75 – 27 Waratahs
(11 Mei 2002) 77
Grootste nederlaag
Queensland Reds 52 – 16 Canterbury Crusaders
(17 Maart 1996) 36
Amptelike webwerf
www.crusaders.co.nz

Die Crusaders (voorheen bekend as die Canterbury Crusaders) is ’n Nieu-Seelandse rugbyspan wat sedert 1996 as ’n konsessie aan die Superrugbykompetisie deelneem. Die konsessie sluit die Canterbury-, Tasman-, Weskus- en Marlborough provinsies in. Die spelers van Canterbury en Tasman neem ook aan die ITM-beker deel terwyl spelers van Buller, Mid-Canterbury, Suid-Canterbury en die Weskus aan die Heartland-kampioenskap deelneem. Die meeste van hulle tuiswestryde word gespeel op die AMI-stadion.

Geskiedenis[wysig]

Begin: 1996 en 1997[wysig]

Die Crusaders se konsessie is gestig as een van vyf Nieu-seelandse spanne om aan die Super 12 deel te neem. Die Crusaders se konsessiegebied beslaan die hele noorde van die Suid-Eiland van Nieu-Seeland en het bestaan uit die Buller-, Canterbury-, Marlborough-, Mid-Canterbury-, Nelson Bay-, Suid-Canterbury- en Weskus rugbyunies.[3][4] Die eerste Crusaderskaptein was Richard Loe, stut van die All Blacks en die span is afgerig deur Vance Stewart.[5] Die Crusaders het gesukkel in die eerste seisoen en het heel onder aan die punteleër geëindig met slegs twee seges in die seisoen.[6] Die agt verliese het ’n verlies van 49 - 18 teen die Auckland Blues en een van 52 - 16 teen die Queensland Reds ingesluit.[7]

Vir die volgende seisoen het het hulle ’n nuwe afrigter en nuwe kaptein gekry. Todd Blackadder het vir Loe opgevolg as kaptein en Wayne Smith het oorgeneem as afrigter.[5] Met vyf seges het die Crusaders sesde geëindig na die rondomtalie.[8] In die Crusaders se laaste wedstryd van die 1997-seisoen het hulle die Queensland Reds met 48 - 3 gewen en die vorige seisoen se verlies gewreek.[8]

Driekuns: 1998 tot 2000[wysig]

Die Crusaders het hul eerste titel in 1998 gewen ten spyte van slegs een oorwinning in hul eerste vier wedstryde. Hulle het die rondomtalietoernooi afgesluit met ’n tweede plek nadat hulle hul laaste sewe wedstryde gewen het.[9] Hulle het in die halfeindronde teen die Coastal Sharks gewen met 36 - 32.[10] In die eindronde op Edenpark het hulle teen die Auckland Blues gespeel en in die week voor die wedstryd was die moraal onder cie Crusaders laag.[11] Met een minuut se speeltyd oor was die spanne gelykop met 13 elk[12] Andrew Mehrtens het ’n skoppie na die hoekvlag gegee, James Kerr het vinnig opgevolg en die wendrie gedruk. Met die Crusaders se terugkeer na Christchurch is hulle op ’n oorwinningsrit deur die stad met nagenoeg 100,000 mense wat kom kyk het.[12]

Ons is ’n streekspan ... en dit is belangrik om te onthou dat ons ook, behalwe vir Canterbury, ook Nelson Bay, Marlborough, Buller, Weskus, Mid-Canterbury en Suid-Canterbury insluit

Todd Blackadder, Crusaders kaptein, 1998 Super 12 wentoespraak[13]

Die 1999-seisoen was ewe suksesvol vir die Crusaders ten spyte van slegs ’n vierde plek op die punteleër nadat hulle hul laaste vier rondomtaliewedstryde gewen het.[14][15] Hulle het die Queensland Reds, wat bo-aan die punteleër was, gewen in Brisbane in die halfeindronde en is na Dunedin om teen die Otago Highlanders in die eindronde te speel.[15] DieCrusaders het in die eindronde met 24 - 19 gewen na Afato So’oalo die wendrie gedruk het toe hy ’n die bal geskop het, dit self weer gevang het en vir Jeff Wilson, All Black-vleuel, weggehardloop het.[16][17]

Nadat die All Blacks in die halfeindronde van die Rugbywêreldbeker 1999 uitgeskakel is, het Wayne Smith vir John Hart as afrigter van die All Blacks opgevolg.[18] Robbie Deans het vir Smith opgevolg as afrigter van die Crusaders. In Deans se eerste jaar as afrigter het die Crusaders hul derde titel in ’n ry gewen - iets wat nog nie weer gebeur het nie.[5] Die Crusaders was tweede op die punteleër na die rondomtaliewedstryde en het in Christchurch teen die Highlanders gespeel vir ’n plek in die eindstryd.[19][20] Twee drieë in die laaste 20 minute deur Marika Vunibaka het ’n oorwinning van 37 - 15 verseker.[21]

Die eindstryd in 2000 is in die sneeu gespeel in Canberra teen die Brumbies.[22] Vier minute voor die eindfluitjie sou blaas het die Brumbies deur ’n strafskop met 19 - 17 voorgeloop.[22] Die Crusaders het egter ’n strafskop gekry na die afskop en Mehrtens het die skop oorgesit en verseker dat die Crusaders hul derde titel wen met 20 - 19.[23]

Ontwikkeling van ’n nalatenskap: 2001 tot 2005[wysig]

Die Crusaders skrum teen die Brumbies in Mei 2006

Na die drie opeenvolgende Super 12-titels het die Crusaders tiende geëindig in 2001 — hul swakste vertoning sedert 1996. In 2002 het die Crusaders met mening terug gekom toe hulle die seisoen onoorwonne afgesluit het na die rondomtalietoernooi. Alhoewel dit die geval was het die Crusaders ses van hul wedstryde met sewe punte of minder gewen.[24][25] Die elf oorwinnings het die 96 - 19 sege in die twaalfde ronde oor die Waratahs, wat op daardie stadium tweede op die punteleër was, ingesluit.

Die Crusaders het teen die Highlanders in die halfeindronde gespeel en die wedstryd met 34 - 23 gewen nadat hulle halftyd met 18 - 6 voorgeloop het. Die volgende week het hulle teen die Brumbies in die eindronde gespeel. Dit was die eerste eindronde op die Jade-stadion. Met agt minute se speeltyd oor het die Crusaders met 14 - 13 voorgeloop maar Caleb Ralph het in die laaste minute ’n drie gedruk en die Crusaders het met 31 - 13 gewen.[26][27]

Die Crusaders se onoorwonne rekord het in die derde ronde van die 2003-seisoen in die slag gebly toe hulle met 39 - 5 teen die Blues verloor het.[28] Die Crusaders het die seisoen in die tweede plek op die punteleër afgesluit. Hulle het in die halfeindronde teen die Hurricanes gespeel wat deur die voormalige assistentafrigter van die Crusaders, Colin Cooper, afgerig is. Die Crusaders het die wedstryd met 39 - 16 gewen.[29] In die eindronde het die Crusaders teen die Blues gespeel wat ook deur ’n voormalige assistentafrigter van die Crusaders, Peter Sloane, afgerig is. Die Crusaders het met halftyd met 10 - 6 voorgeloop[30] maar die Blues het teruggeveg en tien minute voor die einde was die Blues voor met 21 - 10. Die Crusaders het in daardie tien minute een drie gedruk en die Blues het uiteindelik die wedstryd met 21 - 17 gewen.[30]

Die 2004-seisoen het afgeskop met twee verliese, eers teen die Waratahs en daarna teen die Blues.[31] Hulle het die seisoen weer in die tweede plek afgesluit[32] en het teen die Stormers in die halfeindronde gespeel en met 27 - 16 gewen.[32] Hulle het weer teen die Brumbies in die eindronde te staan gekom. Die Brumbies het die eerste 19 minute oorheers en 33 ponte teen 0 aangeteken.[33] Die Crusaders het teruggeveg maar uiteindelik met 47 - 38 verloor.[32]

Die Crusaders se eerste wedstryd in 2005 was ’n herhaling van die vorige eindstryd teen die Brumbies met die Brumbies wat in Canberra geseëvier het.[34] In die sewende ronde is die kaptein, Richie McCaw, bewusteloos van die veld af tydens die Crusaders se verlies van 35 - 20 teen die Bulls. Die Crusaders het egter die seisoen afgesluit in die eerste plek.[35][36] McCaw was weer fiks om die Crusaders in die halfeindstryd teen die Hurricanes aan te voer.[35][36] Die Crusaders het met 47 - 7 gewen en die Waratahs moes na Christchurch reis vir die eindronde. Die Crusaders het hulle vyfde Super 12-titel met 35 - 25 teen die Waratahs gewen.[37][38]

As beloning vir hul sewende eindstryd en vyfde titel mog die Crusaders die Super 12-trofee hou.[39] Aan die einde van die 2005-seisoen het die Crusaders afskeid geneem van Andrew Mehrtens en Justin Marshall wat van die begin in 1996 vir die span gespeel het.

Super 14: 2006 tot 2010[wysig]

Die Crusaders speel teen die Bulls in 2006

In 2006 is die Super 12 uitgebrei na 14 spanne met die toevoeging van die Western Force van Australië en die Cheetahs van Suid-Afrika. Die Crusaders se onoorwonne strok van sestien wedstryde het amper in die elfde ronde teen die Western Force ten einde geloop toe hulle gelykop gespeel het.[40] Dit het wel die volgende naweek ten einde geloop toe die Crusaders teen die Stormers in Kaapstad verloor het.[41] Dit was die enigste wedstryd wat die Crusaders daardie seisoen verloor het en hulle het weer bo-aan die punteleër geëingid.[42] Nadat die Crusaders die Bulls met 35 - 15 in die halfeindronde geklop het, het hulle teen die Hurricanes in die eindronde gespeel. Die wedstryd is in digte mis gespeel.[43] Baie toeskouers het nie die wedstryd klaar gekyk nie en het reeds voor die eindfluitjie die stadion verlaat.[43] Met 20 minute speeltyd oor was die telling 9 elk. Casey Laulala het toe die enigste drie gedruk en die Crusaders het met 19 - 12 gewen.[43]

In 2007 het sewe spelers van die Crusaders die eerste sewe weke van die kompetisie misgeloop sodat hulle kon deelneem aan die All Blacks se "kondisioneringsprogram"..[44] Die kondisioneringsprogram was deel van die All Blacks se voorbereiding vir die Rugbywêreldbeker 2007; 22 spelers is vir die program gekies. Die Crusaders het sleutelspelers soos Chris Jack, Richie McCaw, Greg Somerville, Reuben Thorne, Dan Carter, Leon MacDonald en Aaron Mauger afgestaan.[44][45][46] In die agtste ronde van die kompetisie was al die spelers behalwe Somerville (hy het ’n besering opgedoen) weer beskikbaar vir die Crusaders.[47] Die Crusaders was na die negende ronde in die twee plek op die punteleër voordat hulle met 53 - 0 teen die Force in die tiende ronde gewen het.[48] Hierdie oorwinning oor die Force was die Crusaders se 100ste in Superrugby — die Crusaders is die eerste konsessie wat dit kon regkry.[48]

Voor die laaste ronde was die Crusaders bo-aan die punteleër. Om ’n halfeindstryd in Christchurch te verseker moes hulle die Chiefs wen in die veertiende ronde. Die Chiefs het die wedstryd met 30 - 24 gewen en daarmee die Crusaders se reeks van 26 oorwinnings in Christchurch beëindig.ref name="26GameOver">(en) Webster, Tim, "Chiefs upset Crusaders", sportal.com.au, 2007-05-04. URL besoek op 2007-06-01.</ref> Die Bulls het in die veertiende ronde die Reds met 92 - 3 gewen en in die proses die Crusaders verbygesteek om tweede op die punteleër te eindig.[49] Die Crusaders moes na Pretoria reis vir die halfeindronde teen die Bulls waar hulle met 27 - 12 verloor het.[50]

Die 2008-seisoen was weer ’n suksesvolle ene vir die Crusaders. Hulle het die seisoen afgesluit in die boonste plek op die punteleër en die Hurricanes met 33 - 22 in die halfeindronde gewen. Daarna het hulle in die eindronde teen die Waratahs gespeel en gewen met 20 - 12. Die volgende seisoen het nie goed afgeskop vir die Crusaders nie en hulle kon slegs een van hulle eerste vyf wedstryde wen. Die span het uiteindelik sy voete gevind en die seisoen afgesluit in die vierde plek op die punteleër. Die Crusaders het net bo die Waratahs geëindig. Hulle het dieselfde hoeveelheid punte gehad maar die Crusaders se punteverskil was groter as dié van die Waratahs. Die Crusaders het in die halfeindronde teen die Bulls op Loftus Versfeld voor ’n skare van 52,000 met 36 - 23 verloor. Dit was slegs die tweede keer dat die Crusaders in die halfeindronde verloor het; die vorige keer was in 2007 ook teen die Bulls.

Nuwe era: 2011 tot huidig[wysig]

Die 2011-seisoen het begin met ’n verloor teen die Blues met twee punte. Hul tweede-rondewedstryd teen die Hurricanes is afgelas na afloop van die aardbewing in Christchurch op 22 Februarie waarin 182 mense oorlede is, en albei spanne het punte gekry vir ’n gelykopuitslag. In hul volgende wedstryd het die Crusaders teen die Waratahs, wat in hul vorige twee wedstryde nog net ses punte afgestaan het, te staan gekom. Die Crusaders het met 33 – 18 gewen voor ’n volgepakte stadion. Hul volgende wedstryde teen die Brumbies, Highlanders en Sharks is al drie gewen. Die wedstryd teen die Sharks is op Twickenham gespeel as gevolg van die skade wat aan die Crusaders se tuisveld aangerig is in die aardbewing. Hul volgende wedstryde was teen die Bulls op die Timaru Alpine-stadion en teen die Chiefs in Mount Manganui wat ook albei deur die Crusaders gewen is. Die Crusaders het in die eindstryd teen die Reds verloor op die Suncorpstadion. Die 2012-seisoen was die eerste waar die Crusaders se tuisveld na die Christchurch-stadion geskuif is. Die Crusaders het weer die uitspeelronde bereik maar teen die Chiefs in die halfeindronde verloor.

Naam en kleure[wysig]

Die ridders tree op voor ’n wedstryd

Die Crusaders se naam is gekies om die aard van Canterbury rugby te weerspieël (’n crusade is ’n kruistog).[51] ’n Potensiële naam was die Plainsmen maar daar is besluit op Crusaders omdat dit eerder die Engelse erfenis van Christchurch weerspieël.[51] Christchurch in die 19de eeu is deur Engelse emigrante gestig en word dikwels beskryf as die mees Engelse stad buite Engeland.[52][53] Die konsessie het besluit op Canterbury se tradisionele sportkleure van rooi en swart.

Konsessiegebied[wysig]

Die konsessie verteenwoordig die Buller-, Canterbury-, Mid-Canterbury-, Suid-Canterbury-, die Tasmaanse- en Weskus rugbyunies.[3]

Voordat die plaaslike Nasionale Provinsiale Kampioenskap in 2006 gereorganiseer is, was Canterbury die enigste provinsiale unie wat in die eerste divisie gespeel het (wat vandag as die Air New Zealand-beker bekend staan) binne die konsessiegebied van die Crusaders. Dit het tot gevolg gehad dat baie van die Crusaders-spelers van Canterbury afkomstig was. Vandag is daar twee spanne in die konsessiegebied van die Crusaders wat in die Air New Zealand-beker deelneem — Canterbury en Tasman.

Stadion[wysig]

Die Crusaders se primêre tuisveld is die AMI-stadion in Christchurch met sitplek vir 36,000 mense met planne vir uitbreiding tot sitplek vir 43,000 mense vir die Rugbywêreldbeker 2011.[54] Die Crusaders speel gewoonlik een tuiswedstryd op een van die ander stadione, gewoonlik wanneer die Kiwi’s op die AMI-stadion speel.[55] Vorige stadions sluit Travalgar Park in Nelson en die Alpine Energy-stadion in Timaru in.[55][56] As deel van die voorwedstrydvermaak wanneer die Crusaders tuiswedstryde speel word Conquest of Paradise gespeel terwyl ruiters wat soos ridders geklee is om die veld ry.[57]

Die Crusaders se bestuur het in 2005 voorgestel dat een rondomtaliewedstryd in Melbourne gespeel word wanneer die Jade-stadion nie beskikbaar is nie.[58] Alhoewel vyf van die konsessie se sewe unies (die Marlborough en Nelson Bay-unies het nog nie saamgesmelt nie) die voorstel gesteun het, het die Nieu-Seelandse Rugbyunie die voorstel geveto.[58] In 2006 het die Crusaders ’n voorweisoenwedstryd in Melbourne op die Olympic Park-stadion teen die Western Force gespeel.[59] Hulle het dit in 2008 herhaal, ook teen die Force.

Seisoenbepalings[wysig]

Super 12[wysig]

Die volgende tabel som die Crusaders se Super 12-uitslae op:[60]

Seisoen Pos Gespeel Gewen Gelyk Verloor Punte vir Punte teen +/- BP Pte Notas
1996 12de 11 2 1 8 234 378 -144 3 13
1997 6de 11 5 1 5 272 235 37 4 26
1998 1ste 11 8 0 3 340 260 80 9 41 Wen in eindronde teen Auckland Blues
1999 1ste 11 7 1 3 324 262 62 3 33 Wen in eindronde teen Otago Highlanders
2000 1ste 11 8 0 3 369 293 76 7 39 Wen in eindronde teen ACT Brumbies
2001 10de 11 4 0 7 307 331 -24 7 23
2002 1ste 11 11 0 0 469 264 205 7 51 Wen in eindronde teen Brumbies
2003 2de 11 8 0 3 358 263 95 7 51 Verloor in eindronde teen Blues
2004 2de 11 7 0 4 345 303 42 6 34 Verloor in eindronde teen Brumbies
2005 1ste 11 9 0 2 459 281 178 8 44 Wen in eindronde teen Waratahs

Super 14[wysig]

Die volgende tabel som die Crusaders se Super 14-uitslae op:[60]

Seisoen Pos Gespeel Gewen Gelyk Verloor Punte vir Punte teen +/- BP Pte Notas
2006 1ste 13 11 1 1 412 210 202 5 51 Wen in eindronde teen Hurricanes
2007 3de 13 8 0 5 382 235 147 10 42 Verloor in halfeindronde teen Bulls
2008 1ste 13 11 0 2 369 176 193 8 52 Wen in eindronde teen Waratahs
2009 4de 13 8 1 4 231 198 33 7 41 Verloor in halfeindronde teen Bulls
2010 4de 13 8 1 4 388 295 93 7 41 Verloor in halfeindronde teen Bulls

Superrugby[wysig]

Die volgende tabel som die Crusaders se Superrugby-uitslae op:

Seisoen Pos Gespeel Gewen Gelyk Verloor Punte vir Punte teen +/- BP1 Pte Notas
2011 3de 16 11 1 4 436 273 +163 7 61 Verloor teen Reds in eindronde
2012 4de 16 11 0 5 485 343 +142 9 61 Verloor teen Chiefs in halfeindronde
2013 4de 16 11 0 5 446 307 +139 8 60 Verloor teen Chiefs in halfeindronde
2014 2de 16 11 0 5 445 322 +123 7 51

1 Punte toegeken vir ’n loslootjie is nie hierby ingereken nie.

Toernooirekords[wysig]

Dan Carter staan gereed om ’n doelskop waar te neem

Die span en enkele spelers hou verskeie superrugbyrekords. Die span hou die rekord vir die meeste punte in ’n wedstryd met ’n oorwinning van 96 - 19 oor die Waratahs in die 12de ronde van die 2002-seisoen. In 2005 het die span die rekord vir die meeste punte in een seisoen opgstel met 541 punte na afloop van die uitspeelrondes. Hulle het in daardie seisoen ook ’n rekord 71 drieë gedruk. Die Crusaders het ook gespeel in die wedstryd waarin die minste punte aangeteken is (hulle het 6 - 0 teen die Highlanders verloor in die 4de ronde van die 2009-seisoen).

Verskeie spelers het toernooirekords opgestel terwyl hulle vir die Crusaders gespeel het. Andrew Mehrtens hou die rekord vir die meeste punte in ’n Super 12-seisoen met 206 (opgestel in 1998);[61] terwyl Dan Carter die Super 14-rekord vir die meeste punte in een seisoen hou met 221.[62] Rico Gear hou ook die rekord vir die meeste drieë in ’n Superrugbyseisoen met 15 in 2005.[61] In die tiende ronde van die 2007-seisoen het die Crusaders die Western Force met 53 - 0 gewen om die eerste span in superrugby te word wat 100 wedstryde kon wen.

Prestasies[wysig]

Die Crusaders het vyf van die tien Super 12-kompetisies gewen en was in totaal sewe keer in die eindronde.[63] Hulle wat ook in die eerste Super-14 eindronde in Christchurch gespeel en dit gewen. Tussen 1998 en 2006 het die Crusaders net in 2001 nie in die eindronde gespeel nie. Hulle sewe titels maak hulle die mees suksesvolle span in die geskiedenis van Superrugby.[64] [60] Die Crusaders is ook die enigste span wat dit kon regkry om al hul rondomtaliewedstryde in een seisoen te wen, waarna hulle ook die halfeindstryd en eindstryd gewen het. Dit was in 2002.

Huidige span[wysig]

Crusaders 2014 Superrugbyspan

Stutte

Hakers

Slotte

 

Losvoorspelers

Skrumskakels

Losskakels

 

Senters

Vleuels

Heelagters

Afrigters[wysig]

In hulle eerste seisoen is die Crusaders afgerig deur Vance Stewart met Aussie McLean as sy assistent.[5] In 1997 is Stewart vervang deur Wayne Smith en McLean met Peter Sloane. Smith was tot aan die einde van die 1999-seisoen die afrigter waarna hy aangestel is as afrigter van die All Blacks. In 2000 Het Robbie Deans oorgeneem as afrigter. Deans het verskeie assistente gehad; in 2000 en 2001 was Steve Hansen sy assistent; in 2002 was dit Colin Cooper; in 2003 en 2004 was dit Don Hayes; en in 2005 en 2006 was dit Vern Cotter.[5] In 2007 was die voormalige Crusaders Mark Hammett die assistent[65] In Desember 2007 is Deans aangestel as die afrigter van die Wallabies maar het in 2008 nog die Crusaders afgerig. In Julie 2008 is die voormalige Crusader-kaptein Todd Blackadder aangestel as Deans se opvolger en Hammett het aangebly as die assistentafrigter.[2]

Verwysings[wysig]

  1. (en) Development Timetable”. jadestadium.co.nz. URL besoek op 22 September 2006.
  2. 2,0 2,1 (en) "Blackadder bevestig as Crusaders-afrigter", nzherald.co.nz, 2008-07-23. URL besoek op 2008-07-23.
  3. 3,0 3,1 McIlraith (2005), p. 320.
  4. Die Marlborough- en Nelson Bay unies het sedertdien saamgesmelt om die Tasmaanse Rugbyunie te vorm.
  5. 5,0 5,1 5,2 5,3 5,4 McIlraith (2005), p. 321.
  6. McIlraith (2005), p. 235.
  7. Gifford (2004), p.151
  8. 8,0 8,1 McIlraith (2005), p.243
  9. Gifford (2004), p. 169.
  10. McIlraith (2005), p. 252.
  11. McIlraith (2005), p. 84.
  12. 12,0 12,1 Gifford (2004), p. 172.
  13. Howitt (2005), p. 61
  14. Gifford (2004), p. 174.
  15. 15,0 15,1 McIlraith (2005), p. 260.
  16. Gifford (2004), p. 175.
  17. McIlraith (2005), p. 106.
  18. Palenski (2003), p. 242.
  19. McIlraith (2005), p. 268.
  20. McIlraith (2005), p. 269.
  21. McIlraith (2005), p. 124.
  22. 22,0 22,1 Gifford (2004), p. 179.
  23. McIlraith (2005), p. 125.
  24. Sewe punte is noemenswaardig omdat dit die waarde van ’n verdoelde drie is.
  25. McIlraith (2006), p.164
  26. Gifford (2004), p.189
  27. McIlraith (2006), p.165
  28. McIlraith (2005), p.288.
  29. McIlraith (2005), p. 294.
  30. 30,0 30,1 McIlraith (2005), p. 186.
  31. McIlraith (2005), p.191
  32. 32,0 32,1 32,2 McIlraith (2005), p.302.
  33. McIlraith (2005), p.188
  34. McIlraith (2005), p. 303.
  35. 35,0 35,1 McIlraith (2005), p. 203.
  36. 36,0 36,1 McIlraith (2005), p.310
  37. McIlraith (2005), p.205
  38. McIlraith (2005), p.311
  39. (en) The Moments that Mattered – The Building of the Crusaders’ Dynasty”. URL besoek op 2007-01-10.
  40. (en) Vannisselroy, Brenton, "Super 14 round 11 review", tvnz.co.nz, 2006-04-24. URL besoek op 2007-01-29.
  41. (en) 2006 Super 14 Tournament”. URL besoek op 2007-01-29.
  42. (en) 2006 Super 14 Table”. URL besoek op 2007-01-29.
  43. 43,0 43,1 43,2 (en) "Crusaders shine through the fog to claim title", 2006-05-27. URL besoek op 2007-01-29.
  44. 44,0 44,1 (en) "All Blacks pulled out of the Super 14", planet-rugby.com, 2006-08-20. URL besoek op 2007-01-24.
  45. (en) "Henry reveals his ‘World Cup team’", planet-rugby.com, 2006-09-11. URL besoek op 2007-01-24.
  46. (en) Leggat, David, "Getting the balance in Super 14", nzherald.co.nz, 2006-09-22. URL besoek op 2006-09-24.
  47. (en) "Reconditioning All Blacks to face Stormers", rugbyworld.com, 2007-03-20. URL besoek op 2007-04-08.
  48. 48,0 48,1 (en) "Crusaders crush Force 53-0 in Super 14", thewest.com.au, 2007-04-07. URL besoek op 2007-04-08.
  49. "Rugby: Sharks, Bulls snatch top two spots", herald.co.nz, 2007-05-06. URL besoek op 2007-06-22.
  50. (en) "Bulls, Sharks set up all South African final", herald.co.nz, 2007-05-13. URL besoek op 2007-06-22.
  51. 51,0 51,1 (en) What’s in a name”. crfu.co.nz. URL besoek op 2007-01-10.
  52. (en) New Zealand: Christchurch - the garden city”. goway.com. URL besoek op 2006-09-22.
  53. (en) Canterbury - New Zealand”. christchurchcvb.com. URL besoek op 2006-09-22.
  54. (en) Jade Stadium Christchurch - the full circle”. jadestadium.co.nz. URL besoek op 2006-10-12.
  55. 55,0 55,1 (en) Lammers, Coen, "Timaru gets Crusaders game", The Press (Christchurch), 2005-10-06, pp. D10.
  56. (en) Knowler, Richard, "Bigger is not always better", The Press (Christchurch), 2005-03-14, pp. F2.
  57. McIlraith (2005), p. 42–43.
  58. 58,0 58,1 (en) "Melbourne switch off for double-booked Crusaders", abc.net.au, 2004-11-05. URL besoek op 2006-10-26.
  59. (en) "Mauger slams Melbourne move", keo.co.za, 2006-02-21. URL besoek op 2006-10-15.
  60. 60,0 60,1 60,2 (en) Superrugby Spanbesonderhede (Crusaders)”. Lassen Creative Technologies Ltd. URL besoek op 31 Maart 2010.
  61. 61,0 61,1 Howitt (2005), p. 165
  62. (en) Dan Carter by AllBlacks.com
  63. (en) "Crusaders take the crown", iafrica.com, 2006-05-27. URL besoek op 2007-02-23.
  64. (en) "CRUSADERS", planetrugby.com, 2007-01-30. URL besoek op 2007-02-23.
  65. (en) "Super 14 assistants named", tvnz.co.nz, 2006-10-22. URL besoek op 2007-01-26.

Gedrukte bronne[wysig]

  • Gifford, Phil (2004). The Passion - The Stories Behind 125 years of Canterbury Rugby. Wilson Scott Publishing. ISBN 0-9582535-1-X. 
  • Howitt, Bob (2005). SANZAR Saga - Ten Years of Super 12 and Tri-Nations Rugby. Harper Collins Publishers. ISBN 1-86950-566-2. 
  • McIlraith, Matt (2005). Ten Years of Super 12. Hodder Moa. ISBN 1-86971-025-8. 
  • Palenski, Ron (2003). Century in Black - 100 Years of All Black Test Rugby. Hodder Moa Beckett Publishers Limited. ISBN 1-86958-937-8. 

Eksternal skakels[wysig]

Commons-logo.svg
Wikimedia Commons het meer media verwant aan:
Voorafgegaan deur:
1997 - Blues
2001 - Brumbies
2004 - Brumbies
2007 - Bulls
Super 12/Super 14-kampioene
1998 (1ste) - 1999 (2de) - 2000 (3de)
2002 (4de)
2005 (5de) - 2006 (6de)
2008 (7de)
Opgevolg deur:
2001 - Brumbies
2003 - Blues
2007 - Bulls
2009 - Bulls