Dag van Verootmoediging
Die Dag van Verootmoediging, of Jom Kipoer (יוֹם כִּפּוּר, of יום הכיפורים), is een van die heiligste dae in Judaisme. Die sentrale temas daarvan is verootmoediging en berou. Hierdie dag word tradisioneel gedenk as ‘n heilige dag binne ‘n 25-uur periode van vasting en diepgaande gebed, deur dikwels die hele dag in sinagogedienste deur te bring. Jom Kipoer voltooi die jaarlikse kringloop wat in Judaisme bekend staan as die Hoë Feesdae (of soms "die Dae van Ontsag"). Van seuns onder die ouderdom van 13, en meisies onder 12, word nie verwag om van dagbreek tot sononder te vas nie.
Jom Kipoer is die tiende dag van die maand Tisjrie. Volgens tradisie sou God elke persoon se lot vir die komende jaar op nuwejaarsdag, d.w.s. Rosj Hasjana, in ‘n boek skryf, die Boek van Lewe, en wag op Jom Kipoer om die oordeel te "verseël". Tydens die Dae van Ontsag, streef ‘n gelowige na genoegdoening vir sy of haar lewenswandel en soek vergifnis vir oortredings teen God (bein adam leMakom) en oortredings teen medemense (bein adam legawero). Die aand en dag van Jom Kipoer word opsygesit vir publieke en private pleidooie en skuldbekentenisse (Widoei). Met die afloop van Jom Kipoer, beskou die gelowige hom- of haarself as deur God vergewe.
Die Jom Kipoer-gebedsdiens omvat verskeie unieke aspekte. Een daarvan is die spesifieke getal gebedsdienste. Anders as gewone dae, waarop daar drie gebedsdienste is (Ma'ariv, die aandgebed; Sjagarit, die oggendgebed; en Mienga, die namiddaggebed), of ‘n Sabbat of Jom Tov, wat vier gebedsdienste het (Ma'ariv; Sjagarit; Moesaf, die bykomende gebed; en Mienga), het Jom Kipoer vyf gebedsdienste (Ma'ariv; Sjagarit; Moesaf; Mienga; en Ne'ilah, die afsluitingsgebed). Die gebedsdienste sluit ook ‘n publieke bekentenis van sondes (Widoei) in, en ‘n unieke gebed gewy aan die spesiale Jom Kipoer awodah (diens) van die Kohen Gadol in die Heilige Tempel in Jerusalem.
As ‘n kultuurhoogtepunt onder die Joodse feesdae, word Jom Kipoer gedenk deur vele sekulêre Jode wat miskien nie ander feesdae sal eerbiedig nie. Vele sekulêre Jode besoek sinagoges op Jom Kipoer — vir vele sekulêre Jode is die Hoë Feesdae die enigste jaargetye waartydens ‘n sinagoge besoek sal word,[1]— wat ‘n sameloop van sinagogebywoning meebring, en byna vier-vyfdes sal vas.[2]
Verwysings [wysig]
- ↑ Cohen, S.M., Eisen, A.M.: The Jew within: self, family, and community in America, bladsy 169. Indiana University Press, 2000. "Vir volkome onbetrokke Jode ... is die kwessie van sinagogebesoeke selde tersaaklik. Hulle sal selde ooit aan die saak oorweging skenk, buiten op Rosj Hasjanha en Jom Kipoer, of vir bywoning van ‘n bar of bat mitzwah." Sien ook Samuel C. Heilman, Synagogue Life, 1976.
- ↑ "ynet חדשות היום – סקר ynet-גשר: 63 אחוזים עומדים לצום ביום כיפור", Ynet, 20 Junie 1995. URL besoek op 25 Maart 2011.
