Dasseneilandvuurtoring

Dasseneilandvuurtoring is 'n vuurtoring op Dasseneiland in die Atlantiese Oseaan 55 kilometer van Tafelbaai.

Die 28 meter hoë wit en rooi geverfde gietyster vuurtoring is in 1893 opgerig om skepe te waarsku teen die riwwe en kelpbeddings om die eiland wat gereeld in digte mis uit die koue Atlantiese Oseaan gehul is. Die eilandjie wat skaars 220 hektaar groot is, is in die vroeë 1600's deur seevaarders besoek. Die vuurtoring is een van die belangrikste op die Kaapse seeroete en dit word te alle tye beman. In die verlede het so baie skepe in die omgewing van die eiland vergaan dat skilpaaie en hase op die eiland vrygelaat is om voedsel aan skipbreukelinge te verskaf. Die eiland se naam kom ook van die dassies wat op die eiland agtergelaat is. Die vuurtoringwagter en sy gesin wat op die eiland woon, word elke ses weke per helikopter besoek en vir 'n kort besoek terug gebring na die vasteland.