De Goede Hoop Koshuis
De Goede Hoop is 'n privaat Afrikaans-Christelike koshuis vir mans en vroue wat aan die Universiteit van Pretoria studeer.[1][2] Die koshuis is in 2017 deur die burgerregte-organisasie AfriForum gestig. Die stigting van die koshuis het opslae gemaak omdat dit Afrikaans as enigste kommunikasietaal gebruik en nie die Universiteit van Pretoria se vereiste dat koshuise minstens 43% swart is, toepas nie.[3] In 2017 huisves De Goede Hoop 66 inwoners, waarvan 100% wit is. Een swart student is aanvaar vir verblyf, maar het sy studies gestaak weens finansiële redes.[4]
Die meeste studente van De Goede Hoop is in die ouderdomsgroep 19 tot 25.
Dit is geleë op die hoek van Reitz- en Verdoornstraat in Sunnyside, Pretoria, 1,8 km van die Universiteit van Pretoria (Tuks) se hoofkampus en sowat 3 km van die Groenkloof-kampus.
Stigting[wysig | wysig bron]
Planne om die koshuis te stig het in 2015 ontstaan. In 2016 is voorbereidings sodanig afgehandel dat De Goede Hoop sy deure op 28 Januarie 2017 kon open.[5]
AfriForum se doel met die stigting van die koshuis was om Afrikaanse studente se deelname aan die studentelewe te verseker, nadat dit volgens die organisasie tydens die FeesMustFall-betogings onder druk gekom het. Tydens dié protesoptrede het duisende studente betoog teen hoë klas- en koshuisgeld, en Afrikaans as onderrigtaal. Dit het gelei tot die afskaffing van Afrikaans as onderrigtaal aan die Universiteit van Pretoria.[5]
Cornelius Jansen van Rensburg is die bestuursraadsvoorsitter van die koshuis.[5]
Inskakeling by die Universiteit[wysig | wysig bron]
De Goede Hoop-studentevereniging is in 2016 by die Universiteit van Pretoria as 'n studentevereniging geregistreer.[1] Inwoners van De Goede Hoop sou deur middel van hierdie studentevereniging aan studenteaktiwiteite by die Universiteit kon deelneem,[5][1] maar die studentevereniging is helaas in 2017 deur die Universiteit ontbind.[1]
Kritiek[wysig | wysig bron]
Sowat twee maande nadat die koshuis geopen het, het die karakter daarvan opspraak gewek. Volgens die aktivis Yusuf Abramjee is die karakter "eksklusief" en kom dit neer op segregasie of rasseskeiding.[6] Abramjee het 'n klag by die Universiteit van Pretoria sowel as by die Kommissie vir die Bevordering en Beskerming van die Regte van Kulturele, Godsdienstige en Taalgemeenskappe ingedien.[7]
Reaksie van die Universiteit van Pretoria[wysig | wysig bron]
Volgens Candice Jooste, 'n woordvoerder vir die Universiteit van Pretoria, veroordeel die Universiteit die koshuis "ten sterkste" en distansieer die instelling hom daarvan.[8] Rikus Delport, 'n woordvoerder vir die universiteit, het op 27 Maart 2017 aangekondig dat die Universiteit die koshuis van alle amptelike universiteitsgeleenthede verban het.[1] Delport het ook aangevoer dat die koshuis "diskriminerende toelatingsvereistes" handhaaf.[1]
Verwysings[wysig | wysig bron]
- ↑ 1,0 1,1 1,2 1,3 1,4 1,5 AfriForum, Tuks dreig mekaar oor Afrikaanse koshuis Geargiveer 4 Junie 2017 op Wayback Machine, Netwerk24, 27 Maart 2017, geraadpleeg op 8 Mei 2017.
- ↑ Afrikaans-speaking student res adamant "not exclusive", 702.co.za, 1 mei 2017.
- ↑ UP “60-40” quota a misinterpretation Geargiveer 4 Junie 2017 op Wayback Machine, Perdeby, 2 Mei 2013, geraadpleeg op 4 Mei 2017.
In die artikel staan: "According to the university’s 2011 policy for residence placement, the minimum quota for first-year black students is 43%." - ↑ http://rekordeast.co.za/137703/de-goede-hoop-still-no-answers/
- ↑ 5,0 5,1 5,2 5,3 De Goede Hoop Koshuis 'n tuiste vir enige Afrikaanse Tukkie Geargiveer 29 Maart 2017 op Wayback Machine, AfriForum, 28 Januarie 2017, geraadpleeg op 4 Mei 2017.
- ↑ UP urged to condemn new ‘Afrikaans-only’ residence, The Citizen, 22 Maart 2017, geraadpleeg op 4 Mei 2017.
- ↑ CRL complaint laid against 'Afrikaans only' residence, News24, 23 Maart 2017, geraadpleeg op 4 Mei 2017.
- ↑ UP distances itself from Afrikaans-only residence, EWN.co.za, 24 Maart 2017, geraadpleeg op 5 Mei 2017.