De Bijbelgordel

in Wikipedia, die vrye ensiklopedie
Spring na: navigasie, soek
Gebiede waar Christen-regsgesinde Staatkundig Gereformeerde Partij ’n aansienlike hoeveelheid stemme in 2010 verwerf het, wat nouliks ooreenstem met De Bijbelgordel.

De Bijbelgordel is die naam (gebaseer op die Bible Belt van die Verenigde State) wat gegee word aan ’n strook land in Nederland wat hoofsaaklik deur konserwatiewe Protestante bewoon word. De Bijbelgordel strek van Seeland regdeur die Wes-Betuwe en Veluwe tot by die noordelike dele van die Overijsselprovinsie. Daar is egter gemeenskappe met sterk konserwatiewe Protestantisme wat buite die gordel geleë is. Daar kan byvoorbeeld gekyk word na Urk, wat deur baie as een van die mees tradisievaste gemeenskappe in die land beskou word, sowel as sekere munisipaliteite van Friesland wat eienskappe soortgelyk aan dié binne De Bijbelgordel het. Ander plekke van hierdie gebied sluit Yerseke, Tholen, Ouddorp, Opheusden, Kesteren, Barneveld, Nunspeet, Espeet en Staphorst in. Die grootste drie stede wat as deel van De Bijbelgordel gereken word, is Ede, Veenendal en Kampen. Tans bestaan die tradisionele Nederlandse kerke uit ongeveer 650 000 lidmate in sowat 360 kerke.

Geskiedenis[wysig]

Toe Vlaandere en Noord-Brabant tydens die Tagtigjarige Oorlog deur die Spaanse weermag herower is, het die Protestante voor twee keuses te staan gekom: óf hulle moes tot Katolisisme bekeer óf hulle moes die plek verlaat. Baie het na die noorde van die grens getrek, veral gedurende die Twaalfjarige Wapenstilstand van 1609 – 1621. Baie van hulle het ook beginselvaste ondersteuners van die beweging bekend as die nadere reformatie (verdere hervorming) geword. Na die 1832-skeuring bekend as die Afscheiding en die 1886-skeuring, Doleantie (Doleansie – treurende protes), wat deur Abraham Kuypers gelei is, het hulle van die Nederlandse Hervormde Kerk afgestig en hul eie meer konserwatiewe gemeentes begin. Die bekendste hiervan is die Christelijke Gereformeerde Kerken en die Gereformeerde Gemeentes, wat ook in die volksmond die zwarte-kousenkerken genoem word.

De Bijbelgordel verskil in vele opsigte (o.a. die gereelde kerkbywoning - dikwels twee keer op ’n Sondag) van die tradisionele Katolieke Noord-Brabant en Limburg provinsies tot die suidelike (waar kerkbywoning op ’n Sondag gemiddeld maar 2% tot 3% van die bevolking uitmaak[1]) en die noordelike dele van Nederland wat tradisioneel hoofstroom Protestante is[2] en wat toenemend aan die sekulariseer (met soortgelyke lae kerkbywoningsyfers) is.

Leefwyse en tradisie[wysig]

Die kerk vorm die middelpunt van De Bijbelgordel-gemeenskappe en laasgenoemde sal kenmerkend die hedendaagse liberale Nederlandse denkwyse, soos genadedood, gayregte, aborsie, ens. teenstaan. In De Bijbelgordel-gemeenskappe gaan die sterk godsdienstige lewenswyse gepaard met ’n konserwatiewe lewensbeskouing, voorkeur vir groot gesinne (die streek het ’n redelike hoë vrugbaarheidsyfer) en die klem wat op tradisionele waardes geplaas word. Een aspek van De Bijbelgordel-samelewing wat onlangs nog die algemene Nederlandse publiek se aandag getrek het, is die ouers se agterdog jeens staatsbeheerde inentingsprogramme (sodra die kommer oor die uitbreek van ’n maselsepidemie geopper word). [3][4]

De Bijbelgordel is van groot steun vir die Christen-Demokratiese partye, veral die twee (klein) Christenpartye, naamlik die Staatkundig Gereformeerde Partij en die ChristenUnie.

Verwysings[wysig]

Eksterne skakels[wysig]