Denon

in Wikipedia, die vrye ensiklopedie
Spring na: navigasie, soek
Kabushiki Kaisha Denon
株式会社デノン
Denon Logo svg.png
Tipe Corporation
(handelsmerk in besit van D&M Holdings Inc.)
Gestig 1910
Hoofkantoor Kawasaki, Japan
Industrie Hoëtrou-toerusting
Produkte Oudio- en video-produkte
Webwerf Denon Global

Denon is 'n Japanse maatskappy wat hom op die vervaardiging van hoëtrou-toerusting toegespits het. Die handelsmerk Denon is een van die oudstes van sy soort in Japan en staan vandag dwarsoor die wêreld bekend vir sy gesofistikeerde oudio- en video-toestelle. Die maatskappy het onder meer die voortou geneem om PCM-oudio-tegnologie na die massamark te bring.

Die maatskappy is in 1910 deur Frederick Whitney Horne as Nippon Columbia Co. Ltd. in Japan gestig en het aanvanklik grammofone en eensydige grammofonskywe vervaardig. Nippon Columbia was dekades lank die eienaar van die handelsmerk Denon. In 2001 het Denon 'n onafhanklike aandelemaatskappy in besit van Ripplewood Holdings (98 persent van die aandele) en Hitachi (twee persent) geword en in die volgende jaar met 'n ander bekende Japanse vervaardiger van oudio-toerusting, Marantz, saamgesmelt om die nuwe maatskappy D&M Holdings te vorm.

Geskiedenis[wysig]

Nippon Columbia is oorspronklik in 1910 Nippon Chikuonki Shokai (Japan Recorders Corporation) gestig. Horn het hom in Yokohama gevestig en hier vanaf 1896 masjientoerusting ingevoer. Daarnaas het ook hy ook opnemers na Japan ingevoer.

In 'n poging om 'n Japanse mark vir grammofoonplate en opnemers te skep, het hy in 1907 die onderneming Japan-U.S. Recorders Manufacturing - die eerste van sy soort in Japan - in die lewe geroep. 'n Fabriek, wat plate vervaardig het, is in 1909 in bedryf gestel, en met die oprigting van 'n ateljee het Horn ook begin om self plate op te neem.

'n Denon-kassetbandopnemer (DR-M11) uit die 1980's

In 1910 het Horn met die vervaardiging van opnemers begin. Die luidspreker het destyds nog op 'n groot wynglas gelyk. Die maatskappy Japan Recorders Corporation - die voorloper van Nippon Columbia - het aanvanklik toesig gehou oor die verkoop van Horn se opnemers. In 1912 het die maatskappy met Japan-U.S. Recorders Manufacturing saamgesmelt sodat die harde- en sagteware-aktiwiteite gemeenskaplik bestuur en vervaardiging en bemarking geïntegreer kon word.

In 1927 het die maatskappy 'n ooreenkoms met Columbia, een van die leidende destydse platemaatskappye, aangegaan, en die term Columbia is ook by die Japanse onderneming se naam gevoeg. Met die stigting van Japan Columbia Recorders in 1928 het die etiket Columbia met sy kenmerkende noot-simbool ontstaan.

Die maatskappy se naam is in 1946 gewysig tot Nippon Columbia, en ná die samesmelting met Japan Denki Onkyo (wat algemeen as Den-on bekend gestaan het) is die handelsmerk Denon ingevoer. Den-on, wat in 1939 in die lewe geroep is, het uit 'n groep klankingenieurs bestaan wat hulle op professionele ateljeetoerusting toegespits het. Die maatskappy het destyds platespelers en kassetbandopnemers vir die nasionale Japanse uitsaaikorporasie NHK en ander uitsaaiers ontwikkel en vervaardig.

Gedurende die 1960's het Nippon Columbia begin om sy bedrywighede te diversifiseer, en uiteindelik het die maatskappye 'n wye reeks produkte vervaardig, waaronder plate, hoëtrou-toestelle, televisie-toestelle, musiekinstrumente en elektroniese rekenmasjiene.