Die Vleie

in Wikipedia, die vrye ensiklopedie
Die N2 kruis Swartvlei naby Sedgefield

In die Tuinroete net noord van die ry kusduine tussen Wildernis in die weste en die Goukammarivier in die ooste lê die gebied bekend as Die Vleie. Dit bestaan uit nege mere en lagunes, naamlik die Wildernis-lagune, Onder-Langvlei, Bo-Langvlei, Rondevlei, Swartvlei en sy lagune, Ruigtevlei, Groenvlei, Van Kervelvlei en Ganzvlei.

Die mere[wysig | wysig bron]

By Wildernis vorm die monding van die Touwrivier ‘n strandmeer. Die slangvormige kronkels van die Serpentinerivier verbind die Touw met Onder-Langvlei. Hierdie vlei van 150 ha met sy Dromedariseiland is ook bekend as Eilandvlei. By die ou spoorweghalte vloei die Duiwerivier in dié vlei. Bo-Langvlei word deur ‘n aantal klein spruite gevoed en staan met natuurlike kanale in verbinding met Onder-Langvlei en Rondevlei, maar Rondevlei (143 ha) staan ten spyte van sy nabyheid nie op die oppervlakte met Swartvlei in verbinding nie. ‘n Kanaal verbind Ruigtevlei met die Karatararivier kort voor die rivier uitmond in Swartvlei. Ruigtevlei en Van Kervelvlei (vernoem na die eerste landdros van George) het weinig en soms geen oppervlaktewater nie. Ruigtevlei lê oos van Swartvlei en Van Kervelvlei net noordoos van Groenvlei. Ganzvlei het slegs water in ‘n swaar reënseisoen. Dit is geleë langs die N1-nasionale pad net voor die brug oor die Goukammariver.

Ontstaan[wysig | wysig bron]

Hierdie vleie is nie mere in die werklike betekenis van die woord meer nie. Suid-Afrika het op die Funduzi na geen ware mere nie. Swartvlei is ‘n riviervallei wat deur die styging van die seevlak ondergeloop het. Langvlei is ‘n volgeloopte pan tussen die sandduine en is gevorm toe die seevlak baie hoër was. ‘n Kom wat deur die wind geskep is en mettertyd water begin opgaar het, het Rondevlei geword.

Plant- en dierelewe[wysig | wysig bron]

Die vleie huisves ‘n ryke verskeidenheid van plante en diere. Voor die toetrede van die Parkeraad is die vleie deur die plaaslike inwoners benut vir visvang. In die riete in die vleilande maak ‘n groot aantal voëlsoorte hulle tuis. Die Kaapse otter kom hier voor en rondom die vleie ook kleiner wildsbokke. Aangesien die soutgehalte van die water van vlei tot vlei verskil, is daar verskille in plantegroei. Dit is in 1991 tot Ramsar-vleiland verklaar.

Toerisme[wysig | wysig bron]

Sedert die stigting in 1983 van die Wildernis Nasionale Park (nou deel van die Tuinroete Nasionale Park) word die toerismepotensiaal van die gebied ontsluit. Die Parkeraad het kantore by Ebb and Flow en Rondevlei. Verskeie vakansieoorde is ontwikkel en vasmeerplekke vir seilbote aangelê. Aan die suidekant van Onder-Langvlei is die George Lakes Yacht Club. Tussen die riete langs die Serpentine is ‘n wandelpad. Tussen Rondevlei en Swartvlei is die Kaapse duinmolwandelpad. Voëllewe kan waargeneem word uit skuilings aan die Serpentine naby die Fairy Knowe Hotel, aan die noordekant van Bo-Langvlei en uit ‘n skuiling aan die noordoostekant van Rondevlei.

Trivia[wysig | wysig bron]

Die Touwrivier van die Tuinroete moet nie verwar word met die dorp en rivier met die naam Touwsrivier nie.

Sien ook[wysig | wysig bron]

Bibliografie[wysig | wysig bron]

  • Inligtingstukke beskikbaar by die Tuinroete Nasionale Park
  • Topografiese kaartreeks 1:50 000 Suid-Afrika: 3422BB Sedgefield, 3322DD Karatara, 3322DC en 3422BA Wildernis
  • Topografiese kaartreeks 1:250 000 Suid-Afrika: 3322 Oudtshoorn