Digital Audio Broadcasting

in Wikipedia, die vrye ensiklopedie
Die DAB-kenteken
Die DAB-radio-ontvangstoestel Noxon Nova. Die DAB-uitsaaistandaard maak voorsiening vir bykomende dienste soos radioteks, tyd en programgidse

Digital Audio Broadcasting (kort DAB) is 'n digitale uitsaaistandaard vir die terrestriële ontvangs van radioprogramme. Dit is geskik vir die frekwensieband tussen 30 MHz en 3 GHz en sluit sodoende ook satelliet- en kabelverspreiding in.

DAB is in die tydperk tussen 1987 en 2000 deur die Europese Unie se Eureka-147-projek ontwikkel. 'n Meer gesofistikeerde standaard, wat 'n merkbaar hoër oudiokompressie sonder degradering van die gehalte behels, is onder die naam DAB+ bekend gestel. Danksy DAB+ kan meer digitale radioprogramme via dieselfde kanaal versprei word. DAB en DAB+ word vir die publiek ook as Digital Radio bemark.

Vir die digitale kodering en kompressie van gewone DAB-radioprogramme word die standaarde MPEG-1 Laag 2 of MPEG-2 Laag 2 gebruik (die sogenaamde Musicam-metode). DAB+ maak gebruik van die MPEG-4 HE AAC V2-standaard (kort AAC+).

Beskikbaarheid[wysig | wysig bron]

██ Lande waar DAB-programme op 'n gereëlde basis ontvang kan word ██ Lande waar DAB-dienste tans getoets word ██ Lande wat in DAB-tegnologie belangstel ██ Lande waar DAB-dienste intussen gestaak is
'n Gekombineerde DAB/FM/AM-radio-ontvanger wat deur TEAC vervaardig is

Radioprogramme in die DAB-standaard word tans orals in Duitsland, Switserland, Suid-Tirol, België, Denemarke en die Verenigde Koninkryk uitgesaai. In Frankryk bly die ontvangs van DAB+ beperk tot enkele stedelike gebiede soos Parys, Marseille en Nice (sedert 2014), en Lille, Lyon en Straatsburg (sedert 2018). In Nederland word die nuwe standaard net streeksgewys aangebied. In Italië het privaat uitsaaiers die inisiatief geneem om DAB-gebaseerde radioprogramme in die metropolitaanse gebiede van Noord-Italië te versprei. In Kanada kon DAB-programme in enkele metropolitaanse gebiede in Ontario, Quebec en Brits-Columbië tot 2011 ontvang word, terwyl Oostenryk tussen 2000 en 2008 toetse op die DAB-uitsaaivermoë gedoen het. Hierdie toetsprogramme is intussen gestaak. DAB-programme is in altesaam 40 lande wêreldwyd beskikbaar en kan deur 'n beraamde 500 miljoen luisteraars ontvang word.

In Switserland, die Verenigde Koninkryk en die Italiaanse gewes Suid-Tirol is baie FM-dienste reeds na DAB oorgeskakel. Noorweë was die eerste Europese land waar alle radiostasies, wat landswyd ontvang kan word, vroeg in 2017 na die DAB-uitsaaistandaard oorgeskakel het. Noorweë se DAB-netwerk word as die mees uitgebreide ter wêreld beskou, terwyl sowat 85 persent van Noorse huishoudings reeds oor digitale DAB- of DAB+ radiotoestelle beskik.[1] Plaaslike radiostasies sal nog tot in 2022 Programme volgens die FM-standaard uitsaai.

DAB en DAB+ in Suid-Afrika[wysig | wysig bron]

Suid-Afrika was die eerste Afrikaland waar DAB-toetsdienste in die Band III en die L-Band vanaf 1997 in Johannesburg uitgesaai is.[2] Hierdie toetsprogramme is in November 1999 deur DAB-weergawes van sewe gereëlde FM- en AM-radioprogramme vervang wat oor lisensies vir Gauteng beskik. Die digitale radiokanale word deur openbare en privaat uitsaaiers versprei en bied 'n verskeidenheid programme soos geselsradio, popmusiek, kwaito en klassieke musiek. Een van die programme het vanaf Mei 2000 ook bykomende dienste soos eksperimentele PAD-skyfievertoning en dinamiese etiketdienste aangebied. Danksy die huidige Band III Enkelfrekwensie-netwerk met twee uitsenders, wat in 2001 ingestel is, kan DAB-radioprogramme teoreties deur sowat 18 persent van die Suid-Afrikaanse bevolking ontvang word.

DAB+-toetsprogramme word tans deur die Suid-Afrikaanse Uitsaaikorporasie in samewerking met die Nasionale Vereniging van Uitsaaiers in Johannesburg en Pretoria uitgesaai.[3] Die DAB+ lisensie vir Johannesburg en Pretoria is in Januarie 2019 verleng vir 'n verdere periode van agt maande.[4]

Sien ook[wysig | wysig bron]

  • HD Radio, 'n alternatiewe digitale radiostandaard wat in die Verenigde State ontwikkel is

Bronne[wysig | wysig bron]

  • Fact Sheet DAB+. Gepubliseer deur IMDR - Initiave Marketing Digital Radio / T-Systems International, Bonn, Duitsland

Verwysings[wysig | wysig bron]

  1. "transforming-radio.com: DAB+ in Norwegen. Besoek op 27 Maart 2019". Geargiveer vanaf die oorspronklike op 27 Maart 2019. Besoek op 27 Maart 2019.
  2. "www.worlddab.org: Suid-Afrika". Geargiveer vanaf die oorspronklike op 17 Desember 2010. Besoek op 28 Mei 2010.
  3. "World DAB News - South Africa. Besoek op 5 Junie 2016". Geargiveer vanaf die oorspronklike op 15 April 2017. Besoek op 5 Junie 2016.
  4. "World DAB: Country information South Africa. Besoek op 27 Maart 2019". Geargiveer vanaf die oorspronklike op 27 Maart 2019. Besoek op 27 Maart 2019.

Eksterne skakels[wysig | wysig bron]