E-Werk
Die E-Werk in Wilhelmstraße 43 in die Berlynse stadsdeel Mitte is 'n voormalige kragsubstasie wat tot argitektoniese monument verklaar is. In die tydperk tussen 1993 en 1997 was dit een van die voorste musiekklubs vir tegnomusiek. Die klub is deur Hille Saul, Andreas Rossmann, Ralf Regitz en Lee Waters bestuur.[1]
In 1994 is Chromapark as die eerste groot uitstalling, wat uitsluitlik aan tegnokuns gewy was, hier gehou. Permanente diskjokkies was DJ Disko, DJ Clé, Jonzon, Woody, Terry Belle en Hazel B uit Engeland. Die wêreld se DJ-elite het tydens talle konserte hier opgetree. Op Vrydae het sogenaamde Dubmission-partyjies met bekende plaaslike diskjokkies soos Kid Paul en Paul van Dyk in die E-Werk plaasgevind. Op 24 Julie 1997 het die tegnoklub sy deure vir goed gesluit.
Die E-Werk is vervolgens deur die Berlynse argitekte-ateljee HSH Architektur omgebou en in 2005 heropen om as kwartier vir 'n verskeidenheid kuns- en ander gebeurtenisse te dien. Intussen huisves die gebou kantore en het ondernemings soos ÖPP Deutschland AG, Anne Will Media of MyHammer/abacho hier hulle hoofkwartiere.
Verwysings[wysig | wysig bron]
- ↑ "ewerk.net: Geskiedenis 1990-1999". Geargiveer vanaf die oorspronklike op 1 Maart 2014. Besoek op 17 Oktober 2012.
Eksterne skakels[wysig | wysig bron]
 |
Wikimedia Commons bevat media in verband met Abspannwerk Buchhändlerhof. |