Elio Di Rupo
Elio Di Rupo (* 18 Julie 1951 in Morlanwelz, Hainaut) is 'n Belgiese politikus van die Parti Socialiste (PS). Sedert 6 Desember 2011 beklee hy die amp van eerste minister van België.
Di Rupo is die seun van Italiaanse immigrante en was baie jare lank afgevaardigde in die Belgiese parlement. Hy het as minister in die federale regering gedien en twee keer die amp van premier van die Waalse Gewes beklee. Sedert 1999 fungeer Di Rupo as voorsitter van die PS en sedert 2001 as burgemeester van Mons. Elio Di Rupo, wat in België vir sy vlinderdas bekend staan, dra die eretitel "staatsminister".
Opleiding [wysig]
Di Rupo is een van sewe kinders van 'n Italiaanse gasarbeidergesin wat hulle in 1947 in België gevestig het. Sy pa is in Julie 1952 in 'n padongeluk oorlede sodat die kinders deur hul ma in moeilike omstandighede grootgemaak moes word. Vir Elio was dit al vroeg duidelik dat hy sy toekoms slegs deur 'n goeie opleiding sou kon verseker.
Di Rupo het 'n akademiese opleiding opleiding as skeikundige ontvang en 'n doktorsgraad aan die Université de Mons-Hainaut verwerf. Hier het Di Rupo ook 'n politieke bewussyn begin ontwikkel en by die Sosialistiese Party aangesluit waar hy erkenning vir sy humanistiese ideale van sosiale geregtigheid en vryheid van die indiwidu geniet.
Op 13 Februarie 1983 het Di Rupo die internasionale filmfees Festival international du film d'amour in die lewe geroep.
