Ernest Oppenheimer

in Wikipedia, die vrye ensiklopedie
Spring na: navigasie, soek
Sir Ernest Oppenheimer.

Ernest Oppenheimer (oorspronklik Ernst Oppenheimer, * 22 Mei 1880 in Friedberg (Hesse, Duitsland); † 25 November 1957 in Brenthurst, Johannesburg) was 'n bekende Suid-Afrikaanse sakeman en die stigter van die diamantekartel, wat deur die maatskappy De Beers beheer is.

Ernest Oppenheimer was die vyfde seun van 'n Duits-Joodse[1] sigarehandelaar in die dorp Friedberg. Ná sy leerjare in Londen (1896-1902) het hy vir die juwelehandelaar Anton Dinkelsbuhler in Kimberley (Suid-Afrika) gewerk, die destydse sentrum van die diamantebedryf. In 1906 het hy sy leerskap voltooi en in Londen met Mary Lina Pollock, die dogter van 'n beursmakelaar, getrou. Ná sy terugkeer na Kimberley het hy eers 'n lid van die stadsraad en later, op 32-jarige leeftyd, burgemeester geword.

Die Duitse Vloot se torpedering van die passasierskip Lusitania tydens die Eerste Wêreldoorlog het tot anti-Duitse onluste gelei, en Oppenheimer het in 1915 na Engeland geëmigreer. Hy het Britse burgerskap aanvaar en sy voornaam na Ernest gewysig.

Nogtans het Oppenheimer een jaar later na Suid-Afrika teruggekeer om in Johannesburg die mynboumaatskappy Anglo-American Corporation te stig. Danksy die handel met grondstowwe het Anglo-American tot een van die belangrikste mynboumaatskappye ter wêreld gegroei. Oppenheimer het die onderneming na 'n aantal Afrikalande uitgebrei en daarnaas ook aandele van De Beersverkry. In 1929 het hy voorsitter van De Beers Consolidated Mines Bpk. geword.

Tydens die Groot Depressie het hy in 1930 die internasionale diamantemarkte begin leegkoop en sy wêreldwye monopolie onder die naam Central Selling Organisation gevestig. Voortaan het dié monopolie met sy 180 lede die wêreldmark vir diamante beheer.

Tydens die Tweede Wêreldoorlog het hy 'n aansoek van die Amerikaanse president Franklin D. Roosevelt geweier om industriële diamante aan die Verenigde State te verskaf - uit vrees vir 'n daling in die diamanteprys. Oppenheimer is in die Verenigde State vervolgens tot "ongewenste persoon" verklaar, en alle bedrywighede van De Beers is weens 'n oortreding van die Amerikaanse anti-kartel-wette verbied.

Met Sir Ernest Oppenheimer se afsterwe in 1957 het sy seun Harry die leiding van die maatskappy oorgeneem. Die Central Selling Organisation is in 2001 ontbind, nadat dit 'n slegte reputasie opgebou het. In 2004 was De Beers van voorneme om in die Verenigde State skuldig te pleit op 'n moontlike aanklag van kartelvorming.

Verwysings[wysig]