Ernie Els
Theodore Ernest "Ernie" Els (gebore op 17 Oktober 1969 in Johannesburg) is 'n professionele Suid-Afrikaanse gholfspeler. Hy is ook bekend onder sy bynaam "The Big Easy", omdat hy in vergelyking met ander gholfspelers groot gebou is en tog 'n vloeiende, oënskynlik moeitelose swaai het.
Els is een van die beste gholfspelers aan die einde van die twintigste en begin van die een-en-twintigste eeu. Hy word as die beste wedstrydspeler ter wêreld beskou en wen in 2007 reeds vir die sewende keer die Volvo Wêreld Wedstrydspeler Kampioenskappe op Wentworth, waar hy 'n huis het.
Oor sy professionele loopbaan het hy vier-en-sestig toernooie gewen, waaronder vier "majors": die Amerikaanse Ope (in 1994 en 1997) en die Britse Open (2002 en 2012). Hy wen ook die Dunhill Kampioenskappe in 2006, hoewel sy knie net vier maand vroeër na 'n watersportongeluk geopereer is.[1]
Els speel orals oor die wêreld heen, nie net om toernooie te speel nie, maar ook om die sport te bevorder. Hierdeur het hy al met die USPGA (Vereniging van Amerikaanse Beroepsgholfers) in konflik gekom, wat wil hê dat hy meer gereeld in die Verenigde State moet speel.
