Ferdi Hartzenberg

in Wikipedia, die vrye ensiklopedie
Spring na: navigasie, soek
Ferdi Hartzenberg

Minister van Onderwys en Opleiding
Ampstermyn
1979 – 1982
President PW Botha

Adjunk-minister van Ontwikkeling
Ampstermyn
1978 – 1979

Leier van die Konserwatiewe Party
Ampstermyn
April 1993 – 2004
Voorafgegaan deur Dr. Andries Treurnicht
Opgevolg deur Amp afgeskaf

Persoonlike besonderhede
Gebore 8 Januarie 1936 (1936-01-08) (78 jaar oud)
Lichtenburg, Suid-Afrika
Politieke party NP (1959 - 1982)
KP (1982 - 2004)
VF+ (2004 - )
Alma Mater Universiteit van Pretoria

Ferdinand Hartzenberg (* 8 Januarie 1936 in Lichtenburg) was ’n Suid-Afrikaanse politikus en die tweede en laaste leier van die Konserwatiewe Party in Suid-Afrika tussen 1993 tot sy samesmelting met die Vryheidsfront in 2004.

Hartzenberg is in 1936 in Lichtenburg gebore en het skool gegaan op Sannieshof Primêre Skool en die Hoër Volkskool in Potchefstroom. Aan die Universiteit van Pretoria verwerf hy die volgende grade: B.Sc. (Landbou), M.Sc. (Landbou), D.Sc. (Landbou). Hy het ’n aktiewe rol gespeel op die Verteenwoordigende Studenteraad en die Afrikaanse Studentebond en het vir die Nasionale Party (NP) tydens verkiesingsveldtogte gewerk.

Vanaf 1959-1960 dien hy as sekretaris van die NP-streeksraad vir Rissik en later op die Afdelingsraad vir Lichtenburg. In 1964 is hy genomineer as ’n kandidaat vir die Transvaalse Provinsiale Raad en wen die volgende jaar die setel. In 1970 het hy LP vir Lichtenburg geword.

In 1976 is hy aangestel as adjunk-minister van Ontwikkeling en in 1979 is hy bevorder tot Minister van Onderwys en Opleiding in die regering van P.W. Botha, 'n pos wat hy tot Maart 1982 beklee het. As een van die meer konserwatiewe lede van die regerende Nasionale Party (NP) was hy ontevrede oor die beleid van magsdeling wat Botha voorgestaan het in terme van ’n parlement waarin Blankes, Indiërs en Kleurlinge sou deelneem. Saam met dr. Andries Treurnicht en ander NP-lede, het hy die NP in 1982 verlaat om die Konserwatiewe Party (KP) te stig. Hartzenberg is as adjunk-leier van die nuwe party verkies.

Hartzenberg het die leier van die KP geword na Treurnicht se dood in April 1993. Hy het dus die hoof van die amptelike opposisie in die Blanke kamer van die Suid-Afrikaanse Parlement geword, ’n posisie wat hy beklee het tot die eerste demokratiese algemene verkiesing in April 1994.

Die Konserwatiewe Party het geweier om deel te neem aan die algemene verkiesing van 1994 en het daarmee hul parlementêre verteenwoordiging verloor. Sonder enige parlementêre verteenwoordiging het die KP vinnig sy steunbasis verloor, met die konserwatiewes wat deur genl. Constand Viljoen van die Vryheidsfront verteenwoordig is. Aan die einde van 2003 het die KP saamgesmelt met die Vryheidsfront en die Afrikaner Eenheidsbeweging om ’n nuwe party bekend as die Vryheidsfront Plus (VF+) te stig. Hartzenberg het egter uit die aktiewe politiek getree.