Festival International de la Bande Dessinée d'Angoulême

in Wikipedia, die vrye ensiklopedie
Spring na: navigasie, soek
'n Stalletjie tydens die fees van 2003

Die Festival International de la Bande Dessinée d'Angoulême ("Internasionale Strokiesprentfees van Angoulême") is die beduidendste Europese strokiesprentfees wat sedert 1974 jaarliks in Januarie in die Wes-Franse stad Angoulême gehou word.

Die fees het sy oorsprong in 'n uitstalling, Dix millions d'images ("Tien miljoen beelde"), wat in 1972 in Angoulême plaasgevind het en só suksesvol was dat die besluit geneem is om meer soortgelyke uitstallings en uiteindelik ook 'n fees te organiseer. Die eerste strokiesprentfees in sy huidige vorm is op 25 Januarie 1974 geopen. In die volgende jare is die fees steeds verder uitgebou en bekende strokiesprent-tekenaars soos Hergé, Will Eisner en Moebius het 'n besoek aan die strokiesprentfees afgelê. Na mate die fees meer bekendheid verwerf het, is na Angoulême ook as die Franse "Stad van die Strokiesprent" verwys.

Die fees van die jaar 2009, wat op 29 Januarie geopen is, het met sy uitstalling oor Suid-Afrikaanse strokiesprente ook Afrikaanse bydraes tot hierdie genre soos Conrad Botes en Anton Kannemeyer se Bitterkomix aan die internasionale publiek bekend gestel.[1]

Sedert 1974 ken deskundige beoordelaars 'n reeks toekennings in verskillende kategorieë aan strokiesprent-tekenaars toe. Die eerste wenners was onder meer Christian Godard, Victor de la Fuente en Roy Thomas. Met die "Groot Prys van die Stad Angoulême" of Grand Prix de la Ville d'Angoulême word tekenaars vir hul lewenswerk of hul buitengewone betekenis in die geskiedkundige ontwikkeling van die strokiesprent vereer.

Verwysings[wysig]