Florence Court

in Wikipedia, die vrye ensiklopedie
Spring na: navigasie, soek
Florence Court

Florence Court is 'n afgeleë 18de eeuse herehuis en landgoed agt myl suidwes van Enniskillen in die Noord-Ierse graafskap Fermanagh. Die herehuis is in 'n beboste landskap in die voetheuwels van die Cuilcagh-bergreeks geleë, naby die gelyknamige dorp, en word tans saam met die naburige Coole-kasteel deur die National Trust bestuur.

Florence Court was oorspronklik in besit van die Cole-familie, die latere grawe van Enniskillen, wat die herehuis in verskillende boufases laat oprig het. Die sentrale hoofgebou met drie verdiepings het vanaf 1750 ontstaan, terwyl die arkadevleuel later bygevoeg is. Die huis en landgoed is in 1953 deur die National Trust aangekoop, net vyf jaar voordat die boonste verdiepings deur 'n brand vernietig is. Die herehuis is intussen tot sy oorspronklike glorie gerestoureer, alhoewel enkele vertrekke tans nog nie vir die publiek toeganklik is nie. Florence Court staan veral bekend vir sy keurige rokoko-versierings en kosbare Ierse meubilering. Baie oorspronklike meubelstukke, wat vroeër verkoop is, is intussen herkoop.

'n Ommuurde tuin maak deel uit van die landgoed. Hier word plante uit die gematigde en halftropiese klimaatstreke vertoon, insluitende die bekende Florencecourt-taksusboom, terwyl besoekers ook 'n water-aangedrewe saagmeul, 'n yshuis, 'n fontein wat deur 'n natuurlike bron gevoed word. Die Larganess-rivier vloei deur die landgoed wat grotendeels uit weilande en bosse bestaan. Die laasgenoemde lewer die gewilde Ierse taksusboomhout (Taxus baccata) op.