Flytoget

in Wikipedia, die vrye ensiklopedie
Spring na: navigasie, soek
'n Flytoget-hoëspoedtrein in Oslo se hoofstasie

Flytoget (Afrikaans: "Lughawe-sneltrein") is 'n hoëspoedtreindiens wat die Oslo-lughawe in Gardermoen met die Noorse hoofstad Oslo verbind. Die treindiens word deur die maatskappy Flytoget AS op die Gardermobanen-hoëspoedtrajek bedryf. Treine bereik 'n maksimale snelheid van 210 kilometer per uur sodat die reistyd tussen Oslo se hoofstasie (Oslo Sentralstasjon, Oslo S) en die lughawe tot 19 minute verkort word. Treine vertrek op werkdae elke tien minute (behalwe vir Saterdae wanneer treine slegs elke twintig minute vertrek).

Die hoëspoedtreindiens is in 1998 ingestel nadat Oslo se internasionale lughawe vanuit Fornebu na Gardermoen, 'n landelike gebied noord van die stad, verskuif is. Dit is tans die enigste hoëspoedtreindiens in die land.

Sowat die helfte van die treine loop sonder om te stop tussen die lughawe en Oslo S, terwyl die ander treine ook voorstede in die ooste en weste van Oslo op die spoorlyn Gardermoen - Lillestrøm - Oslo S - Nationalteateret - Skøyen - Lysaker - Sandvika - Asker bedien. Sowat 'n derde van alle passasiers van Oslo-lughawe ry op die Flytoget-treine, en die treindiens het sodoende die grootste markaandeel van alle lughawe-treine ter wêreld. Die treinvloot bestaan uit 16 BM71 elektriese eenhede wat deur Adtranz (tans 'n dogtermaatskappy van die Kanadese vervaardiger Bombardier) gebou is.

Geskiedenis[wysig]

'n Flytoget-trein in die Nationalteateret-stasie

Toe die Noorse parlement, die Stortinget, in 1992 die besluit geneem het om 'n nuwe lughawe in Gardermoen te bou het hulle hul ten gunste van treine as die hoofsaaklike vervoermiddel uitgespreek en sodoende die bou van nuwe hoëspoedtrajekte en -treine asook die integrasie van die lughae se stasie in die hoofterminaalgebou bevorder.

Boubedrywighede het in 1994 begin en was in 1999 voltooi. 66 kilometer se nuwe hoëspoedspoorweë is gebou waarvan 13,8 kilometer deur die Romeriksporten-tonnel loop. In 1997 is naas ander tegniese probleme lekkasies in die tonnel ontdek sodat die projek vertraag is en koste gestyg het.

Op 8 Oktober 1998 is die Oslo-lughawe in Gardermoen (OSL) saam met 'n gedeelte van die trajek noord van Lillestrøm ingewy, maar die Lughawe-sneltrein was gedwing om verby Romeriksporten te ry. Die treindiens is eers met die tonnel se inwyding op 22 Augustus volledig in bedryf gestel.

Die treindiens is oorspronklik deur die maatskappy NSB Gardermobanen AS bedryf, 'n dogtermaatskappy van die Noorse Spoorweë (Norges Statsbaner). In 2001 is die maatskappy egter deur die Noorse Departement van Handel oorgeneem, en die naam is gewysig tot Flytoget AS.

Eksterne skakels[wysig]

Commons-logo.svg
Wikimedia Commons het meer media verwant aan:
Flytoget (kategorie)
TGV Hoëspoedtreine
Acela Express | Aérotrain | AGV | AVE | Eurostar | Eurostar Italia | Flytoget | InterCityExpress | JR-Maglev MLX01 | Magneetsweeftreine | Pendolino | Sapsan |
Shinkansen | TGV | Thalys | Treno Alta Velocità | Transrapid | X 2000