Fox Mulder

in Wikipedia, die vrye ensiklopedie
Spring na: navigasie, soek
Fox Mulder

Fox William Mulder is ’n denkbeeldige FBI Spesiale Agent, wat in die Amerikaanse Fox-televisiereekse, The X-Files en The Lone Gunmen optree, waar die wetenskapfiksieprogramme handel oor regeringsameswerings met die doel om die waarheid omtrent ruimtewesenlike bestaan te ontken of in die duister te hou.

Hy werk saam met sy FBI-kollega, Dana Scully, in die X-Argiewe kantoor, wat bemoei is met sake wat buitengewoon geheimsinnig of deur moontlik paranormale omstandighede onopgelos en deur die FBI in die doofpot gestop is. David Duchovny, ’n Amerikaanse akteur, vertolk die rol van Mulder. Hierdie hoofkarakter is tot die eerste sewe reekse beperk, waarna hy as terugkerende karakter in die laaste twee reekse te sien is, merendeels omrede Duchovny met sy loopbaan wou aanbeweeg. Mulder verskyn die eerste maal in die eerste reeks se Pilot-tussenverhaal, wat in 1993 uitgesaai is. Mulder is oortuig dat vreemde vlieënde voorwerpe (VVV’s) bestaan, sowel as ’n gepaardgaande regeringsameswering wat die waarheid omtrent die bestaan van hierdie wesens probeer muilband. Mulder stel die X-Argiewe en die waarheid verberg deur die vermeende sameswering só hoog op prys, dat hy sy hele lewe daaraan wy.

Lewensgeskiedenis[wysig]

Mulder is Vrydag, 13 Oktober 1961 in Chilmark, Massachusetts vir Bill en Teena Mulder gebore, [1][2] hoewel dit later vorendag gebring word dat die Sigaretrokende Man Mulder se eintlike biologiese vader is. [3] Samantha Mulder, wat 22 Januarie 1964 gebore is [4], is sy halfsuster, terwyl Jeffrey Spender sy halfbroer is. [3]Die Mulder-gesin het ’n vakansiehuis in Quonochontaug, Rhode Island gehad, waar Fox en Samantha hul somervakansies deurgebring het. [5][6] Op 27 November 1973 het Samantha skielik geheimsinnig spoorloos uit hul huis in Chilmark, Massachusetts te Martha’s Vineyard verdwyn - ’n gebeurtenis wat die Mulder-gesin, veral Fox, diep geraak het. Die ondersoek wat gevolg het kon geen bewysstukke oplewer nie. Mulder se ouers is kort hierna in ’n egskeiding betrokke. [5] Nadat Mulder hipnose ondergaan het, is daar bevind dat sy suster deur ruimtewesens ontvoer is. [7]

Hierdie verdwyning van sy suster, sowel as Mulder se daaropeenvolgende soektog na haar, het later die dryfkrag van sy hele bestaan geword. [2]. Mulder het vanaf 1983 aan die Universiteit van Oxford die sielkunde studeer, waarna hy by die FBI op 24 Oktober 1986 aangesluit het, hoewel daar onduidelikhede is rakende die dag toe hy sy Quantico Akademie-kursus begin en klaargemaak het. [8] Na Mulder se graadkry by die Akademie het hy sy loopbaan geskoei by die Gedragswetenskapeenheid (sielkundige profilering) onder leiding van Agent Bill Paterson, met wie hy ’n werksverhouding ontwikkel het. [9]

Fox Mulder se kantoor

Mulder het later by die Geweldsmisdaadeenheid gewerk, terwyl hy paranormale verskynsels in sy vrye tyd nagejaag het. In 1991 maak Mulder saam met Spesiale Agent Diana Fowley weer die X-Argiewe oop, waar laasgenoemde kort daarna Mulder alleen in Die X-Argiewe Eenheid agterlaat. [10] Dana Scully is in Maart 1992 tot Die X-Argiewe Taakspan toegevoeg, met die oogmerk dat sy haar wetenskaplike agtergrondkennis sou gebruik om Mulder se werk rondom die X-Argiewe wetenskaplik-beredenerend te evalueer. [7]

Mulder se eintlike doelwit was om ’n regeringsameswering, wat die waarheid omtrent ruimtewesenlike bestaan besluier het, oop te vlek. Sodoende sou hy agter die kap van die byl kon kom wat met sy suster gebeur het. [7]

Mulder se soektog en oortuiging omtrent die bestaan van ruimtewesens het hoofsaaklik die meerderheid van die reekse se intrige aangevuur. Gedurende die tydperk ná die kanker in Scully begin kwyn het, is hy egter deur Michael Kritschgau oortuig dat ruimtewesens nie werklik bestaan nie; die samesweerders het hierdie versinsel bloot gebruik om Mulder van stryk te bring. [11][12]

Hy ontdek uiteindelik, gedurende die sewende reeks, die waarheid wat sy suster oorgekom het. Samantha is ontvoer (hetsy deur ruimtewesens of deur regeringsamesweerders), waarna verskeie wetenskaplike toetse op haar uitgevoer is. Sy is daarna weer aan die Sigaretrokende Man oorgelaat, onder wie se wakende oog sy sou deurbring terwyl nog bykomende toetse ondergaan word. Samantha kon nie langer enige toetse verduur nie – sy het van haar blyplek weggehardloop en is by ’n nabygeleë hospitaal opgeneem. Sy het agter haar gegrendelde kamerdeur weereens verdwyn. Dit word later onthul dat Samantha deur ,,geestelike tussenbeidekoms”, met behulp van skepsels genaamd ,,Walk-ins”, weggeneem is. Mulder is vir ’n kort oomblik met Samantha se gees herenig. [13]

Mulder is self ook in 2000 deur ruimtewesens weggevoer, waar hy ’n paar maande later halfdood na die aarde terugbesorg is. [14] Hy is vir ’n tweede keer deur ’n ruimtewese-virus besmet, hoewel Scully dit reggekry het om hom te red. [15] Nadat Mulder na sy woonstel teruggekeer het, is ’n aansoek deur die FBI toegestaan om hom by die X-Argiewe weer indiens te neem, maar is afgewys deur die adjunkdirekteur, Alvin Kersh, wie intussen Mulder se pos, kort ná sy ontvoering, gevul het. Mulder het ’n rukkie gewerk, [16] maar is afgedank omrede hy die opdrag om nie die X-Argiewe te ondersoek nie, verontagsaam het. [17] Ná die geboorte wat Scully aan William geskenk het, moes Mulder om lewensonthalwe na Nieu-Mexiko vlug, nadat hy ’n wenk van Kersh ontvang het. [18] Binne ’n jaar het Mulder beslissende inligting by ’n geheime inrigting bekom omtrent die dag wanneer die geraamde ruimtewese-kolonisering sou plaasvind, maar is op heterdaad betrap, in hegtenis geneem en van die moord op Knowle Rohrer aangekla. Hoewel Walter Skinner oor `n groot verdedigingsliggaam beskik het wat in Mulder se guns getuig het, is Mulder steeds ter dood veroordeel. Met behulp van afsonderlike mense, waarvan ’n hervormde Kersh en die spook van Alex Krycek deel uitgemaak het, ontsnap Mulder uit die tronk en slaan met Scully op die vlug. Vanaf die slotreeks was Mulder en Scully voortdurend op die vlug. [19] Ses jaar later, ná die gebeurtenisse wat in die negende reeks afgespeel het, word Mulder nie meer as ’n voortvlugtige gereken nie. Scully vermeld dat hy deur die FBI gesoek word, terwyl ’n tweegesprek die kyker daarop inlig dat die FBI nie werklik op hom jag maak nie. Hulle is trouens tog te bly dat Mulder uit die pad is. Hy is wel later gevra om bystand te verleen met die ondersoek rakende ’n vermiste FBI-agent. In ruil hiervoor is alle aanklagtes teen Mulder laat vaar. [20]

Karakterskets[wysig]

Ondanks sy afsydigheid en siniese humorsin , vertoon Mulder ’n uitgelate geesdrif en belangstelling sodra die paranormale ter sprake kom, veral vanweë sy persoonlike betrokkenheid ná sy suster se ontvoering. [7] Walter Skinner en verskeie van die ander werknemers in die afdeling het bekommerd begin raak oor Mulder se onprofessionele gedrag: hy het sy persoonlike gevoelens by verskeie ondersoeke begin insleep. Sy beheptheid met die VVV-sake raak selfs erger regdeur die reeks, nie omrede sy suster se ontvoering slegs hiermee te make het nie, maar ook omdat Dana Scully op die ou einde ontvoer word, met die gepaardgaande kanker wat hieruit voortgespruit het. [13] Sodra Scully in `n voorval betrokke is, raak Mulder gou uit sy humeur – by meer as een voorval het hy onprofessioneel sy vuurwapen dreigend gebruik en buite sy aard gewelddadig geraak. [21] Mulder se oorbeskermende gedrag waar Scully betrokke is, spruit nie alleenlik uit sy vanselfsprekende gehegtheid en liefde wat hy teenoor haar koester nie, maar ook uit die skuldgevoelens wat hy saam met hom rondkarwei. Mulder het erken dat hy indirek verantwoordelik voel vir Scully se ontvoering, sowel as vir die kanker, die onvrugbaarheid wat dit veroorsaak het, en haar suster en dogter se dood.

Tydens die ,,Drive”-episode vra Mulder names die ,,wêreldwye Joodse sameswering” grappenderwys om verskoning, as reaksie teen ’n verdagte se mishandelende en anti-Semitiese uitvalle. Die verdagte maak bloot uit Mulder se van ook die afleiding dat Mulder van Joodse afkoms moet wees. [22] Tog is Mulder in die ,,Kaddish”-episode nie in staat om ’n Talmoediese boek te herken nie, hy gee ietwat weemoedig te kenne dat hy nie Hebreeus verstaan nie en insinueer dat Jesus uit die dood opgestaan het. [23] Net soos sy oorlede vader, [24]het Mulder ook ’n Christelike begrafnis gehad, wat deur ’n Protestante predikant gelei is [15]. Dit doen aan die hand dat Mulder uit ’n Protestante agtergrond heet, wat teenstellend is teenoor Scully, wat ’n Katoliek is. [25] Hy soek ook rustigheid op by ’n Christelike kerk ná die gebeurtenisse wat in die ,,Conduit”-episode plaasgevind het. [4] Mulder kan natuurlik ’n Joodse afstammeling wees wat in ’n Christelike agtergrond grootgeword het, moontlik weens voorvaderlike huweliksverbindinge of bekering. Tydens ’n onderhoud gedurende die tweede reeks, het David Duchovny beweer dat Mulder Joods is. [26]

Mulder slaap bykans nooit in ’n bed nie. Die woonstelslaapkamer word klaarblyklik net as bergplek gebruik: dit is tot die plafon toe vol gemors gestapel, waaronder ’n paar dose pornografiese tydskrifte ook van melding gemaak kan word. [2] Mulder slaap in plaas hiervan op sy rusbank, waar hy dikwels voor `n sketterende beeldradio insluimer. Dit wil ook voorkom of Mulder maniese fases beleef wanneer hy bekommerd is of aan ’n saak werk, wat sy geneigdheid tot slaaploosheid verder aanwakker. [27] Sedert ,,Dreamland II” waar ’n ,Man-in-Swart’ met Mulder liggame ruil, en op hierdie manier sy lewe oorneem, vind Mulder sy slaapkamer opgeknap en met ’n waterbed toegerus. [2] In ,,Monday” word Mulder deurweek toe sy waterbed (waarvan hy geen kennis dra nie) begin lek het. [28]

Verwysings[wysig]

  1. "Paper Clip". Rob Bowman. The X-Files (Fox). http://en.wikipedia.org/wiki/Paper+Clip+%28The+X-Files%29. No. 2, season 3. 
  2. 2,0 2,1 2,2 2,3 "Dreamland". Kim Manners & Michael Watkins. The X-Files (Fox). http://en.wikipedia.org/wiki/Dreamland+%28The+X-Files%29. No. 4 & 5, season 6. 
  3. 3,0 3,1 "William". David Duchovny. The X-Files (Fox). http://en.wikipedia.org/wiki/William+%28The+X-Files%29. No. 16, season 9. 
  4. 4,0 4,1 "Conduit". Daniel Sackheim. The X-Files (Fox). http://en.wikipedia.org/wiki/Conduit+%28The+X-Files%29. No. 3, season 1. 
  5. 5,0 5,1 "Little Green Men". David Nutter. The X-Files (Fox). http://en.wikipedia.org/wiki/Little+Green+Men+%28The+X-Files%29. No. 1, season 2. 
  6. "Talitha Cumi". R.W. Goodwin. The X-Files (Fox). http://en.wikipedia.org/wiki/Talitha+Cumi+%28The+X-Files%29. No. 24, season 3. 
  7. 7,0 7,1 7,2 7,3 "Pilot". Robert Mandel. The X-Files (Fox). http://en.wikipedia.org/wiki/The+X-Files+%28pilot+episode%29. No. 1, season 1. 
  8. "Unusual Suspects". Kim Manners. The X-Files (Fox). http://en.wikipedia.org/wiki/Unusual+Suspects. No. 3, season 5. 
  9. "Grotesque". Kim Manners. The X-Files (Fox). http://en.wikipedia.org/wiki/Grotesque++%28The+X-Files%29. No. 14, season 3. 
  10. "The End". R. W. Goodwin. The X-Files (Fox). http://en.wikipedia.org/wiki/The+End+%28The+X-Files%29. No. 20, season 5. 
  11. "Gethsemane". R. W. Goodwin. The X-Files (Fox). http://en.wikipedia.org/wiki/Gethsemane+%28The+X-Files%29. No. 24, season 4. 
  12. "Redux". R. W. Goodwin & Kim Manners. The X-Files (Fox). http://en.wikipedia.org/wiki/Redux+%28The+X-Files%29. No. 1 & 2, season 5. 
  13. 13,0 13,1 "Closure". Kim Manners. The X-Files (Fox). http://en.wikipedia.org/wiki/Closure+%28The+X-Files%29. No. 11, season 7. 
  14. "Requiem". Kim Manners. The X-Files (Fox). http://en.wikipedia.org/wiki/Requiem+%28The+X-Files%29. No. 22, season 7. 
  15. 15,0 15,1 "Deadalive". Tony Wharmby. The X-Files (Fox). http://en.wikipedia.org/wiki/Deadalive+%28The+X-Files%29. No. 15, season 8. 
  16. "Three Words". Tony Wharmby. The X-Files (Fox). http://en.wikipedia.org/wiki/Three+Words+%28The+X-Files%29. No. 16, season 8. 
  17. "Vienen". Rod Hardy. The X-Files (Fox). http://en.wikipedia.org/wiki/Vienen+%28The+X-Files%29. No. 17, season 8. 
  18. "Existence". Kim Manners. The X-Files (Fox). http://en.wikipedia.org/wiki/Existence+%28The+X-Files%29. No. 21, season 8. 
  19. "The Truth". Kim Manners. The X-Files (Fox). http://en.wikipedia.org/wiki/The+Truth+%28The+X-Files%29. No. 19 & 20, season 9. 
  20. "I Want to Believe". Chris Carter. The X-Files (Fox). http://en.wikipedia.org/wiki/The+X-Files%3A+I+Want+to+Believe. 
  21. "Emily". Kim Manners. The X-Files (Fox). http://en.wikipedia.org/wiki/Emily+%28The+X-Files%29. No. 7, season 5. 
  22. "Drive". Rob Bowman. The X-Files (Fox). http://en.wikipedia.org/wiki/Drive+%28The+X-Files%29. No. 2, season 6. 
  23. "Kaddish". Kim Manners. The X-Files (Fox). http://en.wikipedia.org/wiki/Kaddish+%28The+X-Files%29. No. 15, season 4. 
  24. "The Blessing Away". R.W. Goodwin. The X-Files (Fox). http://en.wikipedia.org/wiki/The+Blessing+Away+%28The+X-Files%29. No. 1, season 3. 
  25. "Miracle Man". Michael Lange. The X-Files (Fox). http://en.wikipedia.org/wiki/Miracle+Man+%28The+X-Files%29. No. 18, season 1. 
  26. "The Truth Is Out There," The Official Guide to the X-Files Vol. 1, by Brian Lowry, Chris Carter. Harper Paperbacks, 1995.
  27. "Tooms". David Nutter. The X-Files (Fox). http://en.wikipedia.org/wiki/Tooms+%28The+X-Files%29. No. 21, season 1. 
  28. "Monday". Kim Manners. The X-Files (Fox). http://en.wikipedia.org/wiki/Monday+%28The+X-Files%29. No. 14, season 6. 

Bronnelys[wysig]

Hierdie artikel is in sy geheel of gedeeltelik vanuit die Engelse Wikipedia vertaal.