Académie française

in Wikipedia, die vrye ensiklopedie
(Aangestuur vanaf Franse Akademie)
Spring na: navigasie, soek
Die gebou van l'Institut de France.

Die Académie française (Afrikaans: Franse Akademie) is 'n amptelike Franse instelling wat Frans bevorder. Dit vorm saam met vier ander akademies l'Institut de France (die Instituut van Frankryk). Die liggaam tree op as 'n amptelike gesag oor die taal en publiseer 'n amptelike Franse woordeboek. Dit tree net op in 'n raadgewende hoedanigheid en sy beslissings is nie bindend vir die publiek of die regering nie.

Die akademie het veral twee funksies: die bevordering van die Franse woordeskat en grammatika, en van die gebruik van Frans wêreldwyd. Laasgenoemde word onder meer gedoen deur die jaarlikse toekenning van ongeveer 60 letterkundepryse, waaronder die Prix de l'Académie française. Die akademie is ’n toonaangewende instituut en het 40 lede.

Geskiedenis[wysig]

Die Académie française is een van die oudste akademies in Frankryk. Dit is in 1635 amptelik deur kardinaal Richelieu gestig. Dit het al van 1570 af bestaan, maar het tot met sy amptelike stigting informeel gefunksioneer.

Tydens die Franse Revolusie is alle akademies afgeskaf en vervang deur 'n enkele Nasionale Instituut van Wetenskap en Kuns, die latere l'Institut de France. In 1805 het Napoleon Bonaparte ’n aparte klas vir Franse taal en literatuur met 40 lede binne die instituut daargestel, geskoei op die model van die vroeëre Académie française. In 1816 het koning Lodewyk XVIII gelas dat die klas die naam akademie kry, en van toe af was dit weer bekend as die Académie française.