Frits Gaum
Dr. Frits (Frederik Malherbe) Gaum (1940-) is 'n emeritus-predikant van die Nederduitse Gereformeerde Kerk en skrywer. Hy is die stigter-direkteur van Bybelkor (tans Bybel-Media) en was tot met sy aftrede in 2004 hoofredakteur van die NG Kerk se Kerklike Tydskrifte en dus ook redakteur van dié kerk se amptelike blad, Kerkbode. Hy was skriba van die Algemene Sinode van die NG Kerk (1990-1998) en moderator van die Wes-en-Suid-Kaapse Sinode (1995-1999). Hy was in 1997 die opsteller van die NG Kerk se belydenis oor die kerk se betrokkenheid/ondersteuning van apartheid, "Die verhaal van die NG Kerk se reis met apartheid", wat uiteindelik ook op die tafel van die Waarheid-en-versoeningskommissie beland het. Gaum is die skrywer van etlike boeke, waaronder "Nie van hoorsê nie, Here", "Op pad met God en mense", "Lente van '66" ('n roman), "Praat verby grense" (saam met sy seun, Laurie) en "Fluit-fluit, die kerk is uit?" wat in 2012 met die Andrew Murrayprys bekroon is. Hy is die hoofredakteur van die "Christelike Kernensiklopedie", wenner van die Pieter van Drimmelen-medalje van die Suid-Afrikaanse Akademie vir Wetenskap en Kuns in 2009. Hy is getroud met Henda en hulle het drie kinders - André (lid van die Parlement), Laurie (predikant) en Lina (musiekdirekteur)- en twee kleinkinders.
